Read Phom Naga MENVIH KESHO 71 Bible Online

MENVIH KESHO 71 - Phom Naga bible

MENVIH KESHO 71

¹Oh SHEMBÜPA, ngei nüng kü loinyeih; ngei veü teponghüma.

²Nüng daülangshemshepai ngei kü sheühshih hatü yangshih; ngei kü nüngei dhaong shaangshih, hatü ngei yangshih.

³Nüngü ngei loishing yaongnyü vaikei, ngei yanghen penyüsha vaikei; mehenangkü nüngü ngelei yaongnyü hatü ngelei penyüsha.

⁴Oh ngelei Kahvang, nemeipü amei lak kübü ngei yangshih, shahhing ne-e hatü mangpü shennyakthülei lakmong kübü ngei yangshih.

⁵Oh SHEMBÜPA, nüngü ngelei monglem shing, Oh SHEMBÜPA, nüngü ngei hashih mebü ngei hinglempüba.

⁶Bühhinüng ngei nüng kü nyaangshi nyupeih; Onyülei vom mongeipü ngaipeyü nüng hih. Ngei düngei nüng kü vihhen.

⁷Longi shingvaishi ngeiyü lappü hük nyuhampeih, mehenangkü nüngü ngelei loishing.

⁸Nüng men vihpai ngelei ju maei nyüpeih, hatü nüngei müknyinshekhang jung baongnyüpeih.

⁹Viüdaijü nüngi ngei teyaktük; ngei wong kemdaijü nüngi ngei tetuhphongma.

¹⁰Mehenangkü ngelei vepathüi ngei jühen eteinyüke; jomi ngei khüei thaitü shah shownyüke.

¹¹“Kahvangi yaktükpü hapa shennyak phei changei daiyei yeptuh; mehenangkü büpa yanghen üpayao neshiü” shei jomi eteinyüke.

¹²Oh Kahvang, nüng ngei toueipü taishi telüdai; Oh ngelei Kahvang, nüngi ngei kü sheühhen shülangtuh.

¹³Ngei kü thaüvaüpüthü veühütuh, hatü mahtüktuh. Ngei kü lak shihhen yempüthü, hatü yaüpülungpüthü mongmangi jümhütuh.

¹⁴Shejao ngei payü nedoh-i nüng kü monglemhen, hatü ngei nüng kü anyei anyei vihhen.

¹⁵Ngei hathü nenyingaokjao, ngelei jui nüng daülangpü douthü jung; hatü helushoei nüngei yemleipü douthü nang ehen.

¹⁶SHEMBÜPA Kahvangei ngan jung ngei vih-ei peikahen, nüng monha daülangpü shei ngei vihhen.

¹⁷Oh Kahvang, nüngi ngei kü hashih mebü nyuhpeih, hatü nüngei thamapü douthü jung ngei baonghen.

¹⁸Ngoikahen denja pheiha kü nüngei nganhilong jung ngei mangbaong thahshi, ngei viüei shosho pungdaijao nüngi ngei teyakphongma, Oh Kahvang.

¹⁹Nüngei ngan hatü daülangshemshepü vangshothü ngoinyüke, Oh Kahvang; nüngi longpü douthü longi dükteke, Oh Kahvang, nüng kei üpa nyüpa?

²⁰Nüngi ngei shanghah, hatü vongshüh longi ponghüteke, shejao nüngi ngei kü wong shuohhen, hatü nüngi ngei mahngsha leipao yanglanghen.

²¹Nüngi ngei she leipü mao dhüm kohpüba leihühen, hatü shao ngei nyiushem meihühen.

²²Nüngei shahhing nangkü harp vüngei ngei nüng vihhen, Oh ngelei Kahvang; ngei lyre vüngei nüng kü menvih kesho lokhen, Oh Israel am Daülangpü Hük.

²³Ngei nüngei men longshingkü ngelei jui mongongpai lenhen; mehenangkü nüngi ngelei laangha yangteke.

²⁴Helushoei ngei nüng daülangshemshepü jung ehen, ngei kü lak shihhen khepüthü veüteke hatü mongmangnyüke.