Read Phom Naga MENVIH KESHO 33 Bible Online

MENVIH KESHO 33 - Phom Naga bible

MENVIH KESHO 33

¹SHEMBÜPA kü mongongpai loktuh, amphong daülangpüthü; Daülangpüthüi büpa vihhen bah-angpeih.

²SHEMBÜPA kü lyre vüngei vihtuh, vü lem an kohpü harp vüngei büpa kü ünghinyah meipai loktuh.

³Büpa kü kesho ja lokeishuoh; lahhinei vüngtuh, wongmü lentuh.

⁴Mehenangkü SHEMBÜPAlei shah daülangi, hatü büpalei dou peü hingshangpai düknyüpeih.

⁵Büpai daülangshemshepü, hatü shahhing kü bamnyüpeih; kahdoknyü-ü SHEMBÜPAi bampai maei nyüke.

⁶SHEMBÜPAlei shah-i vangshothü lingpeih, hatü büpai ngü heepai lithathü peü lingpeih.

⁷Büpai dük kü shihpükei yungching yungthü thailangnyeih; büpai yungching ilangmong tuhshingei tuhlangnyeih.

⁸Kahdoknyü peüi SHEMBÜPA kü nyemtuh; kahdoknyü hangku peü büpa kü dhüm shuohtuh.

⁹Büpai shah e, hatü kahdoknyü vampeih; büpai ngeükhüam shuoh, hatü peü vampeih.

¹⁰SHEMBÜPAi jatthülei küpjan kong leitüknyeih; büpai hangkuthülei mükhong bangtüknyeih.

¹¹Shejao SHEMBÜPAlei küpjan den kü lakshing nyunyeih; hatü büpalei mongeipü mükhongthü hüdenhalenshi nyunyeih.

¹²Kahvangü üam jatei SHEMBÜPA nyu, hatü büpai laophülei mükjüp vaihen jepü nanglakü moihimanpü!

¹³SHEMBÜPAi vangsho leipü veiyei shanshihnyeih, hatü hangkuli peü eenyeih.

¹⁴Büpa ong uoshing kü uopü toueipü kahdoknyü kü nyupüthü peü kü veinyeih.

¹⁵Büpai jomei mongdeih kemei peihünyeih, hatü jomei douthü kü veinyeih.

¹⁶Ong hükü laophülei veshanthüi neyangnyih, hatü hampa hük laophülei wongi neyangaoknyih.

¹⁷Aokpü danghen shei vehok koyei kü monglempeyü angsha, hatü hapalei wongi neyangaokpih.

¹⁸Hingmei SHEMBÜPAlei mükü büpa kü nyempüthü kü, hatü büpa bampü kü monglempüthü kü veishi nyüke.

¹⁹Büpai jom dihen kübü yangnyüke, hatü münghishaü hepak kü yemmü tuhnyeih.

²⁰Hami SHEMBÜPA kü monglemei omdannyeih; büpayü hamei sheühbü hatü inyüshung.

²¹Büpa kü ham mongongnyeih, mehenangkü hami büpalei daülangpü men kü hinglemnyeih.

²²Hami nüng kü monglemshingkü nüngi bampü ham mü nyukei, Oh SHEMBÜPA.