Read Phom Naga MENVIH KESHO 35 Bible Online

MENVIH KESHO 35 - Phom Naga bible

MENVIH KESHO 35

¹Ngei mü mongongpüthü mü mongongtuh, Oh SHEMBÜPA; ngei khüei hokpüthü mü jom khüei hoktuh!

²Inyüshung hatü phunglang ow temtuh, hatü ngei kü sheühphahen layaongtuh.

³Ngei kü changpüthü khüei phunglang notuh, hatü ngelei laangha kü, “Ngei nüngei Yemleipüba” shei etuh.

⁴Ngei jühen yempüthü veüpong hatü mongmang danghütuh. Ngei khüei ten tempüthü nyokei leihütükte, hatü mongshanghütuh.

⁵SHEMBÜPAlei vangsho phongshanthüi jom kü changshing kü jomü vanglükshaw kübü hahbhang kei nyuhütuh.

⁶SHEMBÜPAlei vangsho phongshanthüi changshing kü jomei lem shangmang hatü nyüshi leihütuh;

⁷Meheyao ten neshiüshiüi jomi ngei kü tai haenpeih; meheyao ten neshiüshiüi ngei shing kahsha shopeih.

⁸Nedeih-i nyushingkü jom kü ngangahük kü mahpü peihütuh. Jomi haenpü tai kü jom manhütuh; hatü kahsha kü demhütuh.

⁹Büpai yangpü kü mongongei ngelei laangha SHEMBÜPA kü mongonghen.

¹⁰Ngelei büm kempai, “Oh SHEMBÜPA, nüng keiha üpa nyüpa?” shei ehen. Nüngi jom mü nyeishi wong kohpüthü toueipü wong nekohpüthü, hatü wong nekoh hatü nehahneyingpüthü jom leipü gühlangpüthü leipü yangnyeih.

¹¹Shennyaktenthüi ngei khüei denpü shuohnyüke, hatü ngei nyingei neshiüpü shahhidou nangkü ngei nyonghünyüke.

¹²Jomi ngei kü mei nangjei ten shuohnyüke, ngeiyü dhoila ashak ümtü shüaeiyungleyei nyupeih.

¹³Shejao mechem jom tüngei nyupa, ngeiyü dhoila ashak ümtü shüaeiyungleyei nyupeih. Ngei ngelei shangjing thaungei shatü phoppeih.

¹⁴Ngelei küphü nevaijü jeihinaü nangkü mahng theppü keiha theppeih. Laophülei nyü kü mahng theppü keiha ngei aümei shaei theppeih.

¹⁵Shejao mechem ngei shanghah pongpa, jom peü mongongshi thaiyei ngei khüei eelapeih. Ngei nenyingpü shennyaktenthü peiyei nedoh-i ngei kü lak shihpeih.

¹⁶Jomi phahji neshiüi ngei kü yaüei eelapeih, jomi ngei kü jomei bha vükei epeih.

¹⁷Meshük lushi nüngi ngei kü veishi nyuhenang, Oh SHEMBÜPA? Jomi ngei lomohtükpü kübü, hatü mailangthü kübü ngelei yangnyu yangtuh.

¹⁸Shejüang thaihiyu longpü kü, hatü khong touei ngei nüngei men longhen.

¹⁹Ngei shak kü ngelei vepathüi mongteonghü, nevaijü ten neshiüpü kü ngei kü jiühitpüthüi ngei mongshangpü eeyei mük nyepei shah te-eteihü.

²⁰Jomi chingmeivangmei shah ne-enyu; shejao chingmei kü bampü shennyakthü khüei laki lingei shahshem enyüke.

²¹Jomi ngei khüei ju katü lenei, “Aha, Aha, hami nüngi dükpü eetepih” shei enyüke.

²²Shejao SHEMBÜPA, nüngi ha eeteke, nüng nenmü tenyudai! Oh SHEMBÜPA, nüngi ngei toueipü taishi telüdai.

²³Paotuh, yaongtuh hatü ngei khüambakshih, Oh SHEMBÜPA, ngelei Kahvang.

²⁴Nüng daülangshemshepü aimü ngei dah shakhütuh, Oh SHEMBÜPA, ngelei Kahvang, hatü ngei shak kü hathüi mongte-onghü.

²⁵“Aha, hamei mongi lümpü dangtepih” shei jom nyingi te-ehü; nevaijü “Hami büpa lühtüktih” shei jomi te-ehü.

²⁶Ngei vongshüh pongpü kü mongongpüthü peü veüpong, hatü pongnepaüpü vamhütuh. Ngei khüei shangei aongpüthü peü veüpong hatü mongmang danghütuh.

²⁷Ngei dah shakpü kü mongmeipüthü peü mongongpai lenhütuh; Jomi düngei, “Laophülei chongphobü meihühen mongongpü SHEMBÜPAyü longpüba” shei ehütuh.

²⁸Shejüang ngelei yeijaangi nüng daülangshemshepü, hatü helu shoei nüng menvih jung ehen.