Read Phom Naga KANDOK 14 Bible Online

KANDOK 14 - Phom Naga bible

KANDOK 14

¹Kon kohpü nyühai laophülei shemong lingnyüpeih, shejao nganyüi laophü nyingi ha mangtüknyeih.

²Kangshangi kampüthüi SHEMBÜPA kü nyemnyüpeih, shejao üpai ten düknya, hapa shennyaki büpa yakphongnyeih.

³Ngapalei shah-i laophülei büm kü hanbhi yühahnyeih, shejao kon kohpülei jubeni büpa yangei tuhnyüpeih.

⁴Melei mohohbaongthü nenyu, puongmong kongdainyeih, shejao mohohbaongei wongi hah changshi vetnyüpeih.

⁵Shahhing denpü shuohpai nelunelemnyih, shejao shahshem denpü shuohpai shahshem vamhünyeih.

⁶Nebahnevaipüthüi angsha kü kihikon yemnyüpeih, shejao danaokpü am shingvaishi nyingpühingpü yoshi dangnyeih.

⁷Ngapü shennyak touei tenyu; mehenangkü nüngi büpalei ju kübü kihikon nedangpih.

⁸Kenhingpülei kihikonü laophü melei dainya, ha nyingnyüpeih, shejao ngapa khongkü ngapai pungei münyüpeih.

⁹Ngapathüi mang thahpü kü mongne-aanyih, shejao kangshangpüthüi Kahvang phahji kü mongongnyeih.

¹⁰Mongdangei shahyaki deihpü, mongongei deihpü kemei laophü nyingi nyingdainyeih, hatü hapa üpaiyao hanlangnüng neaok.

¹¹Nemeipü amei shem mangdaihen, shejao daülangpü amei shem daeishehen.

¹²Shennyak hük kü jiüpükei deihpü lem hük nyüpeih, shejao dohpülei hapai dipü lemei mülangnyeih.

¹³Nyishingkao mong kü tüngei nyunyüpeih, hatü dohpeyü mongshang nyüke.

¹⁴Nemeipüthüyü laophülei doui shangpükei danghen, meipüthüi laophülei doui shangpü thintho danghen.

¹⁵Ngapai lemphüli kü hinglemnyeih, shejao kenhingpübai laophülei lakdük lateen nyingnyüpeih.

¹⁶Kon kohpüthüi ten nyingei haleipü nyaidainyeih, shejao ngapathüi nelinebaongi ha kü shüknyüpeih.

¹⁷Mongshihpü shennyaki ngadounganang düknyüpeih, hatü hapa küpjan tempü am kü jiühitnyüpeih.

¹⁸Ngapü ami ngapü mükjüp dangnyeih, shejao kenhingpü ami nyingpühingpü athen thennyüpeih.

¹⁹Shennyaktenthüyü nemeipü am touei, hatü meipüthüyü daülangpü am touei aümei khümhen.

²⁰Taopathüyü chingyowthüi dangkao yakphongnyeih, shejao shemmeithüi küphü longi dangnyüpeih.

²¹Üpai laophülei chingyow yakphongnya, büpai mang thahnyüke, shejao taopathü kü phahjipüthü moihiman.

²²Nemeipü tempüthü lemnyong kü nedainyu je? shejao üami mei temnya, bampü hatü monglem dangnyeih.

²³Dou kheyei dükpü peüi nanglei dangnyeih, shejao shah mon epai taonyeih.

²⁴Kon kohpüthülei athenü jomei kihikon, shejao ngadounganangü ngapathülei chüyük.

²⁵Shahhing denpü shuohpai yangnyu yangnyüpeih, shejao shahshem denpai lueilemnyüpeih.

²⁶SHEMBÜPA kü nyempai monglempü longpü dangnyüpeih, hatü büpalei hapeüthü shingvaishi loishing vaikahen.

²⁷SHEMBÜPA nyempeyü yangnyu yunglok; shennyak hük dihen tai kübü yangdainyeih.

²⁸Nanglak longi nyupeyü ongpa hükei müknyinshekhang, shejao nanglak neshiüjema ong hük lomohnyeih.

²⁹Nenteiaokpü shennyak hük kü danaokpü longi nyüpeih, shejao lomi mongshihpü shennyaki ngapü shakei hunyüpeih.

³⁰Mong nyiushem meipai büm kü yangnyu shuohnyüpeih, shejao mükhakmongyungpai vangni shetüknyeih.

³¹Üami taopathü kü shüveinya, jom Lingbü kü ne-ienelemnyu, shejao üami nehahneyingpü am kü phahji hunya, Kahvang kü dhüm hunyüke.

³²Nemeipüthüyü jomei douteni vüdainyeih, shejao daülangpüthüyü jom dishingkao loishing dangnyeih.

³³Üpa kü danaokpü nyu, büpalei mong kü kihikon nyüke, shejao hapayü ngapalei mongkü leyei neshiü.

³⁴Daülangshemshepai jat hük phuknyüpeih, shejao mangi nanglak hai danghünyeih.

³⁵Ongpa hüki kon kohpü chongphobü kü mong hahnyeih, shejao büpa mongshihpü hapa hai dou dükpü chongphobüi ponghahnyeih.