Read Phom Naga CHONGVENBÜ 12 Bible Online

CHONGVENBÜ 12 - Phom Naga bible

CHONGVENBÜ 12

¹Nüngei thehila nyihthü kü nüngi nüng Lingbü deih-ei dangtuh; shanghah nyihthü ngoikü shekü, hatü vangbongthü peihdai shingkü nüngi, “Ngei hathü kü mongonghen neshiü” shei ehen.

²Vanghe vangngai hatü lennyü, hatü lithathü manghdai shekü, phum vang mü leidai shekü,

³shem yombüthü kheüdaihen, wong kohpü shennyaki wong neshiüi leidaihen; shaaihen bha maani mon nyupü nangkü hahhüpü nehah-aokhen, hatü lekei ne-ee-i mük wong laaidaihen.

⁴Chingyangshongei ngeümoh ngeüshepü nüngei dhaongi nedanhen; hah shüpü ngeü hatü kesho nyahhai lokpü mahmahmeni mon danhen, shejao ouha-i vaüpü ngeü küang dhaei paohen.

⁵Nüng vakhivien kü kamhen nyemdaihen, hatü nekamneyaongaoki leidaihen. Nüng sheyü shosho pungdaihen; sheyü laknolathan neaoki leidaihen, hatü mehe yahlak hahlakao nena-i leidaihen. Hapheikü shennyakü nedohnetenpü nyuishing yemei lüdainyeih, hatü hapheikü chingyangshongei mahng theppü chongkahen.

⁶Nyiamvü phendai shekü, hatü hon nükshung bhaokdai shekü, yungkukei yungshong lakdük shaidai shekü, yungshong bhaodai shekü,

⁷kahdoki lingpü büm kahdokei leidai shekü, hatü Kahvangi shuohpü laangha büpa touei manglüdai shekü nüng Lingbü deih-ei dangtuh.

⁸“Angsha dok kü angsha khih” shei Chongvenbüi enyeih. “Lemphüli angsha khih!”

⁹Shejao Chongvenbüi monha kon kohpü nevai, büpai nanglakthü kü kihikon nyuhnyüke. Büpai kandok shahthü longi yemei dangei hapalei shahhing dokei veiteke.

¹⁰Chongvenbüi jiüpü shahthü danghen yemteke, hatü büpai shahhing shahthü nyang.

¹¹Kon kohpülei shahthüyü mi yombüi mithü kü atteipü lenshuoh leshi nyüke, hatü thaiyei tuhpü kandok shahthüyü wongshongi appü kojal kei nyüke.

¹²Hathü mü lenei lemhük-üng nyuküjema, ngelei hapeü, lituh. Lai longi nyangpai dohshing neshiü, hatü lai longi iepai büm kü tok vaipü mon.

¹³Shaang lemphüli danteke; lemphüli kü shahshomü hapa khih: Kahvang nyemtuh, hatü büpalei shahkungnyüthü noteituh; mehenangkü shennyakei dousho kempü hapa khih.

¹⁴Mehenangkü Kahvangi joshi nyupü dou, meipü hatü nemeipü dou lemphüli shahphen shingei koei peikahen.