Read Phom Naga KANDOK 12 Bible Online

KANDOK 12 - Phom Naga bible

KANDOK 12

¹Üami ungei-aeipü kü bamnya, jomi kihikon kü bamnyüke. Shejao yeanei epü kü jiühitpüthüyü ngapa khih.

²Meipü shennyaki SHEMBÜPAleipü phahji dangnyüpeih, shejao ten tempüthü büpai nyonghünyeih.

³Ten dükpai shennyak hük chonglingei nenyuaoknyih, shejao daülangpüthü mechemao nebhitükaokpih.

⁴Meipü shembünyü hükü bahalei hon athen, shejao veü koei leipü nyü-ü vang shepükei nyüke.

⁵Daülangpüthülei küpjanü shahhing, shejao nemeipüthülei shahhingü lueilemnyüpeih.

⁶Nemeipüthülei shah-ü mih jühen tappükei nyüke, shejao daülangpüthülei shah homei hathü yanglangnyeih.

⁷Nemeipü shennyakthüyü bhiyei yaktüknyeih, hatü shadoh shemtaentüknyeih, shejao daülangpüthülei shemong nedoh-i nyuhen.

⁸Laophülei kihikon aimü shennyak hük kü vihnyüpeih, shejao sholi neshiüpüthüyü ne-ienelemi yakphongnyeih.

⁹Shaang hahhenao neshiüpü kü longpü lehahleimeyü, shemei aa haümtü nyünga panga kei nyupü-üng meipüba.

¹⁰Daülangpü shennyaki laophülei yemhimak kü jungnyüpeih, shejao nemeipüthüi bampeyü ühingpü vainyüpeih.

¹¹Üami shüeinyiükei kah lingnya, hahhen changshi dangnyeih, shejao üami yahlak neshiüpü kü kamteinya, jomphongü ngapathü.

¹²Nemeipüthüi ten dükhen kennyeih, shejao daülangpüthülei tünglang kü betjük jüknyüpeih.

¹³Nemeipü shennyakthüyü laophülei jubenyeijaang homei mangei tailok kü mannyüpeih, shejao daülangpü shennyaki vongshüh kübü yangdainyeih.

¹⁴Nüngei thintho-ü nüngei ju kübü vamei epü kü kohshi nyüke, hatü laophülei laki dükpü shangshi thintho nyüpeih.

¹⁵Ngapathüi düngei jom jiüpükei mon deihnyüpeih, shejao kon kohpüthüi shahhing venpü kü bangnyüpeih.

¹⁶Ngapa hüki ngangahük kü mongshih annyeih, shejao kenhingpü shennyaki yaüpü shah-ao lühtüknyeih.

¹⁷Üami shahhing enya, hathüi shahhing denpü shuohnyeih, shejao shahshem denpai lueilemei enyüpeih.

¹⁸Shahvang jusha nemeipai yani aokpükei ma yahhünyeih, shejao shahmei epai hapa makaw meitüknyeih.

¹⁹Shahhing epü jubenyeijaangi yangnyu shoshoei nyunyeih, shejao shahshem epai denshohvanloh pongnyüpeih.

²⁰Douten dükhen tempüthülei mong kü lueilemhen nyüpeih, shejao chingmeivangmei jung epüthü kü mongongpü nyüpeih.

²¹Daülangpüthüi mehe tenao neheünyih, shejao nemeipüthüyü shanghah-i mon maei nyunyüpeih.

²²Shahshem epü jubenyeijaang kü SHEMBÜPAi jiühitnyeih, shejao hingshangi nyupüthü kü büpai monghahnyeih.

²³Nyingpü shennyakü nenmü nyunyeih, shejao ngapa hüki laophü ngapü shakei bhaiyei ngainyüpeih.

²⁴Dhaümshi dou dükpü ami vanglem lemhen, nehetpü amü aa leshi dou dükhen.

²⁵Mongshangpai monghumpü mahtüknyeih, shejao bampü shah-i mongdhüng vamhünyeih.

²⁶Daülangpü shennyaki küphü kü shahnying enyüpeih, shejao nemeipüthülei lemi jom nyong lemei mülangnyeih.

²⁷Nehetpü shennyaki laophüi lümpü nedangnyih, shejao dhaümshi dükpü ami laophüi yempü dangnyeih.

²⁸Daülangshemshepü lem kü yangnyuyem nyüpeih, hapa lem kü kamjü dipü neshiü.