Read Phom Naga KANDOK 9 Bible Online

KANDOK 9 - Phom Naga bible

KANDOK 9

¹Kihikoni pinnyülei shem veteke, hatü ha kü shemnyü nyet haongteke.

²Pinnyüi mo mohen yemhimak jüei yiüao aanteke; pinnyüi ha nüklüngdülei haüteke.

³Pinnyüi pinnyülei nelathü jom nyet shomei chingnyü kü shaopü shingthü kübü nyüknyüke.

⁴“Amphong ngapathü, hatouei peikei!” hatü yoipathü kü pinnyüi,

⁵“Peikei, hatü ngelei hahying hahtuh, hatü ngei aanpü yiü yingtuh.

⁶Amphong nelinehapü tuhphongtuh, shejüang am yem mü nyuhen; nyingpühingpü lem kü kamtuh” shei enyüke.

⁷Üami nemeipü am kü yeanpü shuohnya, nyongei leiyei naamshah ehahnyeih; Üami shennyakten kü lohshuohnya, nyongei leiyei lak hahnyeih.

⁸Nemeipü am kü nüngi teyeantei; büpai nüng kü jiühitphahen; kon kohpü shennyak kü yeaneishuoh, büpai nüng kü bamphahen.

⁹Kon kohpü shennyak kü veneishuoh, büpa nyeinya nahkahen; daülangpü shennyak kü nyuh-eishuoh, büpai nyinghahpü nyeinya ühahkahen.

¹⁰SHEMBÜPA kü nyempeyü kihikon chongpangpü; Daülangpü Hük jung nyingpeyü danaokpü kon chongpangpü.

¹¹Mehenangkü ngei nüngei yangnyu nyih luhühen, hatü bong longi üphahen.

¹²Nüngi najema, nüngei kihikoni nüng kü thintho yahphahen; Nüng nemeipü am vaijema, nüng moni ha kohen.

¹³Nebaongpü nyühai ahshi vapvapnyeih; pinnyü-ü ne-ungne-aeipü; meheyao nenyingpü.

¹⁴Pinnyüi pinnyülei shem shadenei, nevaijü ching kü shaopü dülei uonyüke;

¹⁵Hatü laophü laophü nadang kü daipü leipü peü kü nyükei,

¹⁶“Am ngapathü hatouei peikei” shei pinnyüi sholi neshiüpüthü kü enyüke.

¹⁷“Gühyungü vüngnyangi, hatü joei hahpü hetü monghamshi!”

¹⁸Shejao jomi hapa kü dibenüng nyüpeih shei jomi nenyingnyu, hatü pinnyü touei peipüthü Sheolei nyüpeih shei nenyingnyu.