Read Phom Naga MENVIH KESHO 39 Bible Online

MENVIH KESHO 39 - Phom Naga bible

MENVIH KESHO 39

¹“Ngelei lemthü kü veihen, hatü ngelei yei-i mang nethahhen yomhen. Nemeipüthü ngei touei nyupü thahshi ngei ngelei ju shümlanghen” shei ngei eteke.

²Ngei meipü jung vaijao shah phahükao ne-e-i nenmü nyu, shejao ngelei shanghah nyeinya dateke.

³Ngelei mongei mongdang shaamnyüke; ngei phopei deihshuohjü aw bahnyüke; hahepak kü ngei ngelei yeijaangi shah eteke.

⁴Oh SHEMBÜPA, ngelei yangnyu dohhen hatü ngelei nyihthü hushih; ngelei yangnyu meshük shülangshi lüdainya nyinghüshih.

⁵Nüngi ngelei yangnyu nyih-ü lakkham maani mon ling; ngelei yangnyu nyih-ü nüng touei kong khih. Peüei yangnyu-ü ngü keiha nyüke.

⁶Hingmei peüha vangdhüm laang keiha longteinyüke; meheyao nevaihen kü shangpongei nyunyüke; Jomi thaiyei shüngnyüke, shejao ha üpai yahlanghennenyingnyu.

⁷Shejao shaang, Oh SHEMBÜPA, ngei mehe danei nyuhen? Ngei monglempeyü nüng kü nyüpeih.

⁸Ngelei mang peü kübü ngei yangshih. Nüngi ngei ngapathü nyiteihen mü teleihü.

⁹Ngei nenmü nyudaihen, ngei ju nekapih; mehenangkü hapa dükpeyü nüng hih.

¹⁰Nüngi ngei kü bheipü dohdaishih; Nüngei laktaümi ngei dihen khih.

¹¹Mang nangkü nüngi hangku kü loh-ei yeannyüke; jomei mop thaüpi kei hahtüknyüke; hingmei shennyak peü ngü heepü keiha nyüke.

¹²Ngei phoppü danlangshih, Oh SHEMBÜPA; hatü lenpü kü dhaong shaangshih; ngei theppü kü nüngi sheühshih. Hamei obü opa am keiha ngei nüng mü yenpa kei nyunyeih.

¹³Ngei chem mongongshi nyunüng ngei lüdai shekü hatü neshiüi leidai shekü nüng chem ngei toueipü yaakdaishih.