Read Phom Naga CHONGVENBÜ 2 Bible Online

CHONGVENBÜ 2 - Phom Naga bible

CHONGVENBÜ 2

¹Ngei ngelei mongei monghamshi nyuhen, hatü mongongpü hayü mehe shangkü yemei danghen shei deihhahteke. Shejao hapayao angsha khih shei ngei nyingaok.

²“Nyipüwapeyü ngadou, hatü mongongmonglepü kü meheyao nanglei neshiü” shei ngei dangaokpeih.

³Ngei kihikon danghen nyakeikenpai yiü yingtü mongongmongleshi longteihenao kheteke, hatü ngapa kei nyuhenao yemteke. Vangsho phangkü hepak shohük mon nyushingkü hangkui mehe mei dükhen hayao ngei nyinghüei yemtepih.

⁴Ngei dou longpü düktepih. Ngei, ngei shing shemthü ve, hatü ngei shing nyalingngupai sheitepih.

⁵Ngei pethü show, hatü shennyakthü uoei yaonghen, ngahenjahen shing ling, hatü pemongei betjükpü lemphüli sheiteke.

⁶Sheibhaolibhao kü yung shoei langhen shingvaishi yungkukthü kukteke.

⁷Ngei nyüha hatü baha aathü shak, hatü ngelei shemei aathüi aa bühteke; ngei shekü Jerusalemei nyupüthüi angpü peü mü nyeishi ngei mohoh hatü mithü longi angteke.

⁸Ngei, ngei shing hon hatü ngin, hatü kahmükthü kübü ongthülei mopnyümopha kemei thaiteke. Ngei nyüha hatü baha kesho lokbüthü hatü bahai lümbenüng nyüha kemei yahteke.

⁹Ngei shekü Jerusalemei nyupüthü peü mü ngei-üng longpüba, hatü nyeipüba nyuteke; lemphüli dükpü kü ngelei kihikon ngei mü nyu.

¹⁰Ngelei mükhimongi mehe lümei deih, hathü peü ngei dangaok; mongongmongle lemphüli kü ngelei mongdang yepei netuh; ngelei laki dükpü dou kü ngei mongong, hatü hapayü ngei dükpü kü laklei nyuteke.

¹¹Shejao mechem ngei ngelei laki düktükpü douthü, hatü meshük kheyei hathü dükpa shei nyokei veishingkü lemphüli angsha khih, hatü vanglük phei changteipü mon khih; vanghenyü phangkü meheyao nanglei neshiü shei nyingteke.

¹²Hahepak kü kihikon hatü ngapüyoipü mehe shangkü nyinghen ngei yaongteke. Shelei düktükpü mü lenei pheilei jeipü ongpai mehe nyeinya dükaokhen?

¹³Vangnyak meyü vangngai-üng meipü khih, ngadaipü leimeyü kihikon-üng meipü khih shei ngei eeaokpeih.

¹⁴Ngapa hüki vangnyak kü kamshing kü kon kohpü shennyak kü sholi kü mük kohshi nyüke, shejao jiji nyiphen kü aihük lashüh-i dhaümnyüke shei nyingpeih.

¹⁵Hahepak kü ngelei mongkü, “Ngapai mehe heünya, aihük lashüh-i ngeiyao heüshasha khih. Longi nahpai shei ngei mehe nanglei vainüng” shei deihteke. Ngei, ngei nyingi, “Hapayao angsha khih” shei eteke.

¹⁶Mehenangkü ngapa hük betükpü kei-üng nahpü shennyakao betükshasha; ngoikahen nyih kü henyiphen betükshasha. Ngapa keiha nahpü shennyakao didaishasha!

¹⁷Hanangkü ngei yangnyu kü jiühitei deih; mehenangkü vanghenyü phangkü mehe dük, hapayü ngei kü hanghi mon vaiteke; mehenangkü lemphüli angsha, vanglük phei changteipü mon khih.

¹⁸Vanghenyü phangkü ngei dükpü douthü kemei kü ngei jiühit; mehenangkü ngei pheikü peipüthü kü lemphüli tuhphonghen khih,

¹⁹hatü büpayü nahpü nevaijü ngapa vaihen aoküpai nyingpa? Shejao vanghenyü phangkü ngelei kihikoni nyiueinangei düktükpü kü büpai shembü vaihen. Hapayao angsha khih.

²⁰Hanangkü vanghenyü phangkü ngei düktükpü deihshuoh shingkü ngei mong bhagei deihteke.

²¹Mehenangkü shennyak hüki laophülei kihikon, nyingpühingpü hatü lahhinlangnyaipai dou dükhen, hatü büpai hapayü hapa dükhen shei nedeihpü shennyak kü tuhphonghen. Hapayao angsha khih hatü mang longpü khih.

²²Vanghenyü phangkü shennyak hüki dükpü hatü mongshangei nyiutüknangtükpü kü mehe nanglei dangnya?

²³Yangnyu nyih yangkemei kü büpalei dousho-ü tüngpüyapü hatü mongtok mongshangi maei, yanüng dangkao nyiushem nemei-i nyunyüke. Hapayao angsha khih.

²⁴Shennyak hüki hahhen, yinghen hatü laophülei dousho kü monghampü mü lenei meheyao mei nedükaokpih. Hapayao Kahvang leipü peipü khih shei ngei nyingteke;

²⁵mehenangkü büpa neompheikü üpai hah-aokhen nevaijü mongong dangaokhen?

²⁶Kahvangi büpa monghahhüpü shennyak kü kihikon, nyingpühingpü hatü mongong shuohnyeih, shejao mang shennyakü mop thaiyei yowhen hatü Kahvang monghahhüpü shennyak kü shuohtükhen dousho shuohnyeih. Hapayao angsha, vanglük phei changteipü mon khih.