Read Phom Naga ISAIAH 26 Bible Online

ISAIAH 26 - Phom Naga bible

ISAIAH 26

¹Hapa nyih Judah kahdokei hapa kesho lokhen: Jenei chingnyü wong kohshi nyüke; Kahvangi aokpü dangpeyü bham shaungpükei, hatü kahdok shaopülei lingei nyüke.

²Hinglempü nyupü daülangpü jatthü shühen shingvaishi shaden apshih.

³Üami mongdangi nüng kü hinglemnya, nüngi jom den ngoipü chingmei kü tuhnyeih; mehenangkü jomi nüng kü hinglemnyüke.

⁴Den kü SHEMBÜPA kü hinglemtuh; mehenangkü SHEMBÜPA, Jeiyong Kahvangü nedohnetenpü loishing Yaongnyü.

⁵Büpai shaopülei nyupüthüao maanpü leitüknyeih; büpai kahshang kübü chingnyüao kahdok kü jeetshi chongei shüei shannyüpeih, hatü kübhih kü dungtüknyeih.

⁶Hanghiyei nyupüthüi hatü taopathülei la-i hapa kü shouptüknyeih.

⁷Daülangpüthülei lemü lemnyeü meishi, hatü hingshangpüthülei lemü nyülüki nyüke.

⁸Oh SHEMBÜPA, nüngei shahkungnyü lem kü kamei hami nüng omdannyeih; nüngei men hatü nüngei menmeiyü hamei laanghaiyahhüpü.

⁹Ngelei mong kü yanüng nüng young leyei peikünyeih; nepnüng ngelei laanghai nüng ongyangei deihkünyeih. Mechem nüngei shahphenpü kahdoknyülei peiyei nyunya, kahdoknyülei nyupüthüi shahhing ehen nyingnyüke.

¹⁰Nemeipüthü kü phahji hushuohjao jomi jiüpü dükhen nenyingnyu; daülangpüthü nyupü kahdokei dangkao jomi ten düknyüke, hatü SHEMBÜPAlei nganhilong kü ne-ienelemnyu.

¹¹Oh SHEMBÜPA, nüngei lak haongjao, jomi ha ne-eenyu. Nüngi laophülei nanglak kü nyakpükenpü jomi nyem-ee, hatü hai danghütuh. Nüngi laophülei vepathü shing yaongei tuhpü awi jom hahtükhütuh.

¹²Oh SHEMBÜPA, nüngi ham kü chingmeivangmei lingshih; hami dükaokpü peü kemei nüngi dükpü douthü mon.

¹³Oh SHEMBÜPA, hamei Kahvang, nüng mü lenei lebü shembüthüi ham kü vanglem lemteke, shejao nüngei men kü mon hami dhüm shuohnyeih.

¹⁴Hathüyü shaangü didai, hatü yemmü nenyu; didaipü hapa laanghathü yangei neleinyu. Nüngi hathü kü hanghi shuoh, hatü lomohhü; hathü deih-ei nedanghen mü nüngi jomei mongdeihthittük.

¹⁵Nüngi jat longhü, Oh SHEMBÜPA; nüngi jat dahü. Nüngi laophü shing müknyinshekhang dangteke; nüngi kahdok kübü viong dahüteke.

¹⁶Oh SHEMBÜPA, shanghahpü nangkü jomi nüng yemteke; mechem nüngi jom kü lohshuohpa, jomi nümei dangkao phopnyüke.

¹⁷Nyüha hüki büm nekongi naü bühhen hepak kü tüngpü nangkü vaüpü eepü keiha, hamao nüng touei hapakei nyupeih, Oh SHEMBÜPA.

¹⁸Hamü büm nekongi nyupeih, tüngpai vaüei nyupeih, shejao hami vanglükang bühpeih. Hami kahdoknyülei vehok neneü; hami meheyao aokei dhangei nenyu.

¹⁹Shejao nüngei nanglakthü didaipü yem leikahen, jomei büm yangei leikahen. Oh mahngchongei shishi nyupüthü, paotuh hatü mongongpai kesho loktuh. Nyieni nepnüng dhom mü kahdoknyü thahümahüpü keiha, SHEMBÜPAi shelei didaipüthüao yem leihühen.

²⁰Ngelei nanglakthü, sha küpei ammi laophülei dungei shüdaituh; Kahvang mongshihpü mangpeih thahshi am kanja jodaituh.

²¹Kahdoknyülei nyupüthü kü jomei mang nangkü hanghi shuohhen shingvaishi SHEMBÜPAi büpa nyushing leipü vamei daikünyüke. Kahdoknyüi pinnyü shak kü iy yenpü küpei neaokhen; pinnyüi mahpüchahpüthü joei neaokhen.