Read Phom Naga MENVIH KESHO 74 Bible Online

MENVIH KESHO 74 - Phom Naga bible

MENVIH KESHO 74

¹Oh Kahvang, mehekei ham hapakei düngei yakphongnya? Mehekei nüngi haümhahpü mi kü nüngei mongshih awshit vamhünya?

²Nüngi shelei jeyei tuhpü nanglakthü, nüngei mükjüp vaihen nüngi angei leipüthü deih-ei dangtuh. Nüng peiyei nyupü Zion Kahshang deih-ei dangtuh.

³Chemjalak kü mahhen mü nüngei la-i shoupeishuoh; vepathüi phopshemei nyupü lemphü mangtükteke.

⁴Nüngei vepathüi nüngei phopshemei lennyüke; Jomi halei jomei khüamlung haongnyüke.

⁵Jomü püyah shapü am ay noshi pü agtükpükei nyüke.

⁶Jomi ay hatü kaoklak noshi pü-i shangei lingpü shem-ow kemei nihtüknyüke.

⁷Jomi nüngei phopshem awi haptüknyüke, Jomi nüng kü khümpüshem kahdokei dowei sheihtüknyüke.

⁸Jom nyingi, “Hami jom neütükhen” shei enyüke, Jomi kahdok kübü Kahvangei daülangpü shing peü awi haptük.

⁹Halei hamei khüamlung ne-eenyu; sheyü halei thibü neshiü, ha meshük hapakei nyuhen ha nyingpü üpayao ham mü neshiü.

¹⁰Oh Kahvang, hepak meshük vepathüi nüng kü nyihen? Jomi düngei nüngei men yaühen je?

¹¹Mehekei nüngi nüngei lak temlangnya? mehekei nüngei lak leilangnya?

¹²Shejao Oh Kahvang, nüngü aivang den mebü kahdoknyü kü yemleipü dou dükpü Ongpa.

¹³Nüngei wongi yungchingao hantük; nüngi yungching biünyülei shangjingao nihtükpeih.

¹⁴Nüngi Leviathanei shangjingao ngümtük, hatü jahpan kübü yemthü kü ühtük.

¹⁵Nüngi yunglok bhaoei yenhünyeih, nüngi yungnyüao cheptüknyeih.

¹⁶Nyihnüng hatü yanüngü nüngi lingpeih, nüngi lennyü vanghe jomei shingkü lingei tuh.

¹⁷Nüngi kahdoknyü kü viong lingei shuohpeih, nüngi shaonyü hatü ünyü lingpeih.

¹⁸Mekei vepathüi nüng kü yaünya, hatü nelipüthüi nüngei men ne-ienelemnya ha deih-ei dangtuh, Oh SHEMBÜPA.

¹⁹Wong neshiüpü nüngei nanglakthü mangpü vepathü kü tetuhphong; ponghahpü nüngei nanglakthü tebetük.

²⁰Nüngi ham mü lingpü vangpüshuwpü deih-ei dangtuh; Kahdok kü nyakha shangmang shing peülei dehilaoi maei nyüke.

²¹La-i shouptükpü nanglakthü teveühü; taopa hatü nehahneyingpüthüi nüngei men longhütuh.

²²Yaongtuh, Oh Kahvang, hatü nüng nang etuh. Kahvang nenyingpüthüi helushoei nüng kü yaüpü deih-ei dangtuh.

²³Vepathüi mongshih-ei lenpü tebetük, hatü nedoh-i nüngei vepathüi ngeüwong anpü tebetük.