Read Phom Naga ISAIAH 3 Bible Online

ISAIAH 3 - Phom Naga bible

ISAIAH 3

¹Veituh, shaang SHEMBÜPA, Jeiyong Kahvangi Jerusalem, hatü Judah nyiphen leipü sheühpüshongpü shuohpü peü; hahying shuohpü hatü yung shuohpü;

²Ve hokbü hatü veshan, shahphenbü, hatü thibü, phongyombü hatü behe,

³pinyipüan shak kü mübü, hatü lupülongpü shennyak, shahnying venbü, nganbü hatü ngan noteihen manpüthü peü yahlanghen mon nyüke.

⁴Ngei jom shak kü hashihthüi lakchongbü vaihühen, jom shak kü jiüjiü hashihthüi vanglem lemhühen.

⁵Shennyakthü hüki hük kü shüveiteihen, hashih-i behe kü dhüm neshuohhen, nyüten patenthüi hamhiman kü dheshing dhenaamhen.

⁶Shennyak hanei-i laophülei jeihinaü jütepü, “Nüngei lakei ashak dok-üm dangkao nyupai, hapa keiha shanghahpü nyih kü hamei mübü vaikütuh” shei ehen.

⁷Shejao hapa nyih kü büpai jangei, “Tah, ngei am kü nesheühpih; ngelei shemei hahying nevaijü ashakviha meheyao neshiüpih; ngei ammei mübü vaihen tejepha” shei ehen.

⁸Mehenangkü Jerusalemi huluh shuohteke, hatü Judah doteke; mehenangkü jomei shah hatü dou SHEMBÜPA khüei nyuteke; jomi büpalei müknyinshekhang ompü sheihtükteke.

⁹Jomei dhe kü veijü-üng jom khüei denpü shuohhahpü eenyüke; Jomi Sodom am keiha ngaiheyei mang düknyüke. Onyükei! jomi jom nyingi shanghah koei peihahteke.

¹⁰Daülangpüthü kü am-üng vangmei khih shei eyeishuoh; Mehenangkü jomi laophülei lak kübü vampü hahshi nyuhen.

¹¹Nemeipüthü onyükei! Jom meshük lomoh-ang! Jomi mih kü mehe dükshuoh, hapa jom kao dükshuohhen.

¹²Hasho naü-eethüi ngelei nanglakthü kü shüveihen, nyühathüi jom shak kü vanglem lemhen. Oh ngelei nanglakthü, ammei mübüthüi am lemnyong kü münyüke; jomi am lembienei deilangnyüke.

¹³SHEMBÜPAi shahphenpü uoshingei uonyüke, hatü nanglakthülei shahphenhen yaongnyüke.

¹⁴SHEMBÜPAi büpalei nanglak behethü, hatü mübüthü khüei shahphenhen yaongnyüke. “Ngelei nyalingngupai kah mangtükpü hayü am hih; hatü taopathülei douhinang ammei shemei nyüke.

¹⁵Ngelei nanglakthü ngümtükpü, taopathülei dhe nihtükpü mehe lappüang?” shei SHEMBÜPA, Jeiyong Kahvangi enyüke.

¹⁶SHEMBÜPAi enyüke: “Zion nelathü aung neleipü nangkü, hatü üng domei domei veishi mükmo moei, ownyülangha bongmü, lüngnyü lüngha bongmü lakdük lateen kü kling klang mü longteipü nangkü;

¹⁷SHEMBÜPAi Zion nelathülei shangjing kü ma kohhühen, hatü SHEMBÜPAi jomei shangpaangtükhen” shei enyüke.

¹⁸Hapa nyih kü SHEMBÜPAi ammei ownyülanghathü: laktet, shetaang hatü üngshang yük;

¹⁹dhaongchü, lakshep, hatü dokshak;

²⁰shangjing kübü owthü, la-üng kü sheppü nyiamkhai, ngeihham ashak, vongmei meli shihpü pela, shepe hunghen anguti;

²¹anguti, shongchü;

²²mo owthü, doknyü bhagthuh, doknyü, khoungha;

²³aina kohpü ashak, nyemin ashak, shangshak, dok-üm ashak yah-ei lüdaihen.

²⁴Vongmei meli nangjei shie büpü, bhag-ai ashak nangjei vülep; shohiyang meipü jeiyei shangpaangpü; man-ow nangjei dhoila ashak; dhemeilaüma nangjei veü shuohhen.

²⁵Ammei shennyakthü mih-ei yani, hatü ammei veshanthü vehok kü mahkemhen.

²⁶Zion penyüshathü mahng thephen, hatü younghen; hapa chingnyü-ü bümkong nehahneyingi kahdokei uoshi nyuhen.