Read Phom Naga CHONGVENBÜ 4 Bible Online

CHONGVENBÜ 4 - Phom Naga bible

CHONGVENBÜ 4

¹Hapheikü shao ngei veishuoh shingkü vanghenyü phangkü shüveiteipü lemphü ngei eeteke. Ngei shüveihahpüthülei mükphi eetepih, hatü jomphong nyiumeihühen üpayao neshiü;

²Shaang thahshi yemmü nyupüthü meyü shelei didaipüthü-üng meipü khih shei deihteke.

³Shejao ha nyi mao meipeyü mangbüh mangpaümpüthü khih. Üami vanghenyü phangkü mang dou dükpü ne-ee, hathü-üng meipü khih.

⁴Hangkui dükpülingpü hatü dangaokpü kemei laophülei chingyow leipü kü mükhühpü nangkü khih shei ngei nyingteke. Hapayao angsha; vanglük phei changteipü mon khih.

⁵Ngapai laophülei lak loktü nyunyeih, hatü laophü nying kü lomoh koei peihahnyeih.

⁶Nyiushem nemei-i lakdang noshi hahlei meyü mong nyiumei kü lakpaoh hük hahpü-üng meipüba, hatü hapayao vanglük phei changteipü mon.

⁷Shao ngei vanghenyü phangkü angsha dou lemhük eetepih:

⁸Hepak hük kü shennyak hük büpa monha, hapeü hatü jeihinaü neshiüi nyu. Büpai mechemao nedoh-i dou mon dük, shejao büpai büpa angpü mop kü mükmong nema. “Üpa kü ühnüng ngei hajükjük dou düknya, ngei mongongshi nyuhen neaoki mehekei ngei nyunya?” shei büpai phehahteke. Hapayao angsha hatü mongmangbenüng dousho khih.

⁹Hük leimeyü nyi-üng meipü khih; mehenangkü nyi-i meipüba dükaoknyüke.

¹⁰Hük dojü küphü hüki phuk-aokhen, shejao monha nyupü am dodaijema, büpa phukhen üpayao neshiü.

¹¹Shao panyi chemi shijema, hangsham pongteinyüpeih, shejao monha shipai mekei etü shaamhenang?

¹²Shennyak hüki khüei yaonglangmao, panyi-i pahük neüaokhen. Vü lem jem yah-ei bhawjema, hapa vülep jiüjiükei nephenaoknyih.

¹³Mih-i shahnying epü neyahpü ngadaipü viüpa hük ong vaileimeyü taolangmao kon kohpü nethe-üng meipüba.

¹⁴Hapa nethepayü khoklat mongeipü vameiyao ong vaihen aok, nevaijü taopa shemong kü bühjao ong uoshing kü uokahen aok.

¹⁵Vanghenyü phangkü lingleipü peüi ongpa kü jeipü nethepa phei müpü ngei eeteke.

¹⁶Ong hüki vanglem lempü phangkü iehen neaoki nanglak nyuhen aok, shejao mechem büpa dohdaihen, üpaiyao büpai dükpü kü monghahpü neshiü. Hapayao angsha khih, hatü vanglük phei changteipü mon khih.