Read Phom Naga MENVIH KESHO 32 Bible Online

MENVIH KESHO 32 - Phom Naga bible

MENVIH KESHO 32

¹Üami mang tükpü dang, üamei mang küptük, jom moihiman.

²Üamei mang khüei SHEMBÜPAi nenyonghü; üamei laangha kü lueilempü neshiü, jom moihiman.

³Mechem ngei mang kotü nenmü nyupa, ngei helushoei thepai vangao juwdai.

⁴Nyakhingai thüngei ngei shak kü nüngei lak vihheki nyu; Shaonyü vanghe sham kü shie vanpükei ngelei wongkemdai.

⁵Hapheikü ngelei mang nüng kü nyinghü, hatü ngelei mang nejolang; Ngei, “SHEMBÜPA kü ngelei mang lahhen” shei e, hatü nüngi ngei pungpü mang tüktükpeih.

⁶Nüng danghen mü nyushingkü nüng kü hinglempüthü peü nüng kü phophütuh; mechem shanghah yungnyü büng longhen, hapai jom nethahhen.

⁷Nüngü ngei joshing, nüngi ngei shanghah kübü yangei tuhnyeih; hatü yanglanghen kesho lokei shonnyüpeih.

⁸Ngei nüng kü daihen lem huhen hatü nyuhphahen; ngei nüng kü veishi shahnying meipü ephahen.

⁹Ju kü nyiam ühtü shümei shoupei tuhpü danaokpü neshiüpü koyei nevaijü gadu cheha kei tenyu.

¹⁰Nemeipüthü longi ponghahnyeih, shejao SHEMBÜPA kü hinglempüthü kü bampai shonei nyunyeih.

¹¹SHEMBÜPA kü mongongtuh, hatü mongmeituh, Oh daülangpüthü, hatü mongongpai lentuham mongdang kangshanginyupüthü peü.