Read Phom Naga MENVIH KESHO 37 Bible Online

MENVIH KESHO 37 - Phom Naga bible

MENVIH KESHO 37

¹Mangthü nyupü nangkü mongteshang; ten dükpüthü kü mük tehüh;

²mehenangkü jomü lomi thüng, hatü phenha keiha kaudaihen.

³SHEMBÜPA kü hinglemtuh, mei düktuh; shejüang am hapa kahdok kü nyuhen, hatü meishi mongongshi nyuhen.

⁴SHEMBÜPA kü mongongtuh, hatü nüngei mongi lümpü büpai shuohhen.

⁵Nüngei lem SHEMBÜPA kü lanei shuohtuh; büpa kü hinglemtuh, hatü büpai ha dükphahen.

⁶Büpai nüng daülangshemshepü vanghela kei nyahühen, nüng shahhing epü heshotapa kübü vanghe kei khanghühen.

⁷SHEMBÜPA touei nenmü nyutuh, hatü nenteipai büpa omdantuh; shennyakthüi laophülei lem kü aokpü dangpü eeyei, hatü nemeipü küpjanthü kü aokpü dangpü eeshingkü nüng mongteshang.

⁸Mongshih yepei tuhtuh, mongpuk vampü yaktüktuh; mongteshang, hapai ten lemei münyeih.

⁹Shennyaktenthü changtükhen, shejao üami SHEMBÜPA omdannya, kahdoknyü mükjüp danghen.

¹⁰Hepak kanja pheikü mangthü nechongkahen; Ammi jom yemjao nedanghen.

¹¹Shejao nenteiaokpüthüi kahdoknyü mükjüp danghen, hatü halei chingmei kü hüshemei nyuhen.

¹²Daülangpüthü khüei nemeipüthüi shah shownyüke, hatü jomei bha vüknyüke;

¹³shejao SHEMBÜPAi nemeipüthü kü nyinyeih, mehenangkü jomei nyih ngoiteke shei büpai nyingei nyüke.

¹⁴Nemeipüthüi taopathü, hatü nehahneyingpüthü vüshihhen, hatü kangshangi kampüthü jühen yan nonyüke hatü lah künyüke.

¹⁵shejao jomei yani-üng jomei mongdang kü baphen, hatü jomei lah mangdaihen.

¹⁶Nemeipüthüi longi angpü meyü daülangpüthüi maani angpü-üng meipüba.

¹⁷Nemeipü amei bhagchong mangdaihen, shejao SHEMBÜPAi daülangpüthü shongei tuhnyeih.

¹⁸Eela neshiüpüthülei nyihthü SHEMBÜPAi nyingnyeih, hatü jomei mükjüp düngei nyuhen.

¹⁹Hepak ten kü jom veü neponghühen, münghishaü nyihthü kao jom changshi anghen.

²⁰Shejao nemeipüthü mahdainyeih, hatü SHEMBÜPAlei vepathüyü phenha nethe meipü keiha hatü jom awshit kei mahdaihen.

²¹Mangthüi luei yahtü neshemi tuhnyeih, shejao daülangpüthü nekaungnyih, hatü shuoh-ei nyunyeih.

²²SHEMBÜPAi moihimanpüthüi kahdoknyü mükjüp danghen, shejao büpai thaüvaütükpüthü changtükhen.

²³Mechem büpai jenei lemthü kü monghahhen, jenei laphenü SHEMBÜPAi wonghünyeih.

²⁴Jen huluh shuohjao nedohen, mehenangkü SHEMBÜPAi büpalei laki jen kü shoungnyeih.

²⁵Ngei hashih nyuhampeih, hatü shaang behe leiteke, shejao daülangpü shennyak hük SHEMBÜPAi yaktükpü, nevaijü büpalei hühihathü yühahjaiyingei ne-eeangpih.

²⁶Jom düngei nekaungi shuoh-ei lushuohteinyüke, hatü jomei hapeüthü moihimanpü leinyeih.

²⁷Mang kübü yantuh, mei düktuh; shejüang hapa kahdok kü am den kü nyuhen.

²⁸Mehenangkü SHEMBÜPAi shahhing kü bamnyeih; büpai büpa kü hinglempü shennyak neyakphonghen. Daülangpü am düngei yangei tuhhen, shejao nemeipü amei hapeüthü mahtükhen.

²⁹Daülangpüthüi kahdoknyü mükjüp danghen, hatü halei den kü nyuhen.

³⁰Daülangpüthülei ju kübü kihikon vamnyeih, hatü jomei yeijaangi shahhing enyeih.

³¹Kahvangei shahkungü jomei mongdangei nyunyeih; jomei laphen nekükdainyih.

³²Nemeipüthüi daülangpüthü tapei jühen yemnyeih.

³³Shejao SHEMBÜPAi jom vepathülei wong phangkü netuhphongpih, nevaijü shahphen shingei yaongshingkü nenyonghüpih.

³⁴SHEMBÜPA omdantuh, büpalei lem jiüshangi tuhtuh, hatü büpai nüng kahdoknyü mükjüp danghühen longeianshihhen; nemeipüthü mahpü nüngi eehen.

³⁵Ngei nemeipüthü hatü wong noei vanglem lempü shennyak eetepih, hatü Lebanon leipü cedarpü keiha mih shangkü aongpü eetepih.

³⁶Shejao pheishi ngei peihshingkü büpa nenyu; ngei büpa yem shejao nedang.

³⁷Eela neshiüpü shennyak kü veishi nyutuh, kangshangpü am kü veihümao; Chingmei kohpü shennyakei hüshompheinaü nyüpeih.

³⁸Shejao mang thahpüthü dhaomü mahhen; nemeipü amei hüshompheinaü mahdaikemhen.

³⁹Daülangpü am yanghenü SHEMBÜPAleipü peinyeih; Jom shanghahpü hepak kü büpayü jomei penyüsha.

⁴⁰SHEMBÜPAi jom kü sheühnyeih, hatü yangnyeih; büpai jom nemeipü am toueipü yangnyeih, mehenangkü jomi büpa kü loinyeih.