Read Phom Naga MENVIH KESHO 89 Bible Online

MENVIH KESHO 89 - Phom Naga bible

MENVIH KESHO 89

¹Oh SHEMBÜPA, ngei düngei nüngi bampü jung kesho lokhen; ngelei jui denshem peü kü nüng shahhing epü jung baonghen.

²Nüngi bampü den kü chongwongei nyüke, hatü nüng shahhing epü vangshothü kei wongshongi nyüke shei ngei baonghen.

³Ngei jelangpü hük mü vangpüshuwpü hük lingteke; ngelei chongphobü David kü lahtüktih.

⁴Ngei nüngei hühihathü den shing chonglingei tuhhen, hatü denshem peü kü nüngei ong uoshing lingei tuhhen.

⁵Nüngei thamapü douthü kü vangsho ami nyemvih, Oh SHEMBÜPA, nüng shahhing epü jung daülangpüthü thaipü shingei nyem-etei.

⁶Vangsholei nüng mü shetteihen üpa nyüpa, SHEMBÜPA? Vangsholei nyupüthü SHEMBÜPA kei üpa nyüpa?

⁷Daülangpüthü thaipü leiyao nyempü Kahvang, büpa shonei thaipüthü khong kao longpü hatü nyempü.

⁸Oh SHEMBÜPA, Jeiyong Kahvang, nüng kei wong kohpü üpa nyüpa, Oh SHEMBÜPA? Nüng shinei shahhingi maei nyüke.

⁹Nüngi yungching mangpü kao vanglem lemnyüke; hapalei yungmok laukei aongshingkü nüngi ha nenhütüknyüke.

¹⁰Nüngi Rahabü mahng kü kei nihtük, nüngi vepathü nüngeiwong kohpü laki yantükkem.

¹¹Vangshothü hatü kahdokü nüngei; kahdoknyü hatü halei nyupü peü nüngi lingpeih.

¹²Apsha pehe nüngi ling, Tabor hatü Hermoni mongongpai nüngei men longnyüke.

¹³Nüngei lak wong kohshi nyüke, nüng meshük wong kohpüang? Nüngei lakdah shangei annyüke.

¹⁴Daülangshemshepü hatü shahhingü nüngei ong uoshing chongnyiam; bampü hatü shahhing epeyü nüng shekü dainyüke.

¹⁵Kesho lokei nüng kü khümpüthü, hatü nüngei vangngai kü kampüthü mongong, Oh SHEMBÜPA;

¹⁶helushoei jomi nüng kü dunyüke, hatü nüng daülangshemshepü kü vihnyüke.

¹⁷Mehenangkü nüngü jomei müknyinshekhang hatü wong, hatü nüng bampai nüngi ham aokpü danghü.

¹⁸Mehenangkü hamei inyüshungü SHEMBÜPAlei; hamei ongpayü Israel am Daülangpü Hükei.

¹⁹Chem nüngi manghkhang kü eteke, nüngei hinglempü nanglak kü eteke: “Shongnyü veshan hük kü ngei sheühtepih; nanglak khong kübü jepü nethe hük kü ngei ong uoshing shuohtepih.

²⁰Ngei ngelei chongphobü David kü daülangpü mainga nyioei ong vaihen jetepih.

²¹Ngelei lak düngei büpa mü nyuhen, ngelei laki büpa düngei wong kohhühen.

²²Vepathüi büpa neneühühen, nemeipüthüi büpa nemaanhühen.

²³Büpa touei ngei büpalei vepathü ngümtükhen; büpa kü jiühitpüthü jütükkemhen.

²⁴Ngei shahhing epü hatü bampü büpa mü nyuhen, hatü ngelei men kü büpa aokpü danghen.

²⁵Ngei yungching kü büpalei laki, hatü yungnyüthü kübüpalei lakdah phi-i dükhühen.

²⁶Büpai ngei kü, ‘Nüngü ngelei Pa, ngelei Kahvang, hatü ngei yemleipü Yaong’ shei ehen.

²⁷Ngei büpayü ngelei hashongpa, hatü kahdoknyü ongthü khongkü shaopüba leihühen.

²⁸Den kü ngei büpa kü bampü nyuhen, hatü ngei büpa mü vangteipü wongshongi tuhhen.

²⁹Ngei büpalei ong hean den kü linghen, hatü büpalei ong uoshing vangshothü nyupü thahshi nyuhühen.

³⁰Büpalei hapeüthüi ngelei shahkung tuhphongjema, hatü ngelei vanglem aimü nekamjema,

³¹jomi ngelei vanglem kü pungei, ngelei shahkung nedükjema,

³²ngei jomi shaipü kü nyiamlüng noshi hanghihühen, hatü jomi pungpü kü shangponghühen.

³³Shejao ngei bampü büpa toueipü neyahlanghen, nevaijü ngelei shahhing shahshem neleitükhen.

³⁴Ngelei vangpüshuwpü neshaitükhen, nevaijü ngelei ju kübü vamei daipü shahthü neyeiyahen.

³⁵Chem mon hatü den shing ngei ngelei daülangshemshepai lahtüktih; ngei David kü shahshem ne-ehen.

³⁶Büpalei ong hean den kü nyuhen, hatü büpalei ong uoshing ngei touei vanghenyü kei nyuhen.

³⁷Vangshangei düngei denpü shuohpü lennyü kei chonglingei tuhhen.

³⁸Shejao shaang ammi büpa yaktük, hatü tuhphong; ammi jehahpü ongpa khüei am mongshihnyüke.

³⁹Nüngei chongphobü mü vangteipü nüngi mangtükteke; nüngi büpalei hon athen kübhih kü lüptükteke.

⁴⁰Nüngi büpalei bham kemei bentükteke; nüngi büpalei penyüsha mangtükteke.

⁴¹Peihpü leipü peüi büpalei douthü gühlangnyüke; büpayü büpalei chingyowthüi nyiteihen leidaiteke.

⁴²Nüngi büpalei vepathü kü aokpü danghü; nüngi büpalei vepathü peü mongonghüteke.

⁴³Anyei vaishi nüngi büpalei yannah jüngtük, hatü thepju kü nüngi büpa kü nesheüh.

⁴⁴Nüngi büpalei lak leipü lenshuoh yahlangteke, hatü ong uoshing kahdokei vütükteke.

⁴⁵Nüngi büpalei nethe den shohtük; nüngi büpa veüpongi jümhü.

⁴⁶Meshük lushi, Oh SHEMBÜPA, nüng nying hajük jodaihen? Nüngei mongshih aw kei meshük bahshi nyuhen?

⁴⁷Ngelei yangnyu nyih meshük shohpa deih-ei dangtuh; mehe angsha dou shingvaishi nüngi hangku peü lingpa?

⁴⁸Üpai yemmü nyuei dipü ne-eehen? Mahngchongei wong kübü üpa yangaokhen?

⁴⁹Aivang den mü nüngi bampü melei daipa? Nüng shahhing epai David mü lahpü melei tükpa?

⁵⁰Nüngei chongphobü kü mekei ne-ienelemnya, ha deih-ei dangtuh, Oh SHEMBÜPA. Shennyakthüi thaüvaüpü ngei mekei nenaoknya, deihhümao.

⁵¹Mepa homei nüngei vepathüi ne-ienelemnya, Oh SHEMBÜPA, mepa homei jomi nüngi jelangpülei lameen kü yaünya!

⁵²Düngei SHEMBÜPA men longtuh! Amen hatü Amen.”