Read Phom Naga ISAIAH 30 Bible Online

ISAIAH 30 - Phom Naga bible

ISAIAH 30

¹“Oh ven nedanpü hapeüthü onyükei,” “Üami ngelei küpjan nevaipü kü küpjan lingei dainya, ngei mongpü nevaipü kü üami mang kü mang üei mih mü uwmeilem lingnya;

²Ngei leipü chudeih neyah-i üami Ijiplei yiünya, üami Pharaoh-i yangphahen shei sheühpü yemnya, hatü Ijip amei vangdhüm kü loihen yemnya, onyükei!

³Shejao Pharaoh-i am yangpü kü am veühen, Ijip amei dhüm kü loipü kü am maanpü leihen.

⁴Jomei lakchongbüthü Zoanei nyujao, hatü jomei lembü Hanez ngoijao,

⁵jom kü nanglei neshuohpü nanglakthü homei peü veü danghen; hathüi sheühpü nevaijü nanglei nevai, shejao veü hatü mongmang koei peikahen” shei SHEMBÜPAi enyüke.

⁶Negeb leipü yemhimakthü nangkü epü shah: Shangpong yakyingpü kahdok homei, mailang chebi chebaongthü, biünyü biütamthü homei jom kü nanglei neshuohhen nanglakthü touei, jomi gadu kü jomei mophimothü, hatü ut kü jomei hon hi nginthü shetnyüke.

⁷Mehenangkü Ijip ami sheühpeyü yahlak neshiü. Hanangkü ngei jom kü, “Neheti uopü Rahab” shei nyüknyüpeih.

⁸Shaang daituh hatü ngoikahen nyihthü kü denshing denbü vaihen shingvaishi, jom nang yaongshung kü hatü laitap kü nyangtuh.

⁹Mehenangkü jomü ven lepü nanglak, lupülempü hapeüthü, SHEMBÜPAlei nyuhpüvenpü neyahpü hapeüthü.

¹⁰Jomi manghkhang eepüthü kü, “Hajük kü manghkhang te-ekei” hatü thibüthü kü, “Mehe jiü, hapa nang teteivanei te-ekei shei enyüke. Ham kü mongongbenüng mon eshih, mehe lekahen ha mon eshih;

¹¹Ham kü lem nüngshih, lem yamshih, ham kü hajük kü daülangpü Israel Kahvang nang tedanhü” shei enyüke.

¹²Hanangkü daülangpü Israel Kahvangi hapakei enyüke: “Mehenangkü ammi hapa shah yaktükpü nangkü, hatü depülaopü kü, hatü lawlüppü kü mong shuohpü nangkü;

¹³hapa mangü am shingvaishi longi shaopü bham bhaokei ngangahük kü laampükei nyukahen.

¹⁴Hapayü haümdük bhaopükei khih mü nihdaihen; awdep leipü awtao shihhen, nevaijü yung shohen mü nedangi nihdaihen.”

¹⁵Jeiyong SHEMBÜPA, Israel Kahvangi, “Ngei touei mong lepei leikei; nenmü ngei kü hinglemtuh, shejüang ammi wong danghen” shei enyüke. Shejao hapa nedükhüi;

¹⁶“Hami koyei kü uotü nyaihen” shei epü nangkü, ami hapakei-üng nyaihen! “Hami longi la shangshi mokpü koyei kü nyaihen hih” shei ammi epü nangkü am kü changpüthüao longi la shangshi nyukahen.

¹⁷Hük kü nyemei haja nyaihen, hatü pa nga-i nyemshaopü kü am kahshang leipü khüamlung lüng keiha monha manglei thahshi nyaihen.

¹⁸Hanangkü SHEMBÜPAi am kü phahjihen dannyüke, hatü büpai am kü shinshanghen yaongnyüke. Mehenangkü SHEMBÜPAyü shahhing Kahvang; Büpa kü omdanpü peü moihiman!

¹⁹Oh Jerusalemei nyupü Zion nanglakthü, am hajük kü netheppih. Ammi vaüpü eepü ngeü danei büpai am kü phahjiei deihhen; mechem büpai ha danhen büpai jangphahen.

²⁰SHEMBÜPAi am kü mongmang bhaong üh-ei hanghi yung yingphüjao, ammei Nyuhbü hajük kü nejodaihen, shejao ammei müki lekei büpa eehen.

²¹Mechem laknyong nevaijü lakdah lemei lephenshang, ammei dhaongi am pheikü shah hük, “Lemnyü-ü hapa hih, hapa kü kamtuh” shei eyei danhen.

²²Hahepak kü ammi hon hatü ngini shaokei lingpü lajeithü yah-ei ashakten keiha yaktüktuh.

²³Ammi kahdokei haipü sheili shingvaishi büpai vang shomphahen, hatü kahdok kübü vampü hahyingi am shemmei leiyei changshi nyuhen. Hapa nyih ammei mohohthüi koshoya kü phenhani changshi hahhen.

²⁴Han hokpü mohohbaong hatü gaduthüi meishi shüei shaptükpü het hahhen.

²⁵Hapa jüteipü nyih longpü kü shangdü kemei benei vüdaihen, hatü kahshang hatü shangtao shaopü peü kü yungyen keiha iy yenhen.

²⁶Mechem SHEMBÜPAi laophülei nanglakthülei makaw thünghen, hatü büpai ma yahhüpü makaw meihühen; hapa nyih lennyü vanghenyü kei khanghen, hatü vanghenyü-ü nyih nyet helushoei hepü keiha shing nyet nyahen.

²⁷Veituh, SHEMBÜPAlei men tailu leipü peikünyüke, mongshih wong kemei phumnyak keiha awshit vamei; büpalei ju kü mongshih maei, hatü büpalei yei-ü awlom kei nyüke.

²⁸Büpalei ngü üng thahshi aongpü büng kei nyüke. Hapai jatthü peü maoei deiyei mahtüknyeih, hatü lemnyong kü daihen shingvaishi büpai ju kü nyiam maahünyeih.

²⁹Shejao Kahvangei nanglakthü amphongü mohitap kü yanüng kesho nyahhai-i mongongpükei nyuhen. Ammei mongü nanglakthüi SHEMBÜPAlei Kahshang, Israel amei Yaongnyü touei liping vüngei aongjü mongongpükei nyuhen.

³⁰SHEMBÜPAi büpalei müknyinshekhangpü ngeü peü kü danhühen, hatü büpalei lak mongshihpai awlom mü, phumnyak hatü klang vangteng, hatü shü vüpükei yiükünyüke.

³¹SHEMBÜPAlei ngeüi Assyria am yantükhen; büpalei lenshuoh-i jom kü bheihen.

³²SHEMBÜPAi büpalei lenshuoh-i jom kü bhei shan ieyei phaam hatü harp ngeü mü vamhen. Kahvangi laophü lomei Assyria am mü hokhen.

³³Ongpa jakhen shing yeihshi-üng temei nyüpeih. Hapa awbhaongü chüshi, ba longshi pü shangshi shüngshi nyüpeih. SHEMBÜPAlei ngü awkaong meli kü bahpü awlom kei vamei hapa kü aw bahhen.