Read Phom Naga MENVIH KESHO 78 Bible Online

MENVIH KESHO 78 - Phom Naga bible

MENVIH KESHO 78

¹Oh ngelei nanglak, ngei nyuhpü kü dhaong shaangtuh, ngelei ju kübü shah kü dhaong meetuh.

²Shahlap eyei ngelei ju kahen; aivang mebü shahjo ngei ekahen.

³Hayü hamei bühipai ephopü hami danei nyingei nyuhampü.

⁴Hami hathü jomei hapeüthü kübü nejolangpih; hami büpalei müknyinshekhang douthü, büpalei wong hatü büpai dükpü yashanpü douthü jung hüshom pheinaü kü ehen.

⁵Büpai Jakob kü shahkung hük lingei shuoh, hatü Israel am kü shahkungnyü temei shuoh. Büpai hamei bühipathükü jomei hühihathü kü nyuhhen,

⁶shejüang hüshom pheinaüthüi ha nyingei shao jomei hapeüthü kü ha nyuhhen.

⁷Hapa keiha jomiyao Kahvang kü hinglemhen, hatü Kahvangei douthü nebetüki büpalei shahkungnyüthü noteihen.

⁸Shejao jomü chebü chepa am kei mong vaanei khüei yaongpü, Kahvang kü jomei mong lanei neshuohpü, nevaijü jomei laanghabüpa kü hingnelempü am nevaihen.

⁹Ephraim ami lahhilaong changshi nyujao vehok nyih jom nyokei leidaihen.

¹⁰Jomi Kahvangei vangpüshuwpü nedük, hatü büpalei shahkung kü kamhen nemong.

¹¹Büpai mehe dük ha jomi betük, hatü büpai jom kühupü yashanyalepüthü betükteke.

¹²Chebü chepa ami eeshi Ijip kahdok, hatü Zoan shingmeijilei büpai yashanpü douthü dükpeih.

¹³Büpai yungching hantüktü ha kü jom homei deishih, hatü yung bham kei shongei yaonghü.

¹⁴Nyihnüng büpai jom phumi mühü, hatü yanüng vangngai awi mühüteke.

¹⁵Büpai bhih kahdokei yaong bhaohütü Kahmong yung ngaiyei shuoh.

¹⁶Büpai yaong kübü yung bhaoei yungyen leiyei yenhüteke.

¹⁷Shejao jomi shao nyeinya büpa khüei jahpanei mang thah.

¹⁸Jomi lümpü hahying yüei jomi jomei mongdangei Kahvang kü dokteke.

¹⁹Jomi Kahvang khüei, “Kahvangi jahpanei hahying shuoh-aokhen je?

²⁰Büpai yaong kü bheitü yungnyü büng keiha yung vamhüjao, büpai laophülei nanglak kü aan hatü phai shuoh-aokhen je” shei e.

²¹Hanangkü mechem büpai ha danpa, büpa mongpuki ma; Jakob khüei aw bahhü, hatü Israel am khüei mongshih vam;

²²mehenangkü jomi Kahvang kü hingnelem, hatü büpai yangpü ngan kü mongnelem.

²³Shejao büpai phumshangthü kü ngeükhüam shuoh, hatü vangsho shadenthü aphü;

²⁴Büpai jomi hahhen vang keiha manna vüshih, hatü jom kü vangsho hahying shuoh.

²⁵Hangkui phongshanei hahying hah; büpai jom kü hahying changshi shom.

²⁶Büpai vangshothü kü heong vanglüki lükhü, hatü büpalei ngani pehe vanglük changtük.

²⁷Büpai jom kü bhihla kei phai shom, molo bhihhiphang keiha outhü shom;

²⁸Büpai hathü jomei baümtapei, hatü jom nyushingei vüshih.

²⁹Jomi ha hahtü mohteke; mehenangkü jomi mehe lüm, büpai ha shuohteke.

³⁰Shejao lümpü heti hüshem shekü jomei julei hah-ei nyushi;

³¹jom khüei Kahvang mongshihpü vam, hatü jom wong kohpüthü jütük, hatü Israel kübü nethethü mahtük.

³²Hapakei pongjao shao-üng jom mang thah; jomi büpalei thamapü douthü kü hingnelem.

³³Hanangkü büpai jomei nyihthü ngü keiha mahtük, hatü jomei bongthü nyempü kü peihhütük.

³⁴Mechem büpai jom jüpa, jomi büpa yemteke; jomi mong lepei büpa touei leiteke.

³⁵Jomi Kahvangü jomei Yaongnyü, Jaipüba Kahvangü jom angei leipüba shei deih-ei dang.

³⁶Shejao jomi jomei jui büpa yawhteke; jomei yeijaangi büpa kü shahshem eteke.

³⁷Jomei mongi büpa kü lanei neshuoh, büpalei vangpüshuwpükü jom hingshangi nenyu.

