Read Phom Naga KANDOK 17 Bible Online

KANDOK 17 - Phom Naga bible

KANDOK 17

¹Shem hük kü depülaopai maei mohitap leimeyü, mongongshi chingmeivangmei kü aanvan hahtü nyupü-üng meipüba.

²Nelinehapü hapeü shangkü kon kohshi nyupü aa hükivanglem lemhen, hatü jeihinaüthü khongkü hük keiha mükjüp hanteihen.

³Hon hi nginü awi doknyüpeih, shejao mongdangü SHEMBÜPAi doknyüpeih.

⁴Shennyaktenthüi ten epü kü bangnyüpeih, hatü shahshem ebüi shahshem shah kü bangnyüpeih.

⁵Üami taopathü kü yaüeilungnya, jomi hathü Lingbü kü yaünyüke; Üami mih lomohpü kü hüha shei deihnya, jom nehanghi-i nenyupih.

⁶Viüpa hük shingvaishi hapeüthüyü hon athen, hatü hapeüthülei müknyinshekhangü jomei nyühipathü.

⁷Shahmei epeyü ngapa hükei dousho nevai; nyeinya vaishi ongpa hüki shahshem ehen nebah-angpih.

⁸Hanei ami yawhdou noteipeyü phongyomteipü keiha deihnyüke; hapai lemphü dükjahen shei hinglemnyüke.

⁹Üpai mih kü mang tüknya, bampü longhünyeih, shejao üpai bhüh yemhen mon deihnya, küphü mü khaat dangnyüpeih.

¹⁰Ngapa hük kü kho hükpa bheitü eteipü meyü kon kohpü shennyak kü chem mon lohshuohpü-üng nyeinya chüpüba nyingnyeih.

¹¹Shennyaktenthüi nemeiteihen mon yemnyüpeih; hanangkü büpa khüei nemeipü phongmokbü shomhen.

¹²Meishi ngadaipü shennyak mü eteipü meyü cheha gühlangtü loh-ei nyupü sheptao pongpü-üng meipüba.

¹³Mei kü ten nyokei shuohpü shennyakei shem kübü mang mechemao neyandaipih.

¹⁴Dehilao pangpeyü yungchüm laipükei nyüke; hanangkü mangde shekü dohtüktuh.

¹⁵Üpai nejiüpü shennyak hük dah shakhünya, hatü üpai jiüpü shennyak-ang nyonghünya, jiji nyiphen SHEMBÜPA touei jiühitbenüng nyüke.

¹⁶Ngapa hüki kihikon nyinghen mong neshiüshiüi, hapa shakhen lop noshi longteipü kü mehe nangleinyüpa?

¹⁷Küphü hük mü hepak peü kü bamteinyeih, hatü jeihinaü-ü shanghah kü sheühteihen bühnyüpeih.

¹⁸Ngapa hüki mon mih-ei bheishe hang shemhen ju shüei lahnyüpeih.

¹⁹Üpai dehenlaohen kü bamnya, büpai mang kü bamnyüke; Üpai shakung shaoshi daongnya, büpai shanghah nyükhahnyüke.

²⁰Mongnyong kohpü shennyaki mechemao angeideiyei nenyunyih; Üpai lueilemei enya, vongshüh kü shünyüpeih.

²¹Üpai hanga bühhahnya, vongshüh dangnyüpeih; hangalei nyühipai mongong nedangnyih.

²²Mongongmonglepü mongdangü meli meipü; shejao tendaipü laanghai vangni ütüknyeih.

²³Nemeipü shennyaki joshi yawhdou yahnyüpeih, hatü shahhing lemthü nyongtüknyeih.

²⁴Yepaokpü shennyaki kihikon kü veinyüpeih; shejao ngapalei müki kahdoknyü dohpü lemei veinyüpeih.

²⁵Hanga hüki pa kü mongshang, hatü hümlungnyü kü shahyak koei leinyüpeih.

²⁶Ten neshiüpü shennyak kü hang hahhen, hatü mübü hüki jiüpü dükpü kü üphen nejiüangpih.

²⁷Nyingpühingpü shennyaki laophülei shah yepyaki enyüpeih, hatü danaokpü shennyaki nenmü nyudainyeih.

²⁸Nenmü nyuküjema ngapa hük kü dangkao nyingpühingpü khih shei deihnyüpeih; Nevapvapi nyuküjema büpa kü nahpü shennyak khih shei deihnyüpeih.