Read Phom Naga ISAIAH 23 Bible Online

ISAIAH 23 - Phom Naga bible

ISAIAH 23

¹Hapayü Tyre nangkü epü shah: Theptuh, Oh Tarshish am jahas müpüthü, ammei Tyre kahdok jahas yaongshing mangtükteke. Am Cyprus leipü leishingkü hapa shahjang danteke.

²Nenmü nyutuh, Oh yungching yungkungei nyupüthü, Oh Sidon am bhei leihpüthü, ammi shennyakthü yungching

³homei Shihor amei hah hi aung, Ijip amei vang kübü vampü hahying shakei, yuei jatthü peü mü bhei leihhen shomteke.

⁴Veütuh, Oh Sidon am, mehenangkü yungching ilangmongi, hatü yungching penyüsha-i am kü hapakei eteke: “Ngei mechemao vom kü tüngei nenyu hatü hapeü ne-ang. Ngei mechemao yeshangha nehaüm, nevaijü yiükha jungei nelaong.”

⁵Mechem hapa shahjang Ijip ngoihenshang, jomi Tyre amei shahjang danei mongkü tünghen.

⁶Tarshishlei yanglem yemei nyaituh, theptuh, Oh yungching yungkungei nyupüthü.

⁷Aivang mebü agei nyupeih shei ammi hapa chingnyü nangkü mongongnyu je? Halei nyupüthü tailu kahdokei nyuhen müei nedaiangpü je?

⁸Longhiong chingnyü, bhei leihpüthü peü longha ongnaü mon, hatü kahdoknyü kü men-e shennyakthü mon nyupü chingnyü Tyre khüei üpai hapa tempa?

⁹Jeiyong SHEMBÜPAi changmeipü müknyinshekhang peü maantükhen, hatü kahdoknyü kü men-e shennyakthü veühühen shingvaishi tempeih.

¹⁰Ammei kahdokei leihümao, Oh Tarshish nelathü, am yangphahen üpayao neshiü.

¹¹SHEMBÜPAi yungching shangkü lak haongteke, hatü ongchingthü kheühüteke. Büpai Phoenicia amei penyüshathü bentükhen shei ngeükhüam shuohteke.

¹²“Hajük am mongong monglehen napü neshiü, Oh pai mü ngühpü Sidon nelathü sheyü ngümtükteke; Am layaongei Cypruslei heihjao haleiyao nyiumei neshiü” shei büpai eteke.

¹³Babylon amei kahdok kü veihümao, hapayü Assyria ami nevai, Babylon ami Tyre kahdokü phaüyemthü nyuishing leitükpeih; jomi ching shümtü shangdüthü lingpeih, jomi penyüshathü bentüktü chingnyüyü chingkong leitükpeih.

¹⁴Theptuh, Oh Tarshish am jahas müpüthü; ammei penyüsha bentükteke.

¹⁵Hapa nyih mü pangei ongpa hükei den hük bong pejempüan thahshi Tyre betükhen. Bong pejempüan pheikü mon büm yupü amei kesho kü epükei Tyre am kü ha vamhen:

¹⁶“Harp hük notü chingnyü kü longteituh, Oh büm yupü nüng deih-ei nyemdangnüng, harp vüngei kesho meipü lokei longteituh.”

¹⁷Bong pejempüan pheikü SHEMBÜPAi Tyre thümhen, hatü pinnyüi shao kahdok shak kübü ongchingthü peü mü bhei leihhen.

¹⁸Pinnyülei dounyünangba hatü latpü lop kemei SHEMBÜPA kü lanei shuohhen; jomi hapa jaoei netuhhen, shejao SHEMBÜPA chongphopüthü shingvaishi hahying hatü ashakviha shakhen nangkü hapa mop noteihen.