Read Phom Naga ISAIAH 38 Bible Online

ISAIAH 38 - Phom Naga bible

ISAIAH 38

¹Hathü nyih kü Hezekiah tüngei dihen mü nyuteke. Amozlei cheha Isaiah thibü büpa touei peiyei, “SHEMBÜPAi hapakei enyüke: Bükhishem meishi jungtüktuh, mehenangkü nüng sheyü didaihen, hatü hapa dinshan kübü neyangpih” shei e.

²Hezekiah-i bham philei dhe meetü SHEMBÜPA kü,

³“Oh SHEMBÜPA, ngei nüng touei monghahshi, mongdang kempai hinglemei hatü nüng touei mehe mei, ha dükei kampü deih-ei dangtuh” shei phopei e, hatü Hezekiah-i shahyaki thep.

⁴Hahepak kü SHEMBÜPAlei shah Isaiah touei peiteke:

⁵“Daituh hatü Hezekiah kü SHEMBÜPA, ampa Davidei Kahvangi hapakei enyüke shei etuh: Ngei nüngi phoppü dantepih, hatü nüngei mükphi eetepih; ngei nüng kü shao bong anpünga üphahen hih.

⁶Ngei nüng hatü hapa Jerusalem Chingnyü Assyria ongpalei lak kübü yanghen.”

⁷SHEMBÜPAi mehe lahtepa, ha dükhen; hapayü SHEMBÜPAleipü nüng shingvaishi nyangeihepü hük nyukahen.

⁸Veituh, Ahaz ongpai lingpü lateen kü vangdhüm laang lakham an ngaümphei lemei shinei leishihhen. Hanangkü heshü lemei yiüdaipü vanghe shao lakham an shinei leishihteke.

⁹Hapayü Judah amei ongpa Hezekiah-i tüngpü meipheikü nyangpü menvih kesho nyüke:

¹⁰Yangnyu tavanshem kü ngei kahdoknyü kübü yandaihen khih; Aopü bongthü kemei yimchingei nyuhen khih shei deihteke.

¹¹Hapa yangnyu nyupü kahdokei SHEMBÜPA ne-eeükhih; hajük kü hangkuli ne-eeshasha khih, nevaijü kahdoknyülei nyupüthü mü nenyu-ükhih shei deihteke.

¹²Mi yombülei ashakshem keiha ngelei shemü bhiyeiyah-ei lüdai; Ashak dakbüi keiha ngei ngelei yangnyu dülang, Paikung kübü ashak japtükpü keiha büpai ngelei yangnyu japei yaktük. Nyak hi ngai thüngei nüngi ngei dohpü lemei mü.

¹³Ngei nepnüng dhom ngoishi thepei phop, shejao mailangi keiha büpai ngelei vang nihtük; Nyak hi ngai thüngei nüngi ngei dohpü lemei mü.

¹⁴Khihmang hatü yungou keiha ngei vaüteke, athubai keiha ngei mahng thepteke. Shang philei veihampai ngelei mükyang yungdaiteke. Oh SHEMBÜPA, ngei ponghahnyeih, ngei yangshih!

¹⁵Shejao ngei mehe eaokhen? Mehenangkü büpai-üng ngei kü etü büpai-üng ha dükpü khih. Ngelei mongdang kü shahyaki deihpü nangkü ngei neshinyih.

¹⁶SHEMBÜPA, hapa keipü dou kü hangku nyunyeih, hatü ngelei laanghai hathü kü yangnyu dangnyüpeih. Oh ngei tüngpü meitükshih, hatü ngei nüng shingvaishi nyushah.

¹⁷Hingmei mü ngei nanglei danghen tata kü ngei shahyaki hanghipeih. Nüngi bampai ngei mahhen kahsha leipü yangpeih. Nüngi ngelei mangthü peü nüngei ngaümpheilei yaktükpeih.

¹⁸Mehenangkü mahngchongi nüng kü menvih neshuoh-aok; dipai nüng kü menlong kesho nelokaok; Kahshalei shüdaipüthüi nüng shahhing epü kü monglemhen neaok.

¹⁹Ngei shinnyih dükpü keiha yemmü nyupüthüi mon nüng kü men vihnyeih; Büpai laophülei hühihathü kü nüngei shahhing jung enyüpeih.

²⁰SHEMBÜPAi ngei yanghen, hatü SHEMBÜPAlei shemei jenei yangnyu den kemei harp vüngei kesho lokhen.

²¹Shaang Isaiah-i ongpa kü, “Bhukjük yah-ei hihüma kü khameishuoh, hatü büpa tüngpü meidaihen hih” shei e.

²²Hahepak kü Hezekiah ongpai, “Ngei SHEMBÜPAlei Phopshemei aongaokhen mü nyangeihepü mehe huphahenang?” shei phe.