Read Phom Naga MENVIH KESHO 30 Bible Online

MENVIH KESHO 30 - Phom Naga bible

MENVIH KESHO 30

¹Ngei nüng vihhen, Oh SHEMBÜPA, mehenangkü nüngi ngei tukei an, hatü ngelei vepathü ngei shak kü mongneonghü.

²Oh SHEMBÜPA, ngelei Kahvang, ngei nüng kü sheühshih shei lenpeih, hatü nüngi ngei meihüpeih.

³Oh SHEMBÜPA, nüngi ngei Sheol leipü müei ngaipeih, kahshalei shüdaipüthü khong kübü nüngi ngei kü yangnyu shuohpeih.

⁴SHEMBÜPA kü menvih kesho loktuh, Oh am büpa kü hinglempüthü, hatü büpalei daülangpü men kü menvih shuohtuh.

⁵Mehenangkü büpa mongshihnyeih, shejao kanja shing mon; büpa bampü yangnyu yangkemei shingvaishi nyüke. Vangnyak kü thepei nyulangmao nepnüng mongongpü peikahen.

⁶Mechem ngei lakbowlayangei nyupa, “Ngei nejenlenpih” shei epeih.

⁷Oh SHEMBÜPA, nüng phahjipai, nüngi ngei kahshang keiha wong kohshi tuhpeih, Shejao mechem nüngei dhe jodaipa, ngei nyemei nyupeih.

⁸Oh SHEMBÜPA, ngei nüng kü nyükpeih; SHEMBÜPA kü ngei phahji yüei phoppeih.

⁹Ngei didaijü hatü ngei kahshalei shüdaijü mehe nanglei nyüpa? kübhih-i nüng vihhen je? Nüng meipü jung hapai ehen je?

¹⁰Bangtuh, Oh SHEMBÜPA, hatü ngei kü phahjishih! Oh SHEMBÜPA, nüngü ngelei sheühbü vaikei!

¹¹Nüngi ngei mahng theppü mongong leihüpeih; nüngi ngelei dhoila ashak yahlangtü mongongpü ow owhüpeih,

¹²hanangkü ngelei mongdang nenmü nenyui nüng kü kesho loknyeih. Oh SHEMBÜPA, ngelei Kahvang, ngei nüng kü düngei menvih shuohhen.