Read Phom Naga ISAIAH 22 Bible Online

ISAIAH 22 - Phom Naga bible

ISAIAH 22

¹Hapayü Manghkhang Kahji nangkü epü shah: Am peü shem adokei aongei nyuhen mü mehe shanghah pongpa?

²Chingnyü kemei bukpüshaanpü, vaüpü eepü hatü moppücheüpai maei nyüke. Ammei nanglak mahpeyü yani, nevaijü vehok kü mahpü nevaiang.

³Ammei vanglem lembüthü peü chemi nyaidaiteke. Lahhilaong nekapkapi jom peü yeplangteke. Vepathü tailuei tuhtü nyaiyei daijapü nangkü yeppü am peü khoklatei chemi tuhteke.

⁴Hanangkü ngei eteke: “Ngei toueipü nyokei lüdaituh; ngei shahyaki thepshah. Ngelei nanglakthü mahdaipü kü ammi ngelei mong nyiushem meihühen tekhe.

⁵Manghkhang Kahjilei shangponghen, vepai neühahhen hatü nyemhen nyih hük SHEMBÜPA, Jeiyong Kahvangei lakei nyüke. Chingnyü bhamthü laamtükhen, hatü kahshangthülei sheühpü yiüei lenhen.

⁶Elam ami lahhan tuw shihtü koyei kharithü hatü koyeithü müei peiteke, hatü Kir ami inyüshung temei peiteke.

⁷Ammei kahji meipüthü kü koyei kharithü mon maei nyuteke, hatü koyei veshanthüi chingnyü penyüsha khüamlang;

⁸Judah am yanglem neshiüi leidaiteke.” Hapa nyih ammi Phaü leipü Ongshemei lahhilaong kü veiteke;

⁹David Chingnyü kü veyom shing longi mangdaitü ammi eeteke; ammi Maipa Yungkukei yung yowei tuhteke.

¹⁰Ammi Jerusalemei shemthü ieteke, hatü chingnyü bham linghen nangkü shemthü benteke.

¹¹Ammi bham hi bham nyi aa kü Yungkuk Changpa kü yung yowhen shingvaishi yungkuk lingteke, shejao üpai hapa lingpa, büpa kü ammi nevei, nevaijü shelei üpai hapa küpjan lingpa, büpa kü ammi ne-ienelem.

¹²“SHEMBÜPA, Jeiyong Kahvangi hapa nyih am kü thephen younghen, hatü sho chaei kuptüktü dhoila ashak ümhen nyükteke.

¹³Shejao ha nangjeiyei mohoh, hatü mi jütü hahyingei, yiü yingei mongongmongleyei moeitapei, ‘Jeni hahshah, yingshah, jen ngenyih didaihen’ ” shei eteke.

¹⁴Jeiyong SHEMBÜPAi ngelei dhaongi danshi hapa shakei vamei eteke: “Am dihen nyih thahshi hapa mang tükei neaokpih” shei SHEMBÜPA, Jeiyong Kahvangi enyüke.

¹⁵SHEMBÜPA, Jeiyong Kahvangi hapakei enyüke: “Daituh, hatü ongshem kü khei vaipü Shebna kü ha etuh:

¹⁶Nüngü üpa hih shei deihnya, hatü nüng shing hapa yaongvak shangchingei mahngchong linghen, hatü laophü nyushing yaong vaüpei linghen mehe jiüpü nyüpa?

¹⁷Leituh, SHEMBÜPAi nüng kü wongmü shümhen, hatü yaktükhen.

¹⁸Nüngü nyeikaung kei toilangi nuitü longpü kahmükei yaktükhen; halei nüng dihen, hatü nüngei nethe meipü koyei kharithü halei nyudaihen. Oh laophülei shembü mongmanghüpeyü nüng khih!

¹⁹Ngei nüngei office leipü nüngtükhen, hatü nüngei dousho kübü shüei vütükhen.”

²⁰Hapa nyih ngei ngelei chongphobü Hilkiahlei cheha Eliakim kü nyükhen,

²¹hatü ngei büpa kü nüngei ow owhühen, hatü büpa kü nüngei bhag-ai ow owhühen, hatü nüngei wong büpa kü shuohtükhen. Büpai Jerusalemei nyupüthü hatü Judah am phang kü pa vaihühen.

²²Ngei büpalei bhagchong kü David am phangei sabi sheühen; büpai mehe aptük, ha üpaiyao neküp-aokhen, hatü mehe büpai küptük, ha üpaiyao ne-apaokhen.

²³Meipü shingkü phaak haongpükei ngei büpa wong kohhühen, hatü chepalei mükhiphang kü büpayü dhüm kohpü ong uoshing leihen,

²⁴hatü chepalei mükhiphang kübü müknyinshekhang kemei büpa aong kü nyuhen; jomei moihiyang hatü kahmong nyemha kemei, dükhiüm, nükshung pati maanpü kübü longpü thahshi büpai veihen.

²⁵SHEMBÜPA, Jeiyong Kahvangi, “Hapa nyih kü meipü shingkü phaak meipü haongpükei nyupeyü juwdaihen, hatü laamdaihen, hatü hapa kü sheüpü hanggovih hajük kü dohpü vaihen” shei eteke.