Read Phom Naga MENVIH KESHO 51 Bible Online

MENVIH KESHO 51 - Phom Naga bible

MENVIH KESHO 51

¹Nüngi bampü shangshi ngei kü phahjishih, Oh Kahvang; nüngei phahji yahyang shangshi ngelei mang thittükshihma.

²Ngei pungpü kübü meishi daütükshih, hatü ngelei mang kübü ngei paütükshih.

³Mehenangkü ngei pungpüshaipü nyingnyüke, hatü ngelei mang düngei ngei mü nyüke.

⁴Nüng khüei, nüng monha khüei ngei mang thahteke, hatü nüng touei mehe ten nyu ha dükteke. Hanangkü nüngi ngei kü shahphenpeyü jiüphei; ngei nyonghüpü kü dah shakteke.

⁵Hingmei, ngei bühshing kao mang nyu; Onyüi ngei kopü hepak kao ngei mang nyuteke.

⁶Hingmei nüngi mongei shahhing nyupü ha lümnyüke; hanangkü ngelei mongdang mongpalei nüngei kihikonnyuhshih.

⁷Hyssop yah-ei ngei daütükshih, hatü ngei daüdaihen; ngei paütükshih, hatü ngei shüdao mao shoshi leidaihen.

⁸Ngei mongongmonglepü jung bangshah; nüngi ngümtükpü vangtaothüao mongonghütuh.

⁹Ngelei mangthü kübü nüngei dhe jodaishih, hatü ngelei mangthü kemei thittükshih.

¹⁰Ngei kü daülangpü mongdang hük lingshih, Oh Kahvang, hatü ngelei mongkü ja, hatü jiüpü laangha hük shihshih.

¹¹Nüng ompü toueipü ngei teyaktük, hatü ngei kübü laangha daülangpü teyahlangpha.

¹²Nüngei yemleipü mongong ngei kü nyokei yahshih, hatü monghumpü laangha ngei kü tuhshih.

¹³Shejüang ngei pungpüthü kü nüngei lemthü nyuhhen, hatü mangthü nüng touei mong lepei leikahen.

¹⁴Iy yenhüpü mang kübü ngei yangshih, Oh Kahvang, ngei yangpü Kahvang, hatü ngelei jui nüngyemleipü jung kesho wongmü lokhen.

¹⁵Oh SHEMBÜPA, ngelei ju apshih, hatü ngelei jui nüngei menvih jung baonghen.

¹⁶Mehenangkü nüngi jakpü moila kü mongneongnyih, ngei paoh jakpü moila shuohjao nüngi ha kü mongneonghen.

¹⁷Kahvang touei yah-aokhenüng moilayü laangha mangpü; mongdang mangpü hatü mongleipü mongdang, nüngi ha neyaktükpih, Oh Kahvang.

¹⁸Nüng mongongpai Zion kü mei dükshihma; Jerusalem bhamthü lingei leishihma.

¹⁹Shejüang nüngi jiüshangpü moila kü mongonghen, jakpü moila hatü bümmü jakpü moila kü nüng mongmeihen; shejüang nüngei moidülei mohohbaongthü moila shuohhen.