Read Phom Naga KANDOK 3 Bible Online

KANDOK 3 - Phom Naga bible

KANDOK 3

¹Ngelei hapeü, ngei nyuhpüvenpü tebetük; shejao nüngei mongdangei ngelei shahkungthü jaotuh;

²Mehenangkü hathüi vangbong longi nüngei yangnyu shoshoei tuhhen; hatü nüng touei dapüshepü koei peikahen.

³Bampü hatü hinglempü nüng toueipü teyantük; Hathü nüngei üng kü yüklangtuh, hatü nüngei mongdang yaongshung kü nyanglangtuh.

⁴Shejüang nüngi Kahvang, hatü hangku touei bampü hatü menmei danghen.

⁵Nüngei mong kempai SHEMBÜPA kü hinglemtuh, hatü nüngi nyinghahpü kü mongtenyang.

⁶Nüngei lem peü kü büpa nyingtuh, hatü büpai nüngei lem kangshangi lingphahen.

⁷Nüngei müki eepü kü mon nyingpükei tedeih, SHEMBÜPA nyemtuh, hatü mang kübü mong leptuh.

⁸Hapai nüngei büm kü wong, hatü nüngei vang kü wong ja koei peikahen.

⁹Nüngi angpü mophimo-i, hatü nüngei lak kü vampü shongpü betjüki SHEMBÜPA kü dhüm shuohtuh;

¹⁰Shejüang nüngei puongmong maei, hatü nüngei yiüshong kü yiü maei aühkahen.

¹¹Ngelei hapeü, SHEMBÜPAi ungei-aeipü teyakphong, nevaijü büpai yeanpü kü teteng;

¹²Mehenangkü üpa kü SHEMBÜPAi bamnya, büpai hapa shennyak kü pa-i laophüi monghahpü hapeü kü yeanpükei yeannyüpeih.

¹³Üami kihikon, hatü danaokpü kon dangnya, jomphong moihiman!

¹⁴Mehenangkü ngin mao nyeinya nanglei nyüpeih, hatü hon mao meipü nanglei nyüpeih.

¹⁵Pinnyü-ü douvang yaongthü mao douvang, nüngi napü mepaiyao pinnyü mü nesheteiaokpih.

¹⁶Yangnyu shosho pinnyülei ladah philei, hatü pinnyülei lanyong philei mophimo, hatü dhüm nyüke.

¹⁷Pinnyülei lemthüyü mongongmongle, hatü pinnyülei lemshongü chingmeivangmei nyüke.

¹⁸Pinnyü kü shoungpüthü kü pinnyü-ü yangnyuyem pü; Pinnyü kü wongshongi khaaipüthü kü moihimanpü shei nyükhen.

¹⁹Kihikoni SHEMBÜPAi kahdoknyü chongnyiam lingteke, danaokpü koni büpai vangshothü hathülei shing kü tuhpeih.

²⁰Büpalei koni yungchingthü hantük; hatü phumthüi nyien vühünyüpeih.

²¹Ngelei hapeü, kihikon, hatü kenhingmonghapü yaongei tuhtuh, hathü nüng toueipü yanei tedeishih;

²²Hathüyü nüng kü yangnyu, hatü nüngei üng kü bahpü chühiyük vaikahen.

²³Shejüang nüngei lem kü nüngi nenyemi kamhen, hatü nüngei la-i huluh neshuohhen.

²⁴Mechem nüng uohen, nenyemhen; mechem nüng shihen, nüngi mükhet ngoiyei shihen.

²⁵Ngangahük kü nüng lomohhen khih shei tenyem, nevaijü nemeipüthü kü sheüpü vanglükten kü tehan;

²⁶Mehenangkü SHEMBÜPAyü nüng monglemshing, hatü büpai nüngei la tai kübü yangphahen.

²⁷Nüngi dükaokhen mü nüng kü wonghingan nyupü hepak kü, dükshuohhen jiüpü am kü doumei nedüki shoungei tetuh.

²⁸Shaang nüngei lakei nyudaipheikü nüngei chingyowpa kü, “Pheilei peikei, ngenyih yahphüshah” shei te-e.

²⁹Nüng yopailei monghahteishi nyupü chingyow khüei ten dükhen küpjan tetem.

³⁰Nüng kü mehe tenao nedükpü kü üpa mao deyeilaoei tenyu.

³¹Üpteilenteipü shennyakthü kü mükhüh-ei tevei, hatü jomei lem tejehah;

³²Mehenangkü nyongnyongi dükpü shennyak kü SHEMBÜPAi jiühitnyeih; shejao kangshangi nyupüthü kü büpai monghahnyeih.

³³Nemeipüthülei shem kü SHEMBÜPAi thaüvaü hethünyeih; shejao daülangpüthülei shem kü büpai moihimannyeih.

³⁴Changmeiyei naamshah epüthü kü büpai naamnyüpeih; shejao nenteiaokpüthü kü phahji yahyang hunyüpeih.

³⁵Kon kohpüthüi dhüm kohpü menmei dangnyüpeih, shejao ngapai veü dangnyüpeih.