Read Phom Naga KANDOK 8 Bible Online

KANDOK 8 - Phom Naga bible

KANDOK 8

¹Kihikoni nenyüknyu je? Danaokpü koni ngeüwong neannyu je?

²Lemyangkü, kahshang peü kü, hatü lembaong peü kü pinnyü yaongnyüke.

³Chingnyülei shüpü penyüsha, hatü shadenei pinnyü yaongtü lennyüke:

⁴Oh nanglakthü, ngei amphong kü nyüknyüpeih, ngei hangkuli peü kü lennyüpeih.

⁵Amphong ngapathü, kenhinghen kon yahhahtuh; amphong yoipathü, danaokpü kon yahhahtuh.

⁶Bangtuh, ngei amphong kü ehen shahnying hük nyüpeih, hatü ngelei ju kübü shahhing ephahen:

⁷Ngelei jui shahhing mon enyüpeih, ngelei jubenyeijaangi jiühitbenüng ne-enyih.

⁸Ngelei ju kübü shahthü kemei shahhing khan; hükao kaokpü nevaijü shahshem neshiü.

⁹Danaokpüba shingvaishi hathü kemei jiüshangi; nyingaokpüthü shingvaishi hathü kü pungpü neshiü.

¹⁰Ngin leimao ngei nyuhpü yahhahtuh; meipü hon leimao ngelei nyingpühingpü yahhahtuh;

¹¹Mehenangkü douvang yaong mao kihikonü nyeinya douvang; hatü nüngi napü kenpü mepaiyao pinnyü mü neshetteiaokpih.

¹²Kihikon ngeiyü, kenhingpüthü mü nyunyeih; ngei kü nyingpühingpü hatü yao-aokpü kohshi nyüpeih.

¹³SHEMBÜPA nyempeyü mang kü jiühitpü; ngei changmeipü, mang lem, hatü shahshem epü jiühitnyeih.

¹⁴Kihikon hatü shahhing shahphenpü ngeilei nyüpeih; ngei kü danaokpü kon hatü wong nyüpeih.

¹⁵Ngei-i ongthü vanglem lemhünyeih, hatü vanglem lempüthüi shahhing shahkung linghünyeih.

¹⁶Ngei-i vanglem lempüthü vanglem lemhünyeih;

¹⁷Ngei-i ngei kü bampüthü kü bamnyüpeih, hatü üami ngei yemnya, dangnyüpeih.

¹⁸Ngei mü mophimo hatü dhüm, nemanghen mop, hatü dapüshepü nyüpeih.

¹⁹Ngelei betjükü daülangpü, hon mao meipüba; ngei mehe vamhü, hayü hon mao meipüba.

²⁰Ngeiyü daülangpülei lem kü, hatü shahhing epülei lem kü kamnyüpeih;

²¹Ngei kü bampüthü kü mophimo shuohnyüpeih, hatü jomei puongmong mahünyeih.

²²SHEMBÜPAi aivang den mü lingpü douthü khongkü büpai ngei shong lingpeih.

²³Chongpangei kahdoknyü lingshekü peü mü shongeingei lingpeih.

²⁴Yungchingthü mangnyu shekü, yunglokthü kü yung mangvam shekü ngei shong bühpeih.

²⁵Kahshangthü lingshekü; shangtaothü shingnüngei tuhshekü ngei shong bühpeih.

²⁶Kahvangi kahdok hatü haleipü kahmükthü, nevaijü bhihla hükao manglingi ngei shong lingpeih.

²⁷Mechem büpai vangshothü lingpa, mechem büpai yungchingthü shangkü viong lingpa;

²⁸Mechem büpai shangei phumshangthü wongshongi lingpa; mechem büpai yungching yunglokthü vamhüpa;

²⁹Mechem yungching yungthü kü büpai epü viong mü lenei neaonghen ngeükhüam shuohpa; hatü mechem büpai kahdoknyü chongnyiam lingpa, ngei nyuhampeih.

³⁰Hahepak kü ngei büpa mü mistri hük kei nyuhampeih, hatü ngei nyihjeih büpalei mongong vaihampeih; düngei büpa touei mongongpai nyuhampeih;

³¹Kahdoknyü kü mongongei, hangkuli mü mongmeipeih.

³²Hanangkü shaang, ngelei hapeüthü, ngei epü kü bangtuh: Ngelei lem kü kampüthü moihiman!

³³Ngei nyuhpüvenpü bangtuh, hatü kon kohtuh; nüngi ha teyakphong.

³⁴Ngei epü bangei nyihjeih ngelei shadenei ngei daneinyupüthü moihiman!

³⁵Üami ngei dangnya, yangnyu dangnyüke, hatü SHEMBÜPAleipü phahji yahnyüke;

³⁶Shejao üami ngei nedangnya, jom nyingi ma yahnyüke; Üami ngei kü jiühitnya, dipü kü bamnyüke.