Read Phom Naga ISAIAH 14 Bible Online

ISAIAH 14 - Phom Naga bible

ISAIAH 14

¹SHEMBÜPAi Jakob kü shinshangei deihhen, hatü shao chem büpai Israel am jehen, hatü büpai jom jomei kahdokei chingchingei nyuhühen. Kung amao jom mü shephen, hatü Jakob phang mü mongjemhen,

²hatü lebü jatthüi jom kü sheüh-ei jomei kahdokei nyokei leihen, hatü lebü jatthüyü SHEMBÜPAi shuohpü kahdokei Israel ammei nyüha aa hatü baha aa vaihen; jom wüpküpei deipüthü peü jomi wüpküpei deihen, hatü jom kü shüveipüthü shak kü jomi vanglem lemhen.

³Mechem SHEMBÜPAi amphong kü tüngpüaipü, shangpong yakying hatü douwong dükpü kübü nyiumei shuohhenshang,

⁴ammi Babylon ongpa khüei hapa naamshah ehen: Mekei mih kü shüveipü shennyak dodaipa! mekei mih kü naampü shennyak dodaipa!

⁵SHEMBÜPAi nemeipü amei lenshuoh nevaijü lüng bhagtük;

⁶mehenangkü büpa mongshihpai nedoh-i nanglakthü kü bheiteke, hatü mongshihpai jatthü kü nephahji-i shüveiyei vanglem lemteke.

⁷Kahdoknyü kemei nyiushemmei kü nenmü nyüke, jomi mongongpai kesho loknyüke.

⁸Awkaongpüthüi hatü Lebanon leipü cedar püthüi dangkao hüha shei mongkü deih-ei, “Sheyü nüngü phangei dodaiteke, üpaiyao sheyü ham agtükhen nepeiküpih” shei enyüke.

⁹Sheoli nüng peijajü pongteihen monghumei omdannyüke; kahdoknyü kü mübü vaihampüthülei yimpi laanghathüi nüng peijapü omdannyüke. Jatthülei ong vaihampüthülei laangha jomei ong uoshing kübü yaongkemteke.

¹⁰Jom peüi nüng kü jangei, “Nüngao ham kei-üng wong nekoh-i leiteke! Nüngao hamphong khongkü hük” shei ephahen.

¹¹Nüngei müknyinshekhang peü, hatü nüngei liping ngeü mahngshalei koei peiküteke; Nüngü jüm-ook shangkü lemshi nyüke, hatü büm kü laongi hoiyei yahtü nyüke.

¹²Nüng mekei etü vangsho leipü vüpa! Oh nepnüng litha, nepnüngei hapeü! Chem jatthü bhih-ei maanei shanshihpü nüng shaang mekei etü kahdokei shüktükpa!

¹³Nüngi nüngei mongei, “Ngei vangsho thahshi longei aonghen; ngei ngelei ong uoshing Kahvangei lithathü shak kü tuhhen; apshaphi Zaphon shangtao daüppülei shahthai shing kahshangei ngei ong uoshing kü uohen;

¹⁴Ngei phumthü dok kü aonghen, ngei nyingi peü mü Shaopüba kei leihen” shei eteke.

¹⁵Shejao nüngü mahngshalei shüdaiteke; kahsha chüpübalei shülangteke.

¹⁶Üami nüng eehenshang jomi nüng kü hingei veihen, hatü nüng kü, “Kahdoknyü kheühüpü hatü ongchingthü jenhüpü;

¹⁷Kahdoknyü kemei bhih kahdok leitükpü, chingnyüthü mangtükkempü, khoklat leipü shennyakthü shemei neleishihpeyü hapa je” shei deihhen.

¹⁸Kahdoknyü kübü ongthü kemei laophü laophülei veinyuhüpü mahngchongei vüshi nyüke.

¹⁹Shejao nüngü nüngei mahngchongei nevü-i langei yaktükpü pükao keiha yakshi nyüke; Nüngü vehok kü mahpü veshanthülei mangi chetei yahtü, hathü mü kahshalei lakhila-i shuopei yakshi nyüke.

²⁰Mehenangkü nüngi laophülei kahmük mangei, laophülei nanglakthü jütükpü nangkü, nüngü lebü ongthü kü kei mahng nevühen. Nemeipü amei lihilayü men mahtükhen — sheyü ne-eteihen.

²¹Chebü chepai pungpü nangkü jomei hühihathü jühen pangtuh; Jom hajük kü kahdoknyü kü vanglem lemhen mü nevamhen, nevaijü jomei chingnyüthüi kahdoknyü kü nejümhen.

²²Ngei jom khüei yaonghen shei Jeiyong SHEMBÜPAi enyüke, hatü ngei Babylon kübü pinnyülei men, aopü shennyakthü, pinnyülei lihilathü hatü hühihathü mahtükhen shei SHEMBÜPAi enyüke.

²³Ngei pinnyü-ü ashühlaongkaong nyushing, hatü yung iishing leitükhen; ngei pinnyü-ü bhangmah lihümbenüng nyüpmaohani maoei yaktükhen shei Jeiyong SHEMBÜPAi enyüke.

²⁴Jeiyong SHEMBÜPAi lahteke: Ngei lingpü keiha hapayü chongkahen; hatü ngei tempü küpjan keiha hapayü jiüshi vamkahen.

²⁵Ngei ngelei kahdokei Assyria am ngümtükhen; ngelei kahshangei ngei büpa la-i shoupei shantükhen. Büpalei kenh ngelei nanglakthü leipü bhühtükhen, hatü büpalei hanggovih jomei bhagchong leipü yailanghen.

²⁶Hapayü kahdoknyü kemei shingvaishi temtükpü küpjan; hapayü jatthü peü hanghihüpü lak.

²⁷Jeiyong SHEMBÜPAi temtükpü kü üpai bangaokhen, Büpai lak shihhen nojü üpai hapa lak leitükaokhen?

²⁸Ahaz ongpa dipü bong hapa shahjang peiteke:

²⁹Oh Philistia am, am kü bheipü nyiamlüng tetdaiteke shei am mongte-ong; Biü hük didaijü ha mü nyeishi nemeipü hük vamkahen; hapalei ati kübü shao leü nemeipü biü sheikahen.

³⁰Taopathü khongkü taopai mi kei phenha ni danghen, hatü nehahneyingpüthüi nyiushem kü nyuhen. Shejao nüngei lihilathü münghishaü homei dikemhen, hatü ngei nüngei aopü shennyakthü jütükhen.

³¹Theptuh, Oh Penyüsha; Youngtuh, Oh Chingnyü; Oh Philistia, am peüi nyemtuh! Mehenangkü apshaphi leipü awshit vamkünyüke, hatü hapayü nyempü neshiüpü veshanthü khih.

³²Philistia leipü peiküpü phongmokbü kü jeni mehe jangei eshuohhen? “SHEMBÜPAi Zion chonglingteke, hatü pinnyü kü büpalei taopa shennyakthüi loishing danghen.”