Read Phom Naga MENVIH KESHO 9 Bible Online

MENVIH KESHO 9 - Phom Naga bible

MENVIH KESHO 9

¹Ngelei mong kempai ngei SHEMBÜPA kü menvih shuohhen; Ngei nüngei thamapü douthü jung ehen.

²Ngei nüng kü mongonghen, hatü mongmeihen; hatü nüngei men vih-ei lokhen, Oh Jaipüba.

³Ngelei vepathü nyokei leidainyeih, jomi huluh shuohtü nüng touei mahdainyeih.

⁴Mehenangkü nüngi ngelei jiüpü hean shahhingi dükteke. Nüngi shahhingi shahphenei ong uoshing kü uoteke.

⁵Nüngi jatthü kü lohteke, nüngi nemeipüthü mangtük; nüngi den kü jomei men thitei yaktükteke.

⁶Vepathü den shing lavüngtoiyei mahtük; jomei chingnyüthü bhiyei yeemtük; jom deih-eiyao nedanghen mü mahdai.

⁷Shejao SHEMBÜPAyü den kü ong uoshing kü uoteke, büpai shahphenhen ong uoshing lingteke.

⁸Büpa daülangshemshepai kahdoknyü shahphennyeih; büpai nanglakthü aihük mü shahphennyeih.

⁹SHEMBÜPAyü ponghahpüthü shingvaishi loishing, shanghah hepak kü joshing meipü.

¹⁰Üami nüngei men nying, jomi nüng kü hinglemnyüke. Mehenangkü Oh SHEMBÜPA, nüngi nüng yempüthü neyakphong.

¹¹Zionlei ong uoshingei uopü SHEMBÜPA kü menvih kesho lokeishuoh; büpalei douthü jung jatthü kü baongeishuoh.

¹²Büpai iy yenshi bhüh yemhahpüthü deih-ei dangnyüpeih; büpai bonghahpüthü lenpü nebetüknyih.

¹³Nüngi ngei kü phahjishih, Oh SHEMBÜPA. Ngelei vepathüi ngei hanghihüpü kü veihümao! Ngei kü phahjishih, hatü dipü penyüsha leipü ngei shüei antuh,

¹⁴shejüang ngei Zion nelathülei penyüshalei ngei nüngei menvih baonghen, hatü nüngi yangphopü kü mongonghen.

¹⁵Jatthüi laophü shohahpü kahsha kü vüteke; jomi haenei tuhpü shang kü jom manteke.

¹⁶SHEMBÜPAyü büpalei shahhingi nyingnyüpeih; hatü nemeipüthüyü laophülei laki linghahpü kü mannyüpeih.

¹⁷Nemeipüthü mahngshalei nyokei shüdainyeih, Kahvang betükpü jatthü peü kemei.

¹⁸Shejao nehahneyingpüthü düngei payü nebetükhen, nevaijü ponghahpüthüi monglempü nemahdaihen.

¹⁹Paotuh, Oh SHEMBÜPA, shennyaki te-aokhü; nüng touei jatthü shahphentuh.

²⁰Jom kü nyempü peihütuh, Oh SHEMBÜPA; jatthüi hamü hangku mon hih shei nyinghütuh.