Read Phom Naga KANDOK 11 Bible Online

KANDOK 11 - Phom Naga bible

KANDOK 11

¹Dok gühpü kü SHEMBÜPAi jiühitnyeih, shejao dok jiüshi dokpü kü büpai mongongnyeih.

²Mechem changmeihenshang, veü dangnyüpeih, shejao nenteiaokpü am kü kihikon peinyüpeih.

³Shahhingi daülangpüthü mülangnyeih, shejao lupülempüthüyü jomei mangi mahdainyeih.

⁴Mongshihpü nyih kü mopü nanglei neshiü, shejao daülangpüthüyü dipü kübü yangdainyeih.

⁵Daülangpüthülei lemü eela neshiüi kangshangi nyüke, shejao nemeipüthüyü jomei mangi donyüpeih.

⁶Daülangshemshepai hingshangpü shennyak yangnyüpeih, shejao hingnelempü shennyakü laophülei mang tailok kü manhen.

⁷Mechem mang shennyak hük dihen, büpa monglempü büpa mü mahdainyeih, hatü Kahvang neomi temhahpü peü angkong leidainyeih.

⁸Daülangpüthüyü shanghah kübü yangdainyeih, shejao hapayü nemeipüthüi ponghahnyeih.

⁹Kahvang nenyingpüthülei jui küphü mahtüknyeih, shejao daülangpüthü kihikon homei yangdainyeih.

¹⁰Mechem daülangpüthüi moihiman dangnya, chingnyü kü mongong peinyeih, hatü mechem nemeipüthü mahdaihen, mongongnyeih.

¹¹Daülangpü shennyakei moihiman homei chingnyülonghünyeih, shejao nemeipülei jubenyeijaangi hapa mahtüknyeih.

¹²Üpai mih kü naamei deihnya, büpayü sholi nebaongpü, shejao nyingpü shennyakü nenmü nyunyüpeih.

¹³Langmanshapshüpü shennyaki shahjo eyei longteinyeih, shejao danaokpü shennyaki shahjo jaoei tuhnyeih.

¹⁴Lem hupü neshiüjü kahmük hük dodainyeih, shejao shahnying venpü longi nyujü yanglem nyüpeih.

¹⁵Yenthüng hüki lop luhen kü nüng denbü vaijema, vongshüh kü shühen, shejao ha nedükhen shan leitükjema yanglem nyüpeih.

¹⁶Phahji kohpü nyüha hüki dhüm dangnyüpeih, shejao shahhing kü jiühitpai hai dangnyüpeih. Nehetpü shennyaki aeipü pongnyeih, shejao hahnempü shennyaki mop dangnyüpeih.

¹⁷Phahji yahyang kohpüthüi thintho dangnyüpeih, shejao phahji neshiüpü shennyaki laophü nying lomohnyeih.

¹⁸Nemeipü ami mang lat dangnyeih, shejao üpai daülangshemshepü hainya, hingshangpü thintho danghen.

¹⁹Hingmei daülangpü shennyaki yangnyuyem dangnyeih, shejao üpai mang phei changnya, dilemei dainyüke.

²⁰SHEMBÜPAi mong kaokpüthü kü jiühitnyeih, shejao eela neshiüpüthülei lem kü büpa mongongnyüke.

²¹Ha meishi nyingtuh: Nemeipüthü kü hanghi neshuoh-i nenyukahen, shejao daülangpüthüyü yangdaihen.

²²Sholi neshiüi nela meipeyü ooknyülei shongju kü hon anguti sheptükpü kei nyüke.

²³Daülangpüthüi napükenpeyü mei dangei dohnyüpeih; nemeipüthüi nyakpükenpeyü mongshih-ei dohnyüpeih.

²⁴Shennyak hanei-i nekaungi shuohnyüke, shejao anyei-ang angnyeih; Hanei-i büpai shuohhen jiüpü shümlangnyeih, shejao nechangneshapai maei nyunyeih.

²⁵Mih kü shuohpü shennyaki changshi anghen; Üpai mih kü yung dangkao shuohnya, büpai ha nyokei danghen.

²⁶Üpai hah joei tuhlangnya, büpa kü nanglakthüi thaüvaünyeih, shejao mih kü yupü shennyak kü moihimani jümnyüpeih.

²⁷Üpai düngei mei yemnya, mei-üng dangnyüpeih, shejao ten yempü ami ten-üng dangnyüpeih.

²⁸Üami mop kü monglemnya, büpayü dohen, shejao daülangpüthüyü phenha nipükei angei deihen.

²⁹Üpai laophülei shemong kü shanghah koei peinya, büpayü vanglük kei meheyao nedanghen, hatü ngapathüyü kon kohpüthülei chongphobü vaihen.

³⁰Daülangpüthülei betjükü yangnyu pü; hatü üpai laangha müei leinya, büpayü kon kohpü.

³¹Kahdoknyülei daülangpüthüi jomei lat dangjema, Kahvang nenyingpü mangthüi mekei etü hanghi nedanghen.