Read Phom Naga MENVIH KESHO 72 Bible Online

MENVIH KESHO 72 - Phom Naga bible

MENVIH KESHO 72

¹Oh Kahvang, nüngi ongpa kü shahhing shahphenhen, hatü cheha kü nüngei daülangshemshepü nyuh-eishuoh.

²Büpai nüngei nanglakthükü daülangshemshepai, hatü taopathü kü shahhingi shahphenhütuh.

³Kahdokei nanglakthü shing mophimo vamhühen, hatü daülangshemshepü nyingei peihen.

⁴Ongpai taopathülei shah jiüshi phenhen; nehahneyingpüthü kü sheühhen, hatü mih kü shüveipüthü ngümtükhen.

⁵Vanghenyü nyaei nyupü thahshi, hatü lennyüi vangngai shuohpü thahshi ngoikahen denshem peü kü nanglakthüi nüng vihhen.

⁶Ongpayü kah kü vang keipü keiha, hatü kahdok kü vanglah haipü keiha nyuhen.

⁷Büpalei den kü daülangshemshepü daei daihen, hatü lennyü vangngai mangmet thahshi chingmeivangmei bhashahshi nyuhen.

⁸Büpa vanglem lempü yungching kübü yungching thahshi, hatü Euphrates yungyen kübü kahdok dohpü ngoishi nyuhen.

⁹Jahpanei nyupü ami büpa kü aümei khümhen, hatü büpalei vepathüi kahdokei lemhen.

¹⁰Tarshish ongthü, hatü shübaongei nyupüthüi büpa kü bom ühhen; Sheba hatü Seba ongthüi thinthothü koei peihen.

¹¹Ongthü peü büpa touei aümei khümhen, jatthü peüi büpa chongphohen.

¹²Mechem nehahneyingpüthüi nyükhen, taopa hatü sheühbü neshiüpüthüi lenhen, büpai jom yangnyeih.

¹³Büpai wong nekohpü, hatü nehahneyingpüthü kü phahjinyeih, büpai taopanangpathü yanglangnyeih.

¹⁴Shüveipü hatü mophicheü kübü büpai jom yanglangnyeih, hatü jomü büpa touei douvang nyüke.

¹⁵Ongpa den lushi nyutuh! büpa kü Sheba hon yah-eishuoh; nedoh-i ngei büpa shing phophen, hatü helushoei ngei büpa shing moihiman yühen.

¹⁶Kahdok kü hahying changshi vamhütuh, kahshangthü kao sheili-i jümhütuh; haleipü betjük Lebanon kei leihütuh; hatü kahdok kü phenha longpükei chingnyüthü künanglak dahütuh.

¹⁷Büpalei men den kü nebetüki nyuhütuh, vanghenyü nyupü thahshi büpalei menmei nyuhütuh. Jatthü peüi büpa kü moihiman danghen, jomi büpa kü mongongpü baonghen.

¹⁸SHEMBÜPA, Israel Kahvang kü moihimantuh, büpai mon thamapü douthü düknyeih.

¹⁹Büpalei müknyinshekhang men den kü moihimantuh; büpalei müknyinshekhangi kahdoknyü peü mahütuh, Amen, Amen.

²⁰Jesselei cheha Davidi phoppü dohnyüpeih.