Read Phom Naga KANDOK 27 Bible Online

KANDOK 27 - Phom Naga bible

KANDOK 27

¹Ngenyihpü nang deih-ei nüng techangmei; Mehenangkü hepaki mehe koei peikahen ha nüngi nenying.

²Lebü shennyakthüi nüng kü nyemvihpha, shejao nüngei jui nevai; Yenpa hüki nyemdupha, nüng nyingi nevai.

³Yaong hatü bhih vihnyüpeih, shejao ngapa hüki koei peipü shanghah-ü nyiphen mao vihpüba.

⁴Mongshihpeyü ahshi mangshi; lohpeyü longi nemei, shejao mükhüh mongyungpü touei üpa yaongaokhen?

⁵Joei bamtei leimeyü ngaiheyei lohteipü-üng meipüba.

⁶Vepa hüki om kü jüppü longi heühen, shejao küphü hüki ma yahphopeyü meipü-üng.

⁷Mechem mohmeihen, nyahjiü dangkao nehahhünyih; shejao aeipü shennyaki shahyakpü dangkao vüngnyangi hahtüknyeih.

⁸Laophülei shem leipü paüdaipü shennyakü ou hük laophülei jep leipü paüdaipü leangpeih.

⁹Vong meipü hatü ayingshüi mongkü mongong peihünyeih, shejao shanghah-i laangha mangtüknyeih.

¹⁰Nüngi nüngei küphü nevaijü ampalei mongjempa teyakphong; Nüng kü vongshüh dhaümkü shingkü jeihinaülei shem yemei tedai; Tailuei nyupü jeihinaü meyü yopailei nyupü chingyowpa-üng meipüba.

¹¹Nüng kon kohtuh, ngelei hapeü, hatü ngelei mongkü mongong koei leikei; Shejüang ngei kü eelapüthü kü shahnyok shuoh-aokhen.

¹²Kenhingpüthüi vongshüh eeyei jodainyeih, shejao neliha hei-üng daiyei ponghahnyeih.

¹³Yenthüng hükei bheishe hang shemhen lahpü shennyakei ashakviha yahlangtuh.

¹⁴Üpai nepnüng lomi paoei laophülei chingyow kü moihimannya, hapayü thaüvaü kei deihtuh.

¹⁵Loh-ei mon nyupü nyühayü vang mangpü nyih nedoh-i vang keipü kei nyüke.

¹⁶Pinnyü kü dohtuh shei eteipeyü vanglük dohtüknüng kheteipükei, hatü mainga kü laki paohteipükei nyüke.

¹⁷Nyiami nyiam yüei nahhüpükei, shennyaki shennyak nahhünyeih.

¹⁸Üpai adhajük kah lingnya, büpai haleipü betjük hahhen; Üpai laophülei shembü kü jungnya, büpa kü dhüm shuohhen.

¹⁹Yungi shennyakei dhe hupükei, shennyakei mongi büpa mekeipü shennyak ha hunyeih.

²⁰Dipü hatü mahpü am nyupü yimching mechemao nemanyih; hapakei shennyakei müki mükmong nemanyih.

²¹Awi hon hatü ngin dokpükei, vihpülüpü dangpai shennyak hük doknyüpeih.

²²Ngapa hük kü hah shüpükei shemshak kü shihtü shüshuohlangmao, büpa kü nyupü nga hapa netükaokpih.

²³Nüngei mithü mehe laphen kü nyüpa ha nyingtuh, hatü nüngei mohohthü kü mong shuoh-ei veituh.

²⁴Mehenangkü angpü deipü düngei nenyunyih, nevaijü ong athen denshem peü shing nevaipih.

²⁵Mechem thüng vetlanghen, phenha shao ninyüpeih, kahshangthü leipü phenha vetlangjü, shao ja neennyüpeih.

²⁶Mithüi nüng ümhen ashak yahphahen, hatü yumthüi kahlei bhei yahphahen.

²⁷Nüng hatü ammei shemong, hatü am chongphopü nelathüi hahhen yum amma changshi nyuhen.