Read Phom Naga MENVIH KESHO 31 Bible Online

MENVIH KESHO 31 - Phom Naga bible

MENVIH KESHO 31

¹Oh SHEMBÜPA, ngei nüng kü loishing yemnyeih; nüngi ngei teveühü, nüng daülangshemshepai ngei yangtuh.

²Ngei kü nüngei dhaong shaangshih; lomi ngei yangshih. Nüngü ngei shingvaishi loishing yaongnyü vaikei, ngei yanghen penyüsha vaikei.

³Nüngü ngelei yaong hatü penyüsha; nüngei men kü ngei mülangtuh,

⁴Ngei kü joei haenpü tai kübü ngei yahlangtuh; mehenangkü nüngü ngei loishing.

⁵Nüngei lak kü ngei ngelei laangha shuohnyeih; nüngi ngei yangteke, Oh SHEMBÜPA, hingshangpü Kahvang.

⁶Yahlak neshiüpü lajeithü kü khümpüthü kü nüngi jiühitnyüke, shejao ngei SHEMBÜPA kü hinglemnyeih.

⁷Nüngi bampü kü ngei mongongnyeih, mehenangkü nüngi ngei ponghahpü eeteke, hatü ngelei laangha shanghahpü nyingteke.

⁸Nüngi ngei vepalei lak kü neshuohtük, shejao ngelei la bhashahpü shing kü tuh.

⁹Ngei kü phahjishih, Oh SHEMBÜPA, mehenangkü ngei shanghah kü nyüpeih; mongmangpai ngelei mük wong kemdai; mongshangpai ngelei laangha, hatü büm wong nekoh-i leidaiteke.

¹⁰Ngelei yangnyu-ü mongmang kü, hatü ngelei bongthüyü huipai peihtük; Ngei shanghahpai wong kemdai; ngelei vangao juwdaiteke.

¹¹Ngelei vepathü homei chingyowthüiyao ngei nyonghüteke; Ngeiyü küphüthüi nyembenüng dou kei leidai; Chingyangshongei ngei eetü nyaidainyüke.

¹²Didaipü am betükpü keiha jomi ngei betükteke; Ngeiyü bhaodaipü dük kei leidaiteke.

¹³Mehenangkü longi nümnümpü ngei dannyüke, peü lemei nyemhihan mon nyüke; Jomi ngei khüei phaüshah shownyüke, jomi ngei jühen küpjan temnyüke.

¹⁴Shejao ngei nüng kü hinglemnyeih, Oh SHEMBÜPA, “Nüngü ngelei Kahvang” shei ngei enyeih.

¹⁵Ngelei hepakthü nüngei lakmongei; ngelei vepathü hatü shüveipüthü kübü ngei yangshih.

¹⁶Nüngei dhe nüngei chongphobü kü nyahütuh, Nüngi bampü longpai ngei yangtuh.

¹⁷Nüngi ngei teveühü, Oh SHEMBÜPA, mehenangkü ngei nüng kü nyüknyeih; Nemeipüthü veühütuh; Jom shah ne-e-i Sheolei nyuhütuh.

¹⁸Daülangpüthü khüei changmeipai nyonghüei shahshem epüthülei ju nentükhütuh.

¹⁹Nüng kü nyempüthü shing nüngi jaoei tuhpü meipü, hatü nüng kü loipüthü kü nüngi shuohpü doumeithü meshük thamapüang?

²⁰Nüngi hathü shennyak shah showhen kübü yangei nüng nyushingei tuhnyüke; nüngi hathü eelapü yeijaang kübü yangei nüng nyushingei tuhnyüke.

²¹SHEMBÜPA men longtuh, mehenangkü ngei shümlangpü chingnyü kü nyushi büpai yashanshi bampü ngei kü hupeih.

²²Ngei nyempai eteke, “Ngei nüng toueipü taishi changtükteke.” Shejao ngei kü sheühshih shei ngei lenshingkü nüngi ngei phepü dan.

²³SHEMBÜPA kü bamtuh, amphong büpa kü hinglempüthü. SHEMBÜPAi hinglempüthü yangnyeih, shejao changmeipüba kü hanghi shuohnyeih.

²⁴Nüng wong kohtuh, monglongtuh, amphong SHEMBÜPA omdanpüthü peü.