Read Phom Naga ISAIAH 28 Bible Online

ISAIAH 28 - Phom Naga bible

ISAIAH 28

¹Oh Ephraim am changmeipü, nükchokyiümokpü, hetmei hah-ei yiü leü kü chübongale mü ngüphivang meipü kü changmeipüthü onyükei!

²Veituh, SHEMBÜPAlei wong kohpü pahük nyüke. Hapayü shü ompü vanglük, hatü yingtetlongshaipü vanglük kei wong kohpü yinglükleisho, hatü bünghiyang lenhüpü vang keiha büpalei laki hathü kahdokei shomhen.

³Nükchokyiümokpü Ephraim am shingvaishi changmeipü chüyükü mih-ei la phangei shuophahpü ha vaikahen.

⁴Chü kaudaipü keiha, nükhinyiami maei changmeipü mübüthülei müknyinshekhangü, hepak mangngoi-i shongei shümpü adhajük shennyakthüi vaümei hahtükpükei mahdaihen.

⁵Hapa nyih SHEMBÜPAyü aoei nyupü shennyakthü shingvaishi müknyinshekhangpü chüyük, hatü nethe meipü ong athen vaihen.

⁶Shahphenpü uoshing kü uopüthü shingvaishi büpayü shahhing laangha vaihen, hatü penyüshalei thepju kü vepa kü khangei yaongpüthü shingvaishi wong vaikahen.

⁷Thibüthü hatü ngongpathü dangkao yiüi chokei nüngitei-i nyüke, hatü sheti chokei longteinyüke. Jomi yiü longi yingei chokdaipü nangkü, jomi mehe dükhen nenyingi huluh shuohnyüke. Kahvangi shompü manghkhang nenyingaokhen mü thibüthüi yiü chokdaiteke; hatü ngongpathüi jom touei deijapü shah nephenaokhen mü yiüi chokei nyüke.

⁸Jomei uoshing yaongshing kemei shing hükao daüpü neshiüi bhaipai maei nyüke.

⁹Üam kü büpai nyuhhen khenya? Üpa kü büpai hapa shahjang enya? Hapayü shaang amma phenpü naü kü ehen mon meihen khih.

¹⁰Dük khan dük, dük khan dük; shahkung kü shahkung, shahkung kü shahkung; hatouei maani, antolei maani.

¹¹Ammi nebangjema mih-ei shah mü, nenyingpü shahlemi Kahvangi laophülei nanglakthü kü ehen.

¹²Büpai hathü kü, “Hapayü nyiumeihen shing, nyiupüthü nyiumeihütuh; hatü hapayü nyiumeishing, shejao jomi ha nebangnyu.”

¹³Hanangkü jom shingvaishi SHEMBÜPAlei shah-ü, “Dük khan dük, dük khan dük; shahkung kü shahkung, shahkung kü shahkung; hatouei maani, antolei maani” shei nyuhen. Hanangkü jom daiyei dohen, ma yahhen, vepalei lak kü shühen, hatü khoklatei küphen.

¹⁴Hanangkü Jerusalemei ha nanglakthü kü vanglem lempü changmeipüthü SHEMBÜPAlei shah bangtuh.

¹⁵“Hami dipü mü vangpüshuwpü lingtepih, mahngchong mü shah shettepih shei changmeinyüke. Shanghah vongshüh dhaümshing kü ham neponghahpih; mehenangkü shahshemü hamei loishing, hatü peileipeyü ham joshing shei deihnyüke.”

¹⁶Hanangkü SHEMBÜPA Kahvangi, “Veituh, ngei Zionlei chongnyiam yaong, hatü dokhen yaong hük, chongnyiam shing wong kohhen shingvaishi douvang shongkaong yaong hük tuhnyüpeih. Üpai hapa kü hinglemhenshang, neshanghahhen.

¹⁷Ngei shahhingü shetpü vü leihühen, hatü daülangshemshepeyü shetpü lüng leihühen. Shü vüpai ammei loishing shahshemü maoei shanlanghen, hatü ammei shojo chingü yungi bhümlanghen.

¹⁸Ammi dipü mü vangeishuwpü mahdaihen, hatü Sheol mü ammi shah shetpeyü nenyukahen. Mechem shanghah vongshüh peihen, amü hapai lomohhen.

¹⁹Hapa meshükpa peihen, hajükpa am yah-ei deihen; nepjeih, nyihnüng, yanüng shei hapai am maoei shanlanghen” shei enyüke. Hapa shahjang danpai am nyemei vünghen.

²⁰Am lemhen nemei-i lüng longi shaoshi chongkahen; büm neomhen mü doknyü longi shohshi nyukahen.

²¹SHEMBÜPAi Perazim Kahshang, hatü Gibeon Kahjilei dükpükei, büpalei thamapü dou dükhen, hatü büpalei yashanpü dou dükhen yaongkahen.

²²Shaang ammi langmaanshapshüpü dohtuh, hei nevaijema am yepei shapü nyiamvü wong kohkahen. SHEMBÜPA, Jeiyong Kahvangi kahdok mahtükhen tempüngei dantepih.

²³Bangtuh, hatü ngelei shah danhahtuh; ngei mehe enya, ha kü mong shuohtuh.

²⁴Mechem kahling ami han hoknya, jomi nedoh-i hoknyu hiang? Jomi nedoh-i kahdok nih-ei shoei nyunyu hiang?

²⁵Mechem büpai kahdok phaa jiühüei temhenshang, büpai halei dhonia hatü hahbhang long nehainyu hiang? Büpai hapa shingkü wheat, hatü barley hah nesheinyu hiang? hatü hapa kü mangkung nekungnyu je?

²⁶Büpalei Kahvangi mekei dükhen meishi nyuh-ei nyüke.

²⁷Dhonia hatü hahbhang long keyü püshüng longpai bheiyei netennyih, shejao lüngi bheiyei jük vülangnyeih.

²⁸Nük ngaihen nangkü hah shünyüpeih, shejao den kü hapa kü shüei nenyunyih. Hapa tenhen shingvaishi koyei-i kharila kü shinjao koyei-i hapa netennyih.

²⁹Hapayao Jeiyong SHEMBÜPAleipü peinyüpeih; büpayü thamapü kon hatü ngan kohpüba.