Read Phom Naga ISAIAH 2 Bible Online

ISAIAH 2 - Phom Naga bible

ISAIAH 2

¹Judah hatü Jerusalem nangkü Amozlei cheha Isaiah kü Kahvangi shuohpü shah:

²Ngoikahen nyihthü kü SHEMBÜPAlei shem nyupü kahshangü, kahshangthü peü mü shaopü vaihen; hatü shangchingthü peü mü shaopüba longei anshihhen, hatü jatthü peü yung yenpükei halei peihen.

³Nanglakthü longi peiyei, “Kei, jeni SHEMBÜPAlei kahshangei, Jakob Kahvangei shemei aongshah. Büpai büpalei lemthü kü kamhen shingvaishi jen kü büpalei lemthü nyuhphahen” shei ehen. Mehenangkü nyuhpüvenpü Zion leipü, hatü SHEMBÜPAlei shah Jerusalem leipü yanei daikahen.

⁴Büpai longpü jatthü aa kübü shah phenhen, hatü nanglakthü depülaopü dohhühen. Jomi jomei yanluthü hanshong vaiyei penglanghen, hatü jomei phungthü ajap vaiyei juplanghen. Jat hüki hük khüei nehokhen; hajük kü hokhen netemhen.

⁵Peikei, Oh Jakob shem am, jeni SHEMBÜPAlei vangngai kü kamshah.

⁶Nüngi nüngei nanglak Jakob am phang tuhphongteke. Hih, jomü heongphi leipü thibüthüi maei nyüke, hatü Philistia am keiha lashüh dokpüthü maei, hatü kung shennyakei vanglemthü kü lakhüngei düknyüke.

⁷Jomei kahdokü hon hi ngini maei nyüke, hatü jomei mop dohshing neshiü; Jomei kahdok kü koyei mon maei nyüke, hatü koyei kharithü dohshing neshiü.

⁸Jomei kahdokü lajei mon maei nyüke; jomi jomei laki lingpü douthü kü aümei khümnyüke.

⁹Hanangkü shennyakthü peü bhih-ei maantüktuh, hatü lomoh aühaühütuh, hatü nüngi hathü kü mang tetük.

¹⁰SHEMBÜPA kü nyemei, hatü büpalei müknyinshekhang kü keüei, yaongnyü longpü mongei shütuh, hatü kahmongei dungdaituh.

¹¹Shennyakthülei bhongeingampü mük dohtükhen, hatü hangku changmeipü bhih-ei maantükhen; hatü SHEMBÜPA mon hapa nyih longei anshihhen.

¹²Mehenangkü changmeipü hatü ngei longpeih shei deihpüthü, hatü shaoshi longei aongpüthü khüei SHEMBÜPAlei nyih hük nyüpeih, hatü jom peü bhih-ei maantükhen;

¹³Mehenangkü Lebanon leipü shaopü cedar püthü, hatü Bashan leipü longkhampüthü khüei,

¹⁴shangdü keipü kahshangthü, hatü shaopü shangtaothü peü khüei,

¹⁵shaopü shangdüthü peü, hatü penyü showpü bhamthü peü khüei,

¹⁶Bhei leihpü Tarshish leipü jahas peü, hatü veinyuhüpü lakdouthü peü khüei nyüpeih.

¹⁷Shennyakthü bhongeingampü dohtükhen, hatü hangku changmeipü bhih-ei maantükhen. Hapa nyih SHEMBÜPA mon longei anshihhen.

¹⁸Lajeithü chemjalak kü mahdaihen.

¹⁹SHEMBÜPAi kahdoknyü jenhühen yaongpü nyih, büpa kü nyemei hatü büpalei müknyinshekhang kü necha-aoki, shennyakthüi nyaiyei yaongsha hatü kahsha yemei daihen.

²⁰Hapa nyih shennyakthüi jomi khümteipü hon hi ngin, lajeithü, humhalache, hatü abakthü touei shükphonghen.

²¹SHEMBÜPAi kahdoknyü jenhühen yaongpü nyih, büpa kü nyemei hatü büpalei müknyinshekhang kü necha-aoki, shennyakthüi nyaiyei yaongshalei shühen, hatü bhaokei kapü yaong aalei shühen.

²²Ngü mon heetü didaihen nyupü hangku kü mongtelem, Büpa kü mehe monglemhen shangpü nyüpa?