Read Phom Naga ISAIAH 1 Bible Online

ISAIAH 1 - Phom Naga bible

ISAIAH 1

¹Judah kü Uzziah, Jotham, Ahaz hatü Hezekiah hathüi ong vaipü hepak kü Amozlei cheha Isaiah-i Judah hatü Jerusalem nangkü eepü manghkhang.

²Bangtuh, Oh vangshothü, dhaong shaangtuh, Oh kahdoknyü! Mehenangkü SHEMBÜPAi eteke: “Ngei hashihthü haümei laongteke, shejao jomphongi ngei khüei yaongteke.

³Mohoh-i laophülei shembü, gadui laophülei shembüi het ühshing nyingnyüke, shejao Israel ami ha nenyingnyu, ngelei nanglaki ha nedanaoknyu.

⁴Oh mang jatli, mang hanggovih chettü nyupü nanglakthü, mangei lihilathü, ten kü shuohtükpü hühihathü. Jomphongi SHEMBÜPA yakphongteke; jomi Israel amei Daülangpü Hük yaktükteke, hatü büpa toueipü jomei dok lepdaiteke.

⁵Mehekei ammi hajük lak hahhen yemnya? Mehekei ammi nedoh-i khüei yaongnya? Ammei shangjingü makawi madaiteke, ammei mongdang kü mongshangpü nyüke.

⁶Ammei labha kübü shangnyüshang thahshi meipü shing hükao neshiü, shejao aokhahma, ma hatü iy yenpü makaw mon nyüke; Üpaiyao hapa nepaütük, maju kü nesha, nevaijü ha kü meli nenyio.

⁷Ammei kahmük lavüngtoidaiteke, ammei chingnyüthü awi hahtükteke, ammei müki eeshi kung ami ammei kahdok kowtükteke; Kung ami kowtükhinüng lavüngtoiyei leidaiteke.

⁸Zion nelathüyü nyalingngupai kah leipü tap keiha, mokohchong leipü tapshaü keiha vepai shümlangpü chingnyü kei leidaiteke.

⁹SHEMBÜPAi jen hanei dangkao yangei netuhlangmeyü, jenü Sodom hatü Gomorrah am kei nyuhah shepeih.

¹⁰SHEMBÜPAlei shah bangtuh, amphong Sodom am vanglem lempüthü; Jenei Kahvangi venpü bangtuh, amphong Gomorrah nanglakthü!

¹¹Ammi moila hajükjük shuohpai shei ngei mehe vaihen? Moila shuohbenüng mithü, hatü het changshi üh-ei haümpü yemthü changtü nyeishi nyüpeih. Ngei mohoh chebaongei iy, mi iy, nevaijü yum iy kü mongneongnyih.

¹²Mechem amphongi ngei mü pongteinüng peihenshang, hathü koei peikei shei üpai ephopa? Hajük kü ngei nyushingei la teshuopkei.

¹³Yahlak neshiüpü moila koei peiteipü dohdaituh; ammei vong meipü meliyü ngei keyü jiühitbenüng khih. Ammei Lenja Mo, Sabbath, hatü ammei thaihiyu kü ngei tengangke.

¹⁴Ngei ammei Lenja Mothü, hatü ammei monyü moha kü jiühitnyeih. Hathüyü ngei kü hanggovih khih, hatü ngei hathü kü tengangke.

¹⁵Mechem ammi lak haongei phophenshang ngei am toueipü ngelei dhe jolanghen; Ngei am phoppü kü nebanghen; ammei lak iy mon maei nyüke.

¹⁶Am nyingi paütüktuh, hatü daülangi leituh. Am toueipü ammi dükpü doulemthü yaktükkemtuh, ten dükpü dohdaituh.

¹⁷Jiüpü dükhen nyingtuh, shahhing yemtuh, neaoknethangpüthü kü sheühtuh. Hashihhathü kü jiüpü düktuh, vaümnyülei shahphentuh.

¹⁸‘Peikei shaang, jeni chemi deih-ei dangtü eteishah’ shei SHEMBÜPAi enyüke. ‘Ammei mang longi hakshinyulangmao shüdao kei shoshi leidaihen; Ammei mang iyshüm kei hakshi nyujao phümphah kei shoshi leidaihen.

¹⁹Amphongi-üng mongei ven bangjema, amphongi kahdok kü vampü meipü hahhen;

²⁰Shejao amphongi ha yaktüktü ngei khüei yaongjema, amphong mih-ei yannah-i mahhen.’ Mehenangkü SHEMBÜPAlei jui ha eteke.

²¹Mekei hajük monglempü chingnyü büm yupü am kei leidaipa! Chem hepak keyü pinnyü kü shahhingi maei daülangshemshepü nyuhampeih, shejao shaangü shennyak jüpü am leidaiteke.

²²Nüngei ngin kü diü aongdaiteke, nüngei yiüji kü yungi vuktükteke.

²³Nüngei vanglem lembüthüyü khüei yaongpüthü, gühpathülei mongjempathü leidaiteke. Peüi yawhdou kü kennyüke, hatü thintho phei changnyüke. Jomphongi hashihhathü khüamnebaknyu; Shahphen shingei vaümnyüi epü kü nebangnyu.

²⁴Hanangkü SHEMBÜPA, Jeiyong Kahvang, Israel amei Wong kohpü Hüki hapakei enyüke: ‘Oh, ngei ngelei vepathü kü ngelei mongshih khüpei langshuohhen hih, hatü ngelei vepathü kü ngei bhüh yemhen hih.

²⁵Ngei nüng khüei ngelei lak nohen; Nyiamyung heenei daüpükei ngei ammei nedaünelang yaktükhen.

²⁶Sheleipü keiha ngei am kü shahphenbüthü, hatü chongpangpü nyihthü kü keiha shahnying venbüthü nyokei yahphahen. Hapheikü am kü Daülangshemshepü Chingnyü, Monglemaokpü Chingnyü shei nyükhen.

²⁷Zionü shahhingi hatü halei nyupü mong leppüthüyü daülangshemshepai angei leihen.

²⁸Shejao khüei yaongpü hatü mangthü chemi mahtükhen, hatü SHEMBÜPA yaktükpüthü mahtükkemhen.

²⁹Ammi mongongteipü longkhampüthü eejü veükahen, ammi lümei khümteipü pemongthü eeshingkü mongmangkahen.

³⁰Ammü phenlak kaudaipü longkhampü keiha, hatü yung nehaipü pemong keiha nyuhen.

³¹Wong kohpüthüao phenha vanpü keiha vandaihen, hatü büpalei dou mü chemi awlah-i phenha van hahtükpü keiha, üpaiyao hapa aw nemetaoki hahtükhen.’ ”