Read Phom Naga ISAIAH 44 Bible Online

ISAIAH 44 - Phom Naga bible

ISAIAH 44

¹Shejao shaang bangtuh, Oh Jakob, ngelei chongphobü, Ngei jepü Israel am.

²Üpai am lingpa hatü üpai am wom mongei shükpa? Hapa SHEMBÜPAi hapakei enyüke: Am tenyem, Oh Jakob, ngelei chongphobü, Ngei jepü Jeshurun.

³Yung nedangpü kahdok kü ngei yung yahphahen, hatü kahngadok kü yungyenthü yenhühen; Ngei ngelei laangha ammei hühihathü, hatü ngelei moihiman ammei lihilathü kü khüpphahen.

⁴Jomphongü phenhani keiha, hatü yung yenpü yungkung kübü willow pü keiha longhen.

⁵Hük pheikü hük shei shennyakthüi, “Ngeiyü SHEMBÜPAlei” shei ehen, hatü jomi Israel nanglakthü mü omhen. Jom peüi jomei lak kü, “Ngeiyü SHEMBÜPAlei” shei nyanghen, hatü Israel amei men yahhen.

⁶Israel amei Ongpa, hatü Yemleibü, Jeiyong SHEMBÜPAi hapakei enyüke: “Ngeiyü chongpangpü hatü dohpü; Ngei mü lenei lebü Kahvang neshiüpih.

⁷Ngei lepü üpa nyüpa? Jomphongi ha nyembaongkei, jomi ha nyem-ekei, hatü ngei touei nyemdeikei. Chongpangpü kübü dohpü ngoishi ngoikahen nang üpai teteivanei eaokpa?

⁸Amphong tenyem nevaijü tehan, Ngei shelei mebü-üng ha am kü ne-eangpü je? Amphongü ngelei denbüthü, Ngei mü lenei lebü Kahvang nyüpü je? Lebü Yaong neshiü; ngei hükao nyingei neshiüpih.”

⁹Üami lajeithü lingnya, jomü yahlak neshiü, hatü jomi monghahpü kahvangthü nanglei neshiü. Üami hapa kahvang kü khümnya, jomphongü mükphüngpa hatü ngapathü hatü jomphong veü danghen.

¹⁰Üpai Kahvang lingnya, hatü lajei shangnya, hapai büpa nanglei nedanghen.

¹¹Veituh, hapa kü khümpüthü peü veü danghen; lajei lingpüthüyü shennyak khih. Jom peü thaitü shahphen shingei nyemyaong; jom peü nyemhühen; jom peü veü danghühen.

¹²Hon shükbüi kahnyak jaktü hon yah-ei aw kü jakei kaoklak notü büpalei laki wong kempai hapa dhüngei shüknyüke. Büpai nük aeinyüke, hatü wong kemnyüke; büpai yung neyingjü shomeiyingei shanyüke.

¹³Mistri-i vü kangei shetnyüke, hatü hapakei linghen shei nyangei shetnyüke; büpai peikha-i apei bahiyang shetei shennyak keiha dhemeilaümashi lingtü jom khümshingei tuhnyüke.

¹⁴Büpai cedar pü nevaijü cypress pü nevaijü longkhampü phaü leipü agnyüke. Büpai cedar pü sheinyüke, hatü vang keipai hapa longhünyüke.

¹⁵Hapheikü büpai hapayü pü vaishi aw kü jaktü aan lingnyüke. Shao büpai hanei yah-ei kahvang lingtü hapa kü aümei khümnyüke.

¹⁶Hapa pü hükkeishing büpai aw kü jaktü nyahhiphai cheütü mohei hahnyüke. Büpai hapa awsham kü uotü, “Ah! ngei shaamlukdongi nyüpeih! Awsham ahshi-üng meishi khih!” shei enyüke.

¹⁷Aopü yah-ei büpai kahvang hük, büpa shing lajei lingtü hapa kü aümei shatü khümnyüke. Büpai hapa kü, “Ngei yangtuh! Nüngü ngelei kahvang!” shei phopnyüke.

¹⁸Hapa keipü shennyakthüi hapa nenyingnyu, nevaijü nedannyu; jomei mük phüngdaipü nangkü jomi ha ne-eenyu, hatü jomei mongdang küplangpü nangkü jomi ha nedanaoknyu.

¹⁹“Hapa pü hükkeishing ngei aw kü jakpeih; hapalei awtao kü ngei aan lingei nyahhiphai cheüei hahpeih; shaang ngei hapa hükkeishing aopü yah-ei jiühitnalaipü lajei linghen je? Hapa pübhaok hanei aopü kü ngei aümei khümhen je?” shei ehen üpa kao nelenyu, nevaijü üpa kao hapa yaoei ehen nedeihnyu.

²⁰Büpai depla hahnyüke; büpalei dhennyong mongnyongi büpa lemnyong kü mülangnyüke, hatü büpa nyingi neyangaok-ü nevaijü “Ngelei lakdah lemei nopü lajeiyü Kahvang nevai, shahshem khih” shei nedeihnyu.

²¹Hathü deih-ei dangtuh, Oh Jakob, amphongü ngelei chongphobüthü, Oh Israel. Ngei amphong lingpeih; amphongü ngelei chongphobüthü; Oh Israel, ngei amphong nebetükpih.

²²Ngei ammei mang phumnyak changtükpü keiha daütüktih; Ngei touei mong lepei leikei, mehenangkü ngei amphong angei leitepih.

²³Mongongpai loktuh, Oh vangshothü; mehenangkü SHEMBÜPAi hapa dükteke; Wongmü lentuh, Oh chülohpü kahdoknyü. Vangsho kü shongshi kesho loktuh, Oh kahshangthü, Oh jahpandok hatü halei nyupü pühivungthü! Mehenangkü SHEMBÜPAi Jakob angei leiteke, büpalei müknyinshekhang Israel am kü hunyüke.

²⁴Ngeiyü SHEMBÜPA, am Yangbü, Wom mongei am Lingbü, Ngeiyü SHEMBÜPA, lemphüli Lingbü, Ngei moni vangshothü paanei lingpeih, ngei lomjai kahdoknyü laiyei lingpeih.

²⁵Ngei lak-ow veipüthü ngapa leitüknyeih, hatü phongyompüthüi tetpü ngashah leitüknyeih. Ngei nahpülangpüthülei kihikon yaktüknyeih, hatü ngashah yoishah leitüknyeih.

²⁶Shejao mechem ngelei chongphobüi teteivanei ehen, mechem ngelei küpjan shakei vamhühen shingvaishi ngelei chongphobü shomhen, Ngei hathü tetshahvanshah hatü küpjanthü jiühünyeih. Shennyakthü shao chingchingei nyuhen shei ngei Jerusalem kü enyeih, hatü Judah chingnyüthüao shao ne-ei leiyei linghen, hatü beneilangei nyupü shao ngei lingei leihen.

²⁷Ngei shah phahük mon ejü yungchingao jepdainyeih.

²⁸Ngei Cyrus kü, “Ngei nangjei nüng vanglem lemhen; Ngei mehe mongnya, ha nüngi dükhen, Jerusalem ne-ei leiyei lingtuh, hatü Phopshem chongnyiam yaong shao sheituh shei nüngi ngeükhüam shuohhen” shei epeih.