Read Phom Naga MENVIH KESHO 42 Bible Online

MENVIH KESHO 42 - Phom Naga bible

MENVIH KESHO 42

¹Shaoki yung yemei mokpükeiha, ngelei laanghai nüng ongyangnyeih, Oh Kahvang.

²Ngelei laanghai Kahvang, vanyangyem Kahvang ongyangnyeih. Mechem ngei peiyei Kahvangei dhe eehen?

³Ngelei vepathüi nedoh-i ngei kü, “Nüngei Kahvang melei nyüpa?” shei pheshingkü ngelei hahyingü ngelei mükphi nyuhampeih.

⁴Ngei khong mü daipü, hatü Kahvangei shemei khong mütü mongong kesho, hatü menvih kesho lokei daihampü deihshuohjü ngelei mong mangdainyüke.

⁵Oh ngelei laangha, nüng mehekei mongmangnya? Ngelei mongei mehekei hajük mongshangnya? Kahvang kü monglemtuh; mehenangkü ngei büpa vihhen, ngelei sheühbü, ngelei Kahvang.

⁶Ngelei mongei ngelei laangha mongmangnyüke; hanangkü ngei Jordan kahdok, Hermon hatü Mizar Kahshangthü leipü nüng deih-ei danghen.

⁷Yungching ilangmong keiha ngei kü mongshang peiteke, shanghah-i yung laongpü ngeü keiha ngüngteke, yungching yungmok ngei shangkü yenteke.

⁸Nyihnüng SHEMBÜPAi büpa bampü hunyeih, hatü yanüng büpalei kesho ngei mü nyüpeih; hapayü ngelei yangnyui Kahvang kü phoppü.

⁹Kahvang, ngelei yaongnyü kü, “Nüngi mehekei ngei betüknya? Vepathüi shüveipü nangkü mehekei ngei mahng thepei kamteihenang?” shei eteke.

¹⁰Ngelei büm kü dihen mü ma yahtü nyüpeih; ngelei vepathüi ngei kü yaüei, “Nüngei Kahvang melei nyüpa?” shei düngei enyüke.

¹¹Oh ngelei laangha, nüng mehekei mongmangnya? Ngelei mongei mehekei hajük mongshangnya? Kahvang kü monglemtuh; mehenangkü ngei büpa kü vihhen, ngelei sheühbü, ngelei Kahvang.