Read Phom Naga MENVIH KESHO 86 Bible Online

MENVIH KESHO 86 - Phom Naga bible

MENVIH KESHO 86

¹Nüngei dhaong shaangshih, Oh SHEMBÜPA, hatü ngei kü jangshih, mehenangkü ngeiyü taopa, hatü neaoknethangpü.

²Ngelei yangnyu yangei tuhtuh, mehenangkü ngei nüng kü hinglemnyeih; Nüng kü hinglempü nüngei chongphobü yangei tuhtuh. Nüngü ngelei Kahvang nyüke.

³Ngei kü phahjishih, Oh SHEMBÜPA; mehenangkü helushoei ngei nüng kü lenei thepnyeih.

⁴Nüngei chongphobülei laangha mongonghütuh; Oh SHEMBÜPA, ngelei laangha nüng kü ngangei veinyeih.

⁵Mehenangkü nüngü meipü, hatü mang tükpü, Oh SHEMBÜPA, nüng kü nyükpüthü peükü bampü bhashahshi shuohnyüke.

⁶Ngei phoppü kü nüngei dhaong shaangshih, Oh SHEMBÜPA; ngei nüng kü yüei lenpü banglangshih.

⁷Ngei shanghahpü nyih ngei nüng kü nyüknyeih; mehenangkü nüngi ngei kü jangphahen.

⁸Kahvangthü khong kü nüng kei hükao nenyu, Oh SHEMBÜPA, nevaijü nüngei douthü kei lebü meheyao neshiü.

⁹Nüngi lingpü jatthü peü peiyei nüng kü aümei khümhen, Oh SHEMBÜPA, hatü nüngei men müknyinshekhanghen.

¹⁰Mehenangkü nüngü longpü, hatü thamapü douthü düknyüke; nüng monha Kahvang.

¹¹Nüngei lem nyuhshih, Oh SHEMBÜPA, hatü ngei nüngei shahhing kü kamhen; nüngei men kü dhüm shuohhen nehanpü mongdang yahshih.

¹²Ngelei mong kempai ngei nüng kü menvih shuohhen, Oh SHEMBÜPA, hatü ngei düngei nüngei men longhen.

¹³Mehenangkü nüngi ngeikü bampü longi nyüke, nüngi ngelei laangha mahngsha chüpü leipü yangpeih.

¹⁴Oh Kahvang, changmeipüthü ngei khüei yaongnyüke; shennyakthüi ngei jühen yemnyüke, jomi nüng kü dhüm neshuohnyu.

¹⁵Shejao nüngü phahji yahyangpü Kahvang, Oh SHEMBÜPA, mongshihhen youngmü, bampü hatü shahhing epü kü bhashahshi nyüke.

¹⁶Ngei lemei lepkei hatü ngei kü phahjishih; nüngei chongphobü kü wong yahshih; nüng chongphonyülei hapeü yangtuh.

¹⁷Nüngi bampü nyangeihepü hushih, shejüang ngei kü jiühitpüthüi ha eetü veühen; mehenangkü SHEMBÜPA, nüngi ngei kü sheüh hatü nyiushem meihüpeih.