Read Phom Naga MENVIH KESHO 69 Bible Online

MENVIH KESHO 69 - Phom Naga bible

MENVIH KESHO 69

¹Ngei yangtuh, Oh Kahvang; mehenangkü ngelei üng thahshi yung lümei aongdaiteke.

²La phenshing neshiüpü nyaühut mongei ngei hingdainyüke; Ngei ilangmongei hingdaiteke, hatü yungnyü büngi ngei bhonglangnyüke.

³Ngei lenpai nyiudai, ngelei üng mahdai. Ngelei Kahvang omdanei mükyang yungdaiteke.

⁴Meheyao ten neshiüpü kü ngei kü jiühitpüthü shokuk mao nyeidaiteke. Ngei jühenthü longi nyüke, shahshemi ngei nyonghüpü vepathü longi nyüke. Mehe ngei negüh, ha ngei shemhen je?

⁵Oh Kahvang, ngei nethahnengoipü nüngi nying, ngei nejiüi düktükpü nüng touei joei neshiüpih.

⁶Ngei nangkü shei nüng kü monglempüthü teveühü, Oh Jeiyong SHEMBÜPA Kahvang. Ngei nangkü shei nüng yempüthü dhüm neshiüi teleitük, Oh Israel Kahvang.

⁷Nüngei men kü ngei ne-ienelempü pongtepih, veüpai ngelei dhe jümlangteke.

⁸Ngelei shem am toueingeiyü yenpa kei leidai, ngelei jeihinaüthü touei ngei kung am kei leidaiteke.

⁹Nüngei shem kü nyakpükenpai ngei kü aw kei bahnyüke; nüng kü ne-ienelemi epüthülei shahlong ngei shangkü nyüke.

¹⁰Ngei thepei shüaeiyungleyei maanpü leipü nangkü jomi ngei kü ne-ienelemnyu.

¹¹Mechem ngei owhen dhoila ashak thüngpa, jomi ngeiyü shahlemlak kü shihnyüke.

¹²Ngeiyü penyüshalei uopüthüi la eteihen shennyak leidaiteke, nükchokyiümok ami ngei jung eshi kesho vennyüke.

¹³Shejao ngei payü nüng kü mon phopnyeih, Oh SHEMBÜPA. Yahhüpü hepak kü, Oh Kahvang, nüngi bampü bhashahshi nyupü hepak kü ngei kü jangshih.

¹⁴Nüngi sheüh-ei ngei nyaühut chongei dungdaipü kübü yangtuh. Ngelei vepathü kübü hatü ilangmong leipü ngei yangtuh.

¹⁵Ngei shak kü yungnyü büng telonghü, nevaijü ilangmongi ngei telümlang, nevaijü mahngshalei ngei tehütük.

¹⁶Ngei kü jangshih, Oh SHEMBÜPA; mehenangkü nüngi bampü ahshi meishi; nüngei phahji changshi nyupü shangshi ngei lemei lepkei.

¹⁷Nüngei chongphobü toueipü nüngei dhe telepdai; mehenangkü ngei shanghah kü nyüpeih, shülangi ngei kü jangshih.

¹⁸Ngei yopailei peikei, ngei angei leituh; ngelei vepathü kübü ngei yangtuh.

¹⁹Ngei ne-ienelempü ponghahpü, veü hatü dhüm neshiüpü eehahpü nüngi nyingei nyüke.

²⁰Ne-ienelem ponghahpai ngelei mongdang mangdaiteke; hanangkü ngei mongshang kü nyunyeih. Ngei kü shinshangphahen yemjü hükao neshiü; nyiushem meiphahen yemjü hükao nedangnyu.

²¹Jomi hahying nangjei leü nemeipü shuohnyüke, hatü ngei yung lejü thiok yung yahphünyüke.

²²Jomei nükdüyü jom shing juong, jomei mongjempathü shing tai leihütuh.

²³Jomi ne-eehen mü jomei mük phüngtüktuh, hatü jomei dokhishüng wong nekoh-i leihütuh.

²⁴Nüng mongshihpü jom kü khapeishuoh, hatü nüngei mangpü monglepi jom mahtüktuh.

²⁵Jomei baümtap lavüngtoiyei leitüktuh, jomei ashakshemei üpayao tenyuhü.

²⁶Mehenangkü nüngi bheishuohpüthü kü jomi shüveinyüke, nüngi ma yahhüpüthü kü jomi nemei-i düknyüke.

²⁷Jom pungpü kü shao pungpü üeishuoh, jom nüng toueipü yangei tetuh.

²⁸Jom yangnyu laitap kübü thittüktuh; daülangpüthü mü jomei men omei tenyang.

²⁹Shejao ngeiyü mongshang, hatü shanghah kü nyüpeih; nüngei yemleipai ngei yangtuh, Oh Kahvang.

³⁰Kesho homei ngei Kahvangei men vihhen, menvih shuohpai ngei büpalei men longhen.

³¹Hapai dhaokhivaung meipü mohohbaong yah-ei moila shuohpü mao nyeishi SHEMBÜPAi mongmeihen.

³²Ponghahpüthüi ha kü veitü mongmeihütuh; am Kahvang yempüthü, ammei mong jatonghütuh.

³³Mehenangkü SHEMBÜPAi nehahneyingpüthüi phoppü dannyeih, hatü khoklatei küppü laophülei nanglak netuhphongnyih.

³⁴Vangsho hatü kahdoki, hatü ilangmongei kamteipü lemphü-i büpa vihtuh.

³⁵Mehenangkü Kahvangi Zion yanghen, hatü Judah chingnyüthü lingei leihen; hatü halei büpalei chongphobüthü nyuei ha lomlanghen.

³⁶Büpa chongphobüthülei hapeüthüi ha mükjüp vaishi danghen, hatü büpalei men kü bampüthü halei chingchingei nyuhen.