Read Phom Naga MENVIH KESHO 40 Bible Online

MENVIH KESHO 40 - Phom Naga bible

MENVIH KESHO 40

¹Ngei nenteiaokpai SHEMBÜPA omdannyeih; büpai ngei lemei meetü ngei lenpü danteke.

²Büpai ngei nyülükpü kahsha leipü shüei an; nyaühutchong leipü tukei an, hatü ngei nedohen mü ngelei la yaong shangkü yaonghü.

³Büpai ngelei ju kü kesho ja hük shih, jenei Kahvang kü menvihpü kesho hük. Longshi shingi ha eetü nyemhen, hatü SHEMBÜPA kü hinglemhen.

⁴Üpa shennyaki laophü hinglempü SHEMBÜPA kü tuh, üpai changmeipü am kü nevei, nevaijü lebü shahshem kahvangthü kü nekhüm moihimanpü.

⁵Oh SHEMBÜPA, ngelei Kahvang, nüngi ham kü thamapü douthü longi dükteke. Nüngi ham shing tempü douthü üpaiyao iehen neaoknyu; Ngei paoh hathü jung enüng shelangmeyü ngei ieaokhen mao ahshi nyeidaiteke.

⁶Jakpü moila hatü moila nüngi nenanyu, yemhimak jüei jakpü moila, mang moila nüngi neyünyu, shejao nüngei shah banghen nüngi ngei kü dhaong shuohteke.

⁷Hahepak kü ngei, “Ngei hammü nyüpeih, ngei peitepih hapa shahkungnyü laidülei ngei jung nyangei nyüpeih.

⁸Ngei nüngi mongpü dükhünyeih, Oh ngelei Kahvang; nüngei shahkungnyü ngelei mongdang mongei nyüpeih” shei eteke.

⁹Ngei thaihiyu longpülei nüng daülangshemshepü jung baongnyeih; Ngei mechemao ha ne-e-i nenyu shei nüngi nyingei nyüpeih, Oh SHEMBÜPA.

¹⁰Nüng daülangpü jung ngelei mongdangei jolangei neshiü; Ngei nüng monglemaokpü, hatü yemleipü jung enyeih. Thaihiyu longpü kü ngei nüng bampü, hatü shahhing nejolangnyih.

¹¹Nüngei phahji ngei toueipü teshümlang, Oh SHEMBÜPA; düngei bampü hatü shahhingi ngei yanglangtuh.

¹²Mehenangkü ieyei neaoki shanghah-i ngei shonlangteke; ngelei mangthüi ngei yeplangteke, hatü ngei hajük kü ne-eenyu; hathüyü shokuk melaü mao nyeishi nyüke, hatü ngelei mong maandaiteke.

¹³Oh SHEMBÜPA, nüngi ngei yanghen mongongtuh; Oh SHEMBÜPA, ngei kü sheühphahen shülangtuh.

¹⁴Üami ngelei yangnyu jühen yemnya, jom peü veühütuh hatü nepongpaüpü vamhütuh; Üami ngei lomohhühen kennya, jom peü mongmangpai nyokei leihütuh.

¹⁵Üami ngei kü, “Aha, Aha!” shei yaünya, jom veüpai mongmanghütuh.

¹⁶Shejao nüng yempüthü peüi nüng kü mongonghütuh; nüng yemleipü kü mongongpüthü peüi, “SHEMBÜPA longei anshihtuh!” shei düngei ehütuh.

¹⁷Shejao ngeiyü taopa hatü neaoknethang; SHEMBÜPAi ngei deih-ei nyemdangma. Nüng ngelei sheühbü hatü yangbü; Oh ngelei Kahvang, nüng tepheidaima.