Read Phom Naga MENVIH KESHO 68 Bible Online

MENVIH KESHO 68 - Phom Naga bible

MENVIH KESHO 68

¹Kahvang yaongnyeih hatüvepathü yantüknyeih; büpalei vepathü nyaidainyeih.

²Vanglüki awshit deilangpükei, jomphongao hapakei deilangtuh; aw touei püjiü nyaüpü keiha, Kahvang touei nemeipüthü mahtükhütuh.

³Shejao daülangpüthü mongonghütuh; jomi Kahvang touei mongmeituh; jom mongonghütuh.

⁴Kahvang kü kesho lokeishuoh, büpalei men kü menvihpü loktuh. Phum shangkü uoei kamteipüba kü men vihtuh, hatü büpa touei mongongtuh.

⁵Hashihhathü kü pa, hatü vaümnyüthü kü khüambakpeyü Kahvang; büpalei daülangpü shingei nyüke.

⁶Kahvangi lavüngtoipüthü kü nyuhen shem shuohnyeih; büpai khoklatei nyupüthü bümei danghüei daeisheyei deishihnyeih, shejao khüei yaongpüthü lavüngtoipü kahdokei nyunyeih.

⁷Oh Kahvang, mechem nüng nanglakthü touei daihen, mechem nüng jahpan homei daihen,

⁸kahdoknyü jennyüke, hatü vangshoi Sinai Kahvang touei, hatü Israel Kahvang touei vang keihünyüke.

⁹Oh Kahvang, nüngi vang changshi keihünyüke, hatü cheü neshiüpükahdok shao kahcheü vamhünyeih.

¹⁰Nüngei mithü halei nyushing dangnyüke; nüng meipai taopathü kü hahying shuohnyeih, Oh Kahvang.

¹¹Kahvangi shahkung shuohnyüke, hatü nyühathüi hapa shahjang baongnyüke.

¹²Ongpathü hatü veshanthü lomi nyaidainyüke; jomei baümtapei douhinangthü hanteinyüke.

¹³Am hanei-i mi khaokei shijao, athubalei yang kü ngini jümtü, hatü hapalei oushao kü nyangnyangpü honi jümpükei nüng nyuhen.

¹⁴Mechem Jeiyong Kahvangi ongthü yantükpa, hapayü Zalmon Kahshang kü shü vüpükei nyuteke.

¹⁵Bashan Kahshangü wong kohpü Kahshang, shangtaothü longi nyupü Bashan Kahshang!

¹⁶Kahvangi halei düngei nyuhen shei jepü Zion Kahshang kü mehekei mükhakei veinya, Oh Bashan Kahshang.

¹⁷Kahvangei koyei khari haja an; haja haja longi nyüke. SHEMBÜPAi Sinai Kahshang kübü büpa nyushingei peinyüke.

¹⁸Mechem nüng shaopü kahshangei aongpa, nüng mü khoklat kü longi müei aong. Nüng khüei yaongpüthü leipao nüngi laklei yah; SHEMBÜPA Kahvang halei nyuhen aongteke.

¹⁹Nyihjeih jenei hanggovih kopü SHEMBÜPA, Kahvang, jenei yemleipü kü menvih shuohtuh.

²⁰Jenei Kahvangü jen yemleipü Kahvang. Dipü kübü yanghenü SHEMBÜPA, jenei Kahvang leipü peinyeih.

²¹Hingmei Kahvangi vepathülei shangjing ngümtükhen; laophülei mang lem kü kampüthülei athen mangtükhen.

²²“Ngei hathü Bashan leipü müei leihen. Ngei jomphong yungching ilangmong leipü müei leihen” shei SHEMBÜPAi enyüke.

²³Shejüang ammi jomei iy kü shoupei kamhen, hatü ammei shithüi vepathülei phai hahhen.

²⁴Oh Kahvang, nüngi aokpü dangei daipü; ngelei Kahvang, ngelei Ongpa daülangpü shingei daipü peüi eeteke.

²⁵She philei kesho lokbüthü, ha pheilei kesho venbüthü, ha khong nyi aa kü nelathü nyüke.

²⁶Khongnyü thaihiyu kü Kahvang men longtuh; Israel lihilathüi SHEMBÜPA kü menvih shuohtuh.

²⁷Halei maanpü jat Benjamin ami mütü nyüke, halei Judah am ongthü khong, hatü halei Zebulun, hatü Naphtali ongthü khong nyüke.

²⁸Nüngei ngan hushih, Oh Kahvang, hatü peihdaipü nyihthükü nüngi dükpü wong hushih, Oh Kahvang.

²⁹Nüngei phopshem Jerusalemei nyupü nangkü ongthüi nüng kü thintho konyüke.

³⁰Bhuknyü yingei nyupü yemthü kü; hatü mohoh chehathü mü baongthü haümpü jatthü kü loh-eishuoh. Bom yahhen kenpüthü la phangei shouptüktuh, vehok lümpü nanglakthü yantükkemtuh.

³¹Ijip leipü mophimo nyemleikei, Ethiopia ami Kahvang kü lanei phophen.

³²Kahvang kü kesho loktuh, Oh kahdoknyü ongchingthü; SHEMBÜPA kü menvihpü loktuh.

³³Oh aivang den mebü vangshothü kü longteipü, büpai laophülei wong kohpü ngeü annyüke, bangtuh.

³⁴Kahvangei ngan jung baongtuh; büpalei müknyinshekhang Israel shak kü nyüke.

³⁵Nüng nyushingei Oh Kahvang, nüngü nyemshi nyüke. Israel Kahvangi laophülei nanglak kü nganhiwong shuohnyeih. Kahvang men longtuh!