Read Phom Naga CHONGVENBÜ 1 Bible Online

CHONGVENBÜ 1 - Phom Naga bible

CHONGVENBÜ 1

¹Hathüyü Jerusalemei ong vaihampü Davidei cheha Solomon Chongvenbüi epü shahthü khih:

²“Angsha dok kü angsha shei Chongvenbüi enyüke. Chemjalak kü angsha khih, Lemphüli angsha khih!”

³Vanghenyü phangkü laophüi nyiueinangei dükpü kü hangkui mehe nanglei dangnya?

⁴Denhivan peinyüpeih, hatü hapa peihdainyeih, shejao kahdoknyü lakshing nyunyüpeih.

⁵Vanghenyü aongnyüke, hatü shüdainyüke, hatü heong lemei mokei leidainyeih.

⁶Apshaphi kü vanglük lüknyüpeih, hatü pehephi kü shinei leinyüpeih; Shinei shinei daiyei shao shongpü shingei leinyüpeih.

⁷Shoha kemei yungching kü cheinyüpeih, shejao mechemao yungching nemanyih. Shohathü vampü shingei-üng shao nyokei leidainyeih.

⁸Jui ehen neaoki lemphüli nyiueinanghen mon khih. Eepai mechemao mükmong nema, nevaijü danpü dhaongi mechemao dhaongmong nema.

⁹She-angei mepa nyutepa, shao ha-üng nyukahen, mehe düktüktepa, shao-üng ha dükhen; Vanghenyü phangkü meheyao ja neshiü.

¹⁰“Veituh, hapayü ja khih” shei ehen mü meheyao nyüla? Hapayü jen shekü denshem longi shekü nyuhampeih.

¹¹Aivang den mü nyupü shennyakthü üpaiyao deih-ei nedangnyih; nevaijü mangbüh mangpaümi nyupü kahmong nyemhathüao jom phei kü bühhenthüi jom deih-ei nedangpih.

¹²Ngei, Chongvenbü, Jerusalemei Israel amei ong nyushi,

¹³vangsho phangkü dükpü lemphü kihikon homei yemhen hatü dokei veihen ngei ngelei sholi mongdang kemei lanei shuohtepih. Hapayü hangkuli kü Kahvangi hanggovih shuohpü mon khih.

¹⁴Vanghenyü phangkü dükpü lemphüli ngei eetepih; hathü kemei angsha khih, hatü vanglük phei changteipü mon khih.

¹⁵Mehe kaoktük ha kanghühen neaok; mehe nenyu ha bhei-ie kü shihhen neaok.

¹⁶Ngei nyingi eteke, “Jerusalem kü ngei shekü vanglem lempüthü peü mü ngei-üng kihikon nyeinya dangpeih; ngei nyeishi kihikon hatü nyingpühingpü dangpeih shei deihteke.”

¹⁷Ngei nyingi kihikon hatü ngapüyoipü jung nyinghen shingvaishi mong shuohteke, shejao hapayao vanglük phei changteipü mon khih shei ngei nyingpeih.

¹⁸Mehenangkü meshükpa kihikon nyeinya dang, hajükpa mongshang nyüke; Meshükpa nyeinya nying, hajükpa mongtok nyüke.