Read Phom Naga MENVIH KESHO 27 Bible Online

MENVIH KESHO 27 - Phom Naga bible

MENVIH KESHO 27

¹SHEMBÜPAyü ngelei vangngai, hatü ngei yemleipü; ngei üpa kü nyemhen? SHEMBÜPAyü ngelei yangnyu loishing; ngei üam kü nyemnüng?

²Mechem shennyaktenthüi ngei khüei ngelei phai lühtükhen yaongnya, ngelei vepathüjom huluh shuohtü dohen.

³Veshanthüi ngei khüei baümtap velangmao, ngei monglongshi nyuhen.

⁴SHEMBÜPA kü ngei dou hük phenyeih ngei yempeyü hapa hih: Ngelei yangnyu nyihyang kemei ngei SHEMBÜPAlei shemei nyuhen. SHEMBÜPA nethe meipü kü veihen, hatü büpalei phopshemei büpa yemhen.

⁵Mehenangkü ngei shanghahpü nyih kü büpa nyushingei ngei yangei tuhhen. Büpai büpalei ashakshem mongei ngei joshi tuhhen; büpai ngei yaongshang kü chongwongei tuhhen.

⁶Shejüang ngei shonei nyupü vepathü shak kü ngei longei aonghen. Mongongpai leneiwongei ngei büpalei ashakshemei jakpü moila shuohhen. Ngei SHEMBÜPA kü kesho lingei lokhen.

⁷Ngei nyükshingkü ngelei ngeü danlangshih, Oh SHEMBÜPA; nüngi ngei kü phahjishih hatü jangshih.

⁸Ngelei mongdangi, “Nüngei dhe yemtuh” shei enyüke. SHEMBÜPA, nüngei dhe ngei yemhen.

⁹Ngei toueipü nüngei dhe telepdai. Nüng mongshihpai nüngei chongphobü nyokei teleishih; Nüngü ngelei sheühbü nyuhampeih. Nüngi ngei teyaktük, nevaijü tetuhphong Oh SHEMBÜPA, ngei Yemleipü.

¹⁰Onyü opai ngei tuhphongjao, SHEMBÜPAi ngei yahhen.

¹¹Nüngei lem hushih, Oh SHEMBÜPA; vepathü longi nyupü nangkü ngei yanglemei mülangtuh.

¹²Ngelei vepathüi mongpü kü ngei teshuohtük, ngei khüei shahshem denpü shuohnyüke; hatü jomi dehilao ngainyüke.

¹³Ngei shaang thahshi ha kü monglemnyeih: Yemmü nyupü kahdok kü ngei SHEMBÜPA meipü eehen.

¹⁴SHEMBÜPA omdantuh, wong kohtuh, monglongtuh, SHEMBÜPA omdantuh.