³⁸Shejao büpa phahji yahyangpai, jomei mang yaktük; hatü jom nemahtüki düngei büpalei mongshih yepei tuh, hatü büpa mongshihpü kemei nevamhü.

³⁹Büpai hathüyü phai, hatü nyokei neleihen vanglük lükei lüdaipü shei deih-ei dang.

⁴⁰Meshükpa jomi jahpanei büpa khüei yaong, hatü büpa mongshanghüpa!

⁴¹Jom leiyei leiyei Kahvang kü dokpeih, hatü Israel amei Daülangpü Hük mongmanghüpeih.

⁴²Jomi büpalei ngan jung mongei deihshi nenyu; nevaijü mepa nyih büpai jom vepathü kübü yangpaleyei neshiü.

⁴³Mechem büpai Ijiplei nyangeihepü hupa, hatü Zoan shingmeijilei yashanpü douthü hupa deihshi neshiü.

⁴⁴Jomi yung neyingaokhen mü jomei yungyenthü iy leihütük.

⁴⁵Büpai jom lühtükhen mü maanhathü, hatü jom lomohhühen lukthü shom.

⁴⁶Büpai jomei sheilithü laonghiyaki hatü jomei lem-ow kübü betjükthü shouk kü ühtük.

⁴⁷Büpai jomei nyalingngupai shüyaongi, hatü jomei bhukjükthü kaongpü nyieni mangtükhü.

⁴⁸Büpai jomei mohohthü baishih vangmang kü, hatü jomei mithü klang vangteng kü shuohtük.

⁴⁹Büpai jom kü büpalei mongpuk, mongshih, mongmang mü jühen nangkü phongshanthü müei shom.

⁵⁰Büpai laophülei mongshih lem ling; büpai jom dihen kübü neyang; shejao chamhilem kü shuohtük.

⁵¹Büpai Ijiplei hashongpathü peü jütük, hatü Ham amei ashakshemei jomei wong kübü shongpü hapeüthü jütük.

⁵²Hapheikü büpai laophülei nanglakthü mi keiha müei lüdai, hatü jahpan homei mi khong keiha müei dai.

⁵³Jom nenyemhen mü büpai jom yangei mülang; shejao yungchingi jomei vepathü lümlang.

⁵⁴Büpai jom büpalei daülangpü kahdok, büpalei lakdah-i neüei yahpü kahshangei müei lei.

⁵⁵Büpai jom toueipü jatthü changtük; hatü büpai jom kü mükjüp vaishi hapa kahdok shuoh, hatü Israel jatthü jomei ashakshemei chingchingeinyuhüteke.

⁵⁶Shejao jomi Jaipüba kü dokteke, hatü büpa khüei yaong. Jomi büpalei vanglemthü nedük,

⁵⁷shejao lemnyong kü daiyei chebü chepa am kei hingnelem; kaokdaipü lahhan keiha monglem neshiüi leidai.

⁵⁸Jomei phuhpü vaümpü shing homei jomi büpa mongshihhü; jomei lajeithüi büpa mongmanghü.

⁵⁹Mechem Kahvangi ha danpa, büpa mongshih-i maei nyu, hatü büpai Israel am chemjalak kü yaktük.

⁶⁰Büpai Shiloh leipü büpa nyushing yakphong, hangkuthü mü büpa nyupü ashakshem tuhphong.

⁶¹Büpai laophülei Vangpüshuwpü Pela shuohhütük, hatü büpalei müknyinshekhang vepaleilak kü shuohtük.

⁶²Büpai laophülei nanglak yani mahhü, hatü büpa mongshihpü laophülei mükjüp yahpüthü kü vamhü.

⁶³Jomei nethethü aw vamei hahtük; jomei nelathüi yiükjing kesho neloknyu.

⁶⁴Jomei ngongpathü yani mah, hatü jomei vaümnyüthüi nethep neyoungnyu.

⁶⁵Hahepak kü SHEMBÜPA shipü kübü keiha paoteke, hampa hük yiüi chokpükei nyuteke.

⁶⁶Büpai vepathü nyokei leitük, büpai jom den kü veü ponghü.

⁶⁷Büpai Josephei ashakshem yaktük; büpai Ephraim jat neje;

⁶⁸shejao büpai Judah jat, büpai bampü Zion Kahshang jeteke.

⁶⁹Büpai laophülei daülangpü shing vangshothü kei shaoshi ling, büpai denshing chongnyiam lingei tuhpü kahdoknyü kei ling.

⁷⁰Büpai büpalei chongphobü David je, hatü mi khaok kübü ngaiteke;

⁷¹büpai mi yomei nyupü kübü Jakob nanglak kü ong vaihen, Kahvang nanglakthülei mi yombü vaihen jepeih.

⁷²Mongdang kangshangpai büpai jom kü jungeilangei yompeih, hatü lahhinlangnyaipü laki jom müpeih.