Read Phom Naga ISAIAH 17 Bible Online

ISAIAH 17 - Phom Naga bible

ISAIAH 17

¹Damaska am nangkü epü shah: “Veituh, Damaskayü hajük kü chingnyü nevaikahen, shejao nyüp shükshing vaihen.

²Aroer chingnyü-ü den kü lavüngtoiyei tuhhen; Üpa kao nenyemi yemhimakthüi lemlemleyei het hahshing leidaihen.

³Ephraim leipü chingnyü pe kemei bendaihen, hatü Damaska amei longhiong ngan mahdaihen. Aram am aopüthü kemei Israel am keiha lomoh ponghen” shei Jeiyong SHEMBÜPAi enyüke.

⁴“Hapa nyih Jakob amei müknyinshekhang mahdaihen; hatü büm kübü cheü kemdaihen.

⁵Hapayü hah vetbüi yaongshi nyupü hah vetpükei, hatü jomei laki Rephaim kahjilei hahmoung mü daklangpükei nyuhen.

⁶Shejao olive betjük vaümshingkü, pümoungei betjük nyi jem tuhphongpükei, betjük pükaolei ali nga aophongpükei, hanei am payü aoei tuhhen” shei SHEMBÜPA, Israel Kahvangi enyüke.

⁷Hapa nyih nanglakthüi jom Lingbü yemhen, hatü Israel amei Daülangpü Hük kü veihen.

⁸Jomi jomei laki linghahpü moidü kü dhüm neshuohhen, hatü jomi Asherah nyüha kahvang kü hingnelemhen, nevaijü jomei laki lingpü ayingshü jakpü moidü kü neveihen.

⁹Hapa nyih jomei wong kohpü chingnyü-ü Israel am kü nyemei nyaidaitü Amor hatü Hiv amei chingnyüthü lavüngtoiyei tuhpükei leidaihen.

¹⁰Ammi ha yemleipü Kahvang betük; ammi am loishing Yaong deih-ei nedang. Hanangkü ammi püthü meipü sheijao, hatü mih leipü nyalingngupai leiyei sheijao;

¹¹ammi sheipü nyih-üng hapa longjao, hatü ammi sheipü nep-üng bong pungjao, hapa kübü betjük nehah-aokpih. Shanghah vongshüh tüngpü aipü mon nyuhen.

¹²Oh nanglakthü mophicheüpü, jomü yungching yungmok keiha ngeü annyüke; Oh jatthüi vaüpü eepü — jomü yungnyümok ngeü keiha nyüke.

¹³Jatthüyü yung longpü ngeü keiha ngeü annyüke, shejao Kahvangi lohshuohjü jom nyaidainyüke. Vanglüki hahbhang kahshang lemei piyei deipükei, nevaijü yinglükpalei-i bhihla piyei deipükei nyüke.

¹⁴Om dhüjü nyempühanpü mon, dhom keyü jom neshiü. Hamei kahmük kübü mophimo aetpüthüyü hapakei ponghahhen.