Read Phom Naga KANDOK 21 Bible Online

KANDOK 21 - Phom Naga bible

KANDOK 21

¹Ongpa hükei mongdangü SHEMBÜPAlei lakmongei nyüke; yungyen hük büpai mongpü lemei shanshihpükei mülangnyüke.

²Shennyak peüi laophülei lem-üng jiüpükei deihnyüpeih, shejao SHEMBÜPAi mong doknyüpeih.

³Jakpü moila meyü mehe jiüpü, hatü shahhing nyüpa, ha dükhen-üng SHEMBÜPA touei yahhübenüng nyüke.

⁴Nebahnevaipü mük, hatü changmeipü mongdang nemeipü amei awdükü mang nyüke.

⁵Mong thenei dhaümshi yempü küpjan kü nanglei nyüke, shejao ngangahük kü tempai taohinang lashüh pongnyeih.

⁶Shahshem eshi dangpü mopü ngü laodaipükei nyüke, hatü dihen aethitai.

⁷Nemeipüthülei douteni jomao maoei deilanghen; mehenangkü jomi mehe jiü, ha dükhen nemongnyu.

⁸Pungpüshaipü amei lemü kaokshi nyüke, shejao pungpü neshiüpüthülei lemü kangshangi nyüke.

⁹Depülaopü nyüha hük mü shem hük kü nyulei meyü shinshangei aongei dhetshi nyupü-üng meipüba.

¹⁰Nemeipüthüi düngei ten dükhüei mon nyunyeih; chingyowthüi jom leipü phahji nedangnyih.

¹¹Mechem nebahnevaipüthü hanghihen, ngashi nyupüthüiyao kihikon dangnyüpeih; Mechem kon kohpü shennyak kü nyuhshuohhen, nyinghahpü dangnyeih.

¹²Daülangpü Kahvangi nemeipü amei shem kü shukshi nyunyeih, hatü nemeipü am lomohtüknyeih.

¹³Nüngi taopathüi leneiwongpü kü dhaong neshangjema, nüngiyao lenhen shejao üpaiyao nedanlangphahen.

¹⁴Joei thintho shuohpai mongshih komhünyeih; Ashak mongei yawhdou jaaipai mongshih dohhünyeih.

¹⁵Mechem shahhing dükhenshang, daülangpüthü mongongnyeih; shejao ten dükpüthü kü nyempü peinyüpeih.

¹⁶Üpai danaokpü lem tuhtü lemnyong kü dainya, büpayü dipü khongkü omdainyeih.

¹⁷Üpai mongongmongle kü bamnya, büpa taohen; Üpai yiü hatü jiüpüjaüpü mon lümnya, shemmei neleipih.

¹⁸Daülangpüthü shingvaishi mangthü, hatü hinglempüthü shingvaishi hingnelempüthüyü shojeinanglei leinyüpeih.

¹⁹Mongdang nemeipü hatü depülaopü nyüha hük mü nyulei meyü bhih kahdokei nyupü-üng meipüba.

²⁰Kon kohpülei shemei dounyünangba longi nyunyeih, shejao ngapai büpai angpü kemei changtüknyeih.

²¹Üpai daülangshemshepü hatü bampü yemnya, büpai yangnyuyem, moihiman, hatü dhüm dangnyüpeih.

²²Kon kohpü shennyaki wong kohpü chingnyü hahtüknyeih, hatü jomi mongnyangpü penyüsha bentüknyeih.

²³Üpai laophülei ju hatü yeijaang yepaoknya, vongshüh kübü yangdainyeih.

²⁴Changmeipü hatü nebahnevaipü shennyakei menü, “Venle” hatü büpa ahshi-üng changmeiyei nyunyüpeih.

²⁵Nehetpü shennyaki napükenpeyü vongshüh; mehenangkü büpai dou nedükhünyu.

²⁶Helushoei büpai nyeinya yahhahhüei nyunyeih, shejao daülangpü shennyaki nekaungi shuohnyeih.

²⁷Nemeipü ami moila shuohpeyü jiühitbenüng; ten kohshi koei peijü meshük nemeipü vaihen!

²⁸Shahshem denpeyü mahdaihen, hatü üami ha kü banghenshang den kü dihen.

²⁹Nemeipü shennyaki mahmong longtü dainyeih, shejao daülangpü shennyaki laophülei lem kü kenhingnyeih.

³⁰SHEMBÜPA khüei neüaokhen mü kihikon, yao-aokpü, hatü küpjan meleiyao neshiü.

³¹Koyeiyü vehok nyih shingvaishi temei angnyüpeih, shejao aokpü danghenü SHEMBÜPAleipü peinyüpeih.