Read Phom Naga ISAIAH 37 Bible Online

ISAIAH 37 - Phom Naga bible

ISAIAH 37

¹Mechem Hezekiah ongpai hapa jung danpa, büpai laophülei ashak shaak, hatü dhoila ashak ümtü SHEMBÜPAlei shemei dai,

²hatü büpai ongshem veibü Eliakim, laknyangbü Shebna hatü ngongpa behethü dhoila ashak ümtü Amozlei cheha Isaiah thibü touei shom.

³Jomphongi büpa kü, “Hezekiah-i hapakei enyüke: Hapa nyih-ü shanghahpü, lohhahpü hatü mongmangpü nyih khih; nyüha hüki naü anghen hepak ngoijü hapa naü anghen wong kemdaipükei shüke.

⁴Assyria ongpai büpalei veshan mübü shomei vanyangyem Kahvang kü eelapü büpai danei nyüke; SHEMBÜPA, nüngei Kahvangi ha shahthü danei hanghi nyemshuoh. Hanangkü shaang yangei aoei nyupüthü shingvaishi phoptuh” shei e.

⁵Mechem Hezekiah ongpalei chongphobüthü Isaiah touei peijapa,

⁶Isaiah-i jomphong kü, “SHEMBÜPAi hapakei enyüke shei ammei ongpa kü etuh: Mepa shahthüi Assyria ongpai ngei kü eelatepa, hapa shahthü danei nüngi tenyem.

⁷Büpai shahjang hük danhen mü ngei büpa kü laangha hük shihhen, hatü büpa laophülei kahmük yemei leidaihen, hatü halei ngei büpa jütükhen” shei e.

⁸Lakhish leipü Assyria ongpa leidaiteke shei danei veshan mübü leijajü ongpayü Libnah am mü hokei nyuteke.

⁹Ijip am veshanthü Kush am Tirhakah ongpai mütü Assyria hahnüng peikünyüke shei shahjang danteke. Mechem büpai ha danpa, büpai Hezekiah touei hapa shah koei phongmokbüthü shom:

¹⁰“Judah ongpa Hezekiah kü ha eyeishuoh: ‘Jerusalemü Assyria ongpalei lak kü neshuohpih’ shei epü nüngi hinglempü Kahvangi lupülempü kü tevü.

¹¹Hingmei, Assyria ongpai kahmükthü peü chemjalak kü mahtükhüei mehe dükshuohpa, ha nüngi danei nyüke. Nüngpa yanghen shei deihnyu je?

¹²Ngelei bühipai Gozan, Haran, Rezeph hatü Tel Assarlei nyupü Eden nanglakthü mahtükshingkü jomei kahvangthüi hathü jatthü yangshuohla?

¹³Hamath ong, Arpad ong, Sepharvaim chingnyü leipü ong, Hena ong nevaijü Ivvah ong melei nyüpa?”

¹⁴Hezekiah-i phongmokbüthü leipü lai yah-ei ieteke. Hapheikü büpai SHEMBÜPAlei shemei aongei SHEMBÜPA touei hapa lai paanteke,

¹⁵hatü Hezekiah-i SHEMBÜPA kü phop:

¹⁶“Oh Jeiyong SHEMBÜPA, Israel Kahvang, cherubim nyi aa kü hon uoshing kü uopüba, nüng monha kahdoknyü ongchingthü peü shak kü Kahvang. Nüngi kahdoknyü hatü vangsho lingpeih.

¹⁷Nüngei dhaong shaangshih, Oh SHEMBÜPA, hatü bangtuh; Vanyangyem Kahvang kü eelayei shompü shahthü kü banghümao.

¹⁸Hingmei-üng, Oh SHEMBÜPA, Assyria ongpai jatthü hatü jomei kahmük kemei koyaban leiyei tuhphongpeih,

¹⁹hatü Kahvang nevai, hangkui pü hatü yaong yah-ei laki lingpü kahvang vaipü nangkü ha kahvangthü aw kü jakei mangtükteke.

²⁰Oh SHEMBÜPA, hamei Kahvang, kahdoknyü ongchingthü peüi nüng monha Kahvang khih shei nyinghen shangmü nüngi büpalei lakmong leipü ham yangshih, Oh SHEMBÜPA” shei phop.

²¹Hapheikü Amozlei cheha Isaiah-i Hezekiah touei hapa shahjang shom: “SHEMBÜPA, Israel Kahvangi hapakei enyüke: Assyria am Sennakerib ongpa nangkü nüngi ngei kü phoppü nangkü,

²²büpa khüei SHEMBÜPAi epü shah-ü hapa khih: Pai mü ngühpü Zion nela-i nüng ne-ienelemnyih hatüthaüvaünyeih, Jerusalem nelathüi nüngei ngaümpheilei ngaüm dhinyeih.

²³Üpa kü nüngi yaüeilungei thaüvaünya? Üpa khüei nüngi langmaannya, hatü changmeiyei veinya? Hapayü daülangpü Israel Kahvang khüei enyu khih!

²⁴Nüngei phongmokbüthü homei nüngi SHEMBÜPA kü yaüei eteke, hatü nüngi, ‘Ngei koyei khari mü Lebanon kahshang shaopü thahshi aongtepih. Haleipü shaopü cedar, hatü meipü cypress püthü agtepih; hapa shangching teppü hatü hapa yingnyü yingnyak thahshi shütepih.

²⁵Ngei yungkuk shoei haleipü yung yingtepih, Ngei ngelei labha-i nyeüei Ijip amei yungyenthüao jeptüktepih’ shei enyüke.

²⁶Hepak luangi daiteke, hapakei nyemvam shei ngei hanpeih; ha nüngi nedanangpü je? Penyü showtükpü chingnyüthü yaong khongpükei nüngi leitükpeyü ngei aivang den mebü hapa küpjan lingpeih, hatü shaang ngei hapa vamhüpeih.

²⁷Haleipü shennyakthüyü wong neshiü, veüpong hatü mongmang kü nyüke. Jomphongü kah leipü thüng, hatü phenha vampü keiha; shem adok kü kohpü thüng manglongi vandaipükei nyüke.

²⁸Ngei nüng kam nüng yaong, nüng dai nüng lei, hatü ngei khüei nüng yaongpü nyingnyüpeih.

²⁹Nüngi ngei khüei yaongpü, hatü nüng changmeipü ngelei dhaong thahshi aongpü nangkü ngei nüngei shong kü nyiamphaak shihhen, hatü nüngei ju kü ngelei nyiamphak ühhen; nüng peipü lem kü ngei nüng nyokei leishihhen.”

³⁰Hapayü nüng shingvaishi nyangeihepü ha chongkahen shei Isaiah-i Hezekiah ongpa kü e: “Shenüngü mehe pinnyü nyingnying vamei jükkahenshang hapa hahtuh; ngüvangao haleipü mehe vamei jükkahen ha hahtuh; shejao bong jempabü keyü sheili haituh, vettuh, nyalingngupai sheituh, hatü haleipü betjük hahtuh.

³¹Aoei nyupü Judah am phang tünglang yiühen hatü shang philei betjük jükhen;

³²mehenangkü Jerusalem leipü aopü khong hük, hatü Zion Kahshang leipü yangpü khong hük vamkahen. SHEMBÜPA nyakpükenpai hapa dükhen.”

³³Hanangkü SHEMBÜPAi Assyria ongpa nangkü hapakei enyüke: “Büpai hapa chingnyülei lahhan kapyaki inyüshung paitü hapa ching hahhen nepeiküpih.

³⁴Büpa peipü lem kü-üng büpa nyokei leidaihen; büpai hapa chingnyülei nepeiküpih shei SHEMBÜPAi enyüke.

³⁵Mehenangkü ngelei men kü hatü ngelei chongphobü Davidei men kü ngei hapa chingnyü honglangtü yanghen”

³⁶Hapheikü SHEMBÜPAlei vangsho phongshan vamei Assyria amei baümtap leipü veshan 1, 85, 000 jüteke; mechem vangngai meipa, peü didaitü nyuteke.

³⁷Hahepak kü Assyria am Sennakerib ongpa layaongei shemei leiyei Ninevehlei nyu.

³⁸Büpa laophülei Nisrokh kahvang khümshemei khümei nyushingkü büpalei cheha Adrammelekh hatü Sharezer nyi-i büpa baptü jü, hatü jiji Ararat kahdokei nyaidai. Büpalei cheha Essar-Haddoni büpa jeiyei ong vaiteke.