Read Phom Naga KANDOK 30 Bible Online

KANDOK 30 - Phom Naga bible

KANDOK 30

¹Hathüyü Agur, Jakehlei chehai epü kandok shahthü: “Ngei mü Kahvang nenyu, ngei mü Kahvang nenyu, hatü ngei kü sheühphahen üpayao neshiü, hajük khih” shei hapa shennyaki enyüke.

²Hingmei, ngeiyü shennyak nele-i ngadaiteke; ngei kü hangku kü nyubenüng danaokpü kon neshiü.

³Ngei kihikon nenyinghah, nevaijü Daülangpü Hükei jung nyingei neshiü.

⁴Üpai vangsholei aongtü shühpa? Üpai laophülei lakbha kü vanglük thaiyei tuhpa? Üpai laophülei ashak kü yung dungei tuhpa? Kahdoknyü junghijang thahshi üpai lingpa? Büpa hatü chehalei men üpaang? Nüngi nyingei nyujema ngei kü ha eshih!

⁵Kahvangei shah-ü shahjük ieyei shahhing; Büpayü büpa kü loipüthü shing inyüshung.

⁶Nüngi büpalei shah kü hükao te-ü, Hei nevaijema büpai nüng kü lohhen, hatü nüngü shahshem ebü leihen.

⁷Ngei dou lemnyi nüng leipü yünyeih, Oh SHEMBÜPA; ngei dishekü ha neyahpha-i tetuhtük:

⁸Ngei toueipü shahshem hatü peileipü nünglangshih; Ngei taoei tetuhphong, nevaijü shemmei vaiyei tetuhphong, shejao nyihjeih hahying mon ngei kü yahshih.

⁹Hei nevaijema, ngei longi anghen, hatü nüng yakphonghen khih, hatü “SHEMBÜPAyü üpaang?” shei ehen, nevaijü ngei taoei tuhjema ngei gühhen hatü ngelei Kahvangei men dhüm neshiüi leitükhen khih.

¹⁰Chongphobü hüki laophülei shembü kü te-eelahü, hei nevaijema, büpai nüng kao eelahen, hatü hapayü nüngi pungpü vaihen.

¹¹Shennyak hanei-i laophülei pa kü thaüvaüpü, hatü hümlungnyü kü moihiman neshuohpü nyüke.

¹²Shennyak haneiyü müki eeheni daülangpükei, shejao nedaünelangpü kübü neyanpü nyüke.

¹³Shennyak hanei-i hamü longi meipü am; hamü mih mü shaopü am shei deihnyüke.

¹⁴Kahdoknyü kübü taopathü, hatü hangku khongkü nehahneyingpüthü shaaitükhen shingvaishi hanei amei bhayü yan kei, hatü longkhoih kei nahshi nyüke.

¹⁵Opei yiükha nyi nyüke, hatü jiji-i “Yahkei! Yahkei!” shei mon lennyüke. Mechemao hüneshempü doulem jem, hatü “Changteke” shei ne-epü doulem ali nyüke:

¹⁶Mahngchong, nyülanei naü uoshing, yungi hüneshempü kahdok van, hatü “Mohteke” shei ne-epü aw.

¹⁷Mük, mepai laophülei pa kü naamei veinya, hatü laophülei nyüven lenya, kahjilei nyupü ashathüi büpalei mük luklanghen, hatü alangthüi ha hahtükhen.

¹⁸Ngei thamapü doulem jem nyüpeih, hatü ngei nenyingaokpü doulem ali nyüpeih:

¹⁹Phumshangei alang daipü lem, yaongshang kü biü kampü lem, yungching shangkü jahas daipü lem, hatü nyüha pheikü baha hük lüdaipü lem.

²⁰Hapayü mükbongjuyungla hükei lem: Pinnyüi hahtü ju thittüknyüke, hatü “Ngei meheyao mang nedükangpih” shei enyüke.

²¹Kahdoknyüi doulem jem kü kheünyüpeih, hatü doulem ali nedhangaoknyih:

²²Aa hüki ong vaijü, ngapa hük shümoh meijü,

²³Üpaiyao nelümi tuhpü nyüha hük shem yemjü, hatü nyüha aa hüki laophülei shembülanyülei shing kü uojü.

²⁴Kahdoknyü kü maanpü doulem ali nyüke, shejao jomphongi longi kon kohshi nyüke:

²⁵Melaüthü-ü wong nekohpü yemha, shejao jomi shaonyü yangkü jomei hahying thaiyei tuhlangnyüke.

²⁶Viü-ü wong nekohpü yem, shejao jomi yaongsha laetei jom nyushing lingnyüke.

²⁷Shoukthü ong neshiü, shejao jomi khong lingtü dainyeih.

²⁸Khanghayü laki yepaoknyeih, shejao hapayü longshem ongshemei nyunyeih.

²⁹Kamshingkü dhüm kohbenüng doulem jem nyüke, longteiküjü veinyuhüpü doulem ali nyüke:

³⁰Yem khongkü wong kohpeyü mailang, mepa kao nyemei nyokei neleinyih;

³¹Changmeishaw kü kampü oupong, yumbaong, hatü ongpa hük nanglakthü mü kampü ha nyüke.

³²Nüng nyingi vihhah-ei ngadounganang dükei nyujema, nevaijü douten dükhen temhah-ei nyujema, nüngei ju kü laki dhühlangtuh.

³³Amma kü yaakteijü ammacheü vamnyeih, shong kü yüpshuohjü iy vamnyeih, mongshih vampai dehilao vamnyüpeih.