Read Phom Naga MENVIH KESHO 91 Bible Online

MENVIH KESHO 91 - Phom Naga bible

MENVIH KESHO 91

¹Am üami Jaipüba kü loishi nyunya, üami Jeiyong Kahvangei vangdhüm phangkü nyunya,

²hathüi, “Nüngü ngei loishing, ngelei penyüsha ngei hinglempü ngelei Kahvang” shei ehen.

³Mehenangkü büpai nüng tai kübü hatü dihen din kübü yanghen.

⁴Büpalei yangkaoki nüng unglanghen, büpa jungpai nüng yanglanghen; büpa shahhing epeyü nüngei inyüshung hatü penyüsha.

⁵Nüngi nyak kü nenyemhen, nevaijü nyihnüng lahhan kü nenyemhen,

⁶nyak kü peipü chamhilem, nevaijü heshotapa kübü dipü mahpü kü nenyemhen.

⁷Nüng touei haja dohen, nüngei lakdah lemei haja an dihen, shejao ha nüng yopailei nepeikahen.

⁸Nüngi nüngei müki mon veihen, hatü nemeipüthü hanghipü eehen.

⁹Mehenangkü SHEMBÜPA nüngei loishing; Jaipüba nüngei nyushing leihüpü nangkü,

¹⁰mepa tenao nüng kü nehethen, mehe shanghah-ao am shem yopailei nepeikahen.

¹¹Mehenangkü Kahvangi büpalei vangsho phongshan shomei nüng dailem peü kü yomhen.

¹²Nüngei la-i yaong kü huluh neshuohhen shangmü jomei lakei nüng paümlanghen.

¹³Nüngi mailang hatü biütam kü; mangpü mailang hatü biünyü kü nüngei la-i shouphen.

¹⁴Üami ngei kü bam, ngei jom yanghen; ngelei men nyingpüthü ngei jom yanglanghen.

¹⁵Mechem jomi nyükhen, ngei janghen; shanghah shingkü ngei jom mü nyuhen. Ngei jom yanghen, hatü dhüm huhen.

¹⁶Yangnyu shoshoei angpai ngei jom hüshemhühen, hatü ngelei yemleipü jom kü huhen.