Read Phom Naga KANDOK 6 Bible Online

KANDOK 6 - Phom Naga bible

KANDOK 6

¹Ngelei hapeü, mih-ei bheishe hang nangkü nüngi hanggovih teyah; hapai nüng kü mih-i shashi tetuhhah;

²Nüngei yeijaangi hatü nüngei ju kübü shahthüi nüng kü shashi nyujema,

³Hapa leipü laidaihen shingvaishi ha düktuh; mehenangkü nüngü büpalei wongi shashi nyüke. Büpa touei shülangi peiyei yangshih shei khümeishuoh.

⁴Nüng teshi, hatü mükngüh tedhong.

⁵Sikari shennyak toueipü shaok yangdaipükei, tai kübü ouha yangdaipükei nüng yangdaituh.

⁶Melaü kü veituh, nehetpüthü; hapalei lemthü kü veituh, hatü kon kohtuh.

⁷Jomei mübü, lakchongbü, hatü vanglem lembü neshiü,

⁸shejao jomi shaonyüsha kü hahying yowlangnyüke, hatü hahvet shingkü hahying thailangnyüke.

⁹Nehetpa, nüng nyih meshük hapakei nyuhen? Nüng shipü kübü mechem paohen?

¹⁰Maani shishah, maani mon mükngüh dhongshah; lak kongei chem mon nyiumeishah shei epai,

¹¹Taopünangpü gühpa keiha peikahen; neshiünebaongpü lahhilaong nopü gühpa keiha peikahen.

¹²Yahlak neshiüpü shennyaktenthüi shahshem eyei longteinyeih,

¹³Müki shah eyei, la-i lem yemei, lakjaangi huei,

¹⁴Mongdangei küpjan ten temei, peü lemei shanghah shuohnyüke.

¹⁵Hapa keipü shennyak kü shanghah peihen; kansho hük mong aa kü lingei neaoki ten peihen.

¹⁶SHEMBÜPAi jiühitpü doulem vok, büpa touei jiühitbenüng doulem nyet nyüke:

¹⁷Changmeiyei naammük veipü, shahshem epü yeijaang, mih kü iy-aongshapü lak;

¹⁸Nemeipü küpjan tempü mongdang, mang lemei shülangpü la;

¹⁹Shahshem denpü shuohpü, hatü jeihinaü khongkü neshetnephen ngaihüpü nyüke.

²⁰Ngelei hapeü, ampai epü düktuh, hatü anyüi venpü teyakphong.

²¹Hathü nüngei mongdangei düngei tuhtuh, hatü nüngei üngei yükshi angtuh.

²²Mechem nüng kamhen, hathüi nüng müphahen; mechem nüng shihen, hathüi nüng yomhen; mechem nüng paojahen, hathüi nüng mü eteihen.

²³Mehenangkü shahkungnyü-ü awdük, nyuhpüvenpü hatü ungei-aeihen, yeanei epeyü yangnyu lemshong.

²⁴Hapai nüng mong nehingpü nyüha kübü, hatü vüngnyangi shah eshi lemhaoei heüpü mükbongjuyungla kübü yangphahen.

²⁵Pinnyü nela meipü kü nüngei mongi tevaü, nevaijü pinnyülei mükvang nakungi nüng tengantükhü.

²⁶Büm yupülei lat-ü aan bhaok hük mon, hatü mükbongjuyunglai nüngei yangnyu hahtüknyeih.

²⁷Ashak nehah-i shennyak hüki laophülei shüngdok shangkü awtao haüaokhen je?

²⁸La kü neshami shennyak hüki awtao kü kamaokhen je?

²⁹Hapa keiha mih-ei nyüha mü shipü shennyakü nyüke; Pinnyü kü hongpü üpayao nehanghi-i nenyuhen.

³⁰Aeimu neneni aeipü meihen gühpü shennyakü shennyakthüi nenyingi nenyupih,

³¹Shejao büpa gühpü yephahjema, bükdoushemnang yutao shing nyet hang shemhen.

³²Shejao üpai mükbongjuyung düknya, büpayü ngapa; üpai hapa düknya, büpa laophü nyingi mangtüknyüke.

³³Büpa ma yahhen, hatü hai danghen, büpalei veüpong thittüknüng neaok;

³⁴Mehenangkü mükhakpai baha mongshihhünyeih, hatü büpai bhüh yemshingkü phahji neshiü.

³⁵Büpai hapalei lat neyahhen; meshük shangkü longshi yahshuohjao büpai yawhdou neyahlangphahen.