Read Phom Naga KANDOK 24 Bible Online

KANDOK 24 - Phom Naga bible

KANDOK 24

¹Nüngi nemeipü vaüei tedeih, nevaijü jom mü nyuhen telüm;

²Mehenangkü jomei mongkü ten dükhen mon temnyüke, hatü jomei ju-i vongshüh vamhühen mon enyüke.

³Kihikoni shemongsha lingnyeih, danaokpai hapa chongnyiam lingnyüpeih;

⁴Nyingpühingpai dungnuk kemei douvang, hatü nethe meipü doui matüknyeih.

⁵Kon kohpü shennyak kü ngan longi nyüpeih, hatü nyingpü shennyakü wong kohpüthü mü nyeipüba;

⁶Mehenangkü vehok hokhen shingvaishi lem hupü nadang; hatü shahnying epü longi nyujü vehok neüaokhen.

⁷Ngapa hük shingvaishi kihikon shah-ü longi shaoshi; noknyü banghthai shingei ju kü shah nevami nyunyeih.

⁸Üami ten dükhen temnya, büpa kü ten ngaibü shei nyükhen.

⁹Ngapalei küpjanü mang, hatü mih vüshih-ei epü küpeüi jiühitnyeih.

¹⁰Baonghok nyih nüng kuidaijema, nüngü mong maanpü shennyak.

¹¹Dihen müei lüdaipüthü nüngi yangtuh; jüshingei müei deilangpüthü yepei tuhtuh.

¹²“Hami ha nang nenyingangpih” shei nüngi ejema, mongdang dokpü Kahvangi hapa ne-eehen je? Nüngei yangnyu yompübai ha nenyinghen je? Shennyak peü kü laophüi dükpü aimü neshuohhen je?

¹³Ngelei hapeü, nyahjiü hahtuh; mehenangkü hayü meiangpeih; nyahdük kübü nyahjiü hahhenü vüngnyangi nyüpeih.

¹⁴Hapa keiha nüngei laangha shingvaishi kihikonü vüngnyangi nyüke; Nüngi ha dangjema, nüng shingvaishi ngoikahen kü monglem nyüpeih; hatü nüng monglempü angsha nevaidaipih.

¹⁵Nemeipü shennyaki daülangpü shennyakei shem bomhen danpükei tenyu; Daülangpüthü nyushingei nüngi iy-aongmako dou tedük;

¹⁶Mehenangkü jom nyetpa dolangmao, jomphong shao-üng paokahen; shejao mangthü vongshüh-i mahkemhen.

¹⁷Ammei vepathüi vongshüh pongküjü “Hüha” shei te-e; Jom huluh shuohküshingkü am mongteong;

¹⁸Hei nevaijema SHEMBÜPAi hapa eehen, hatü mongmanghen, hatü büpa mongshihpü jom lemeipü yaakdaihen.

¹⁹Mang shennyakthü nyupü nangkü nüng mongteshang; nüngi nemeipüthü vaüei tedeih;

²⁰Mehenangkü shennyakten shing ngoikahen monglemneshiü; Shennyak tenei awdük vangngai metdaihen.

²¹Ngelei hapeü, SHEMBÜPA kü nyemtuh, hatü ong kü dhüm shuohtuh; Nüngi üpalei venao nedani tenyu;

²²Henyi pheni ngangahük kü nüng kü vongshüh koei peikahen, hatü henyi-i koei peikahen vongshüh üpai nyinghen?

²³Hathüyü kon kohpübai epü khih: Shahphen shingei baong hanei nopeyü nemei.

²⁴Üami nemeipüthü kü, “Amphong pungpü neshiü” shei ehenshang, nanglakthüi büpa kü thaüvaühen, hatü jati büpa yaktükhen.

²⁵Shejao üami nejiüpüthü kü hanghi shuohnya, mongonghen, hatü jom kü moihiman peihen.

²⁶Shahhing shahnyok shuohpeyü ju kü jüppükeinyüke.

²⁷Phaü dou kemei temtüktuh, hatü nüngei kah temtuh; hapheikü shem vetuh.

²⁸Ten yepaokpü neshiüshiüi nüngei chingyowpa khüei shahshem denpü teshuoh, hatü nüngei jubenyeijaangi lawlüpei te-e.

²⁹“Ngei kü dükphopü keiha ngeiyao mih kü dükhen, jomi mehe dük, ha kü ngei nyokei shuohhen” shei te-e.

³⁰Nehetpü shennyakei kah, hatü ngapalei nyalingngupai kah peih-ei ngei daishingkü;

³¹Hüh-i longei daitü, kahdok kemei thüngi lümlangtü, hatü yaongpe bendaitü eeteke.

³²Ngei mehe ee, ha kü mongshuoh-ei veishingkü haleipü nyinghahpü longpü dangteke.

³³Maani mon shipai, maani mon mükngüh dhaongpai, hatü maani mon nyiumeipai;

³⁴Taopünangpü gühpa kei peikahen, hatü neshiünebaongpü lahhilaong noshi gühpü am kei peikahen